ភ្នំពេញ៖ ជាមួយកាយវិការក្រមិចក្រមើមបកស្រាយពីពាក្យពេចន៍វេយ្យាករណ៍ យុវតីដ៏ស្រស់សោភា Jennica កំពុងទទួលបានការគាំទ្រពីប្រិយមិត្តក្នុងបណ្ដាញសង្គម ចំពោះវីដេអូបង្រៀនភាសាអង់គ្លេសរបស់កញ្ញា។
ផ្អែកទៅលើបទពិសោធជាសិស្សធ្លាប់មានការងឿងឆ្ងល់ច្រើន កញ្ញា Jennica បានបង្កើតវីដេអូបង្រៀនភាសាអង់គ្លេស ដើម្បីចែករំលែកពីចំណេះដឹង និងបច្ចេកទេសក្នុងការរៀនរបស់ខ្លួនជាមួយអ្នកតាមដានទំព័រហ្វេសប៊ុក English With Jennica ជាង ៧២ ០០០ នាក់ និងចំនួន Subscribe នៅក្នុងយូធូបប្រមាណ ២,១៤ K។
យុវតីធ្វើវីដេអូបង្រៀនភាសាអង់គ្លេសរូបនេះបាននិយាយប្រាប់ ភ្នំពេញប៉ុស្ដិ៍ឲ្យដឹងថា៖ «ដោយសារកាលពីរៀនអង់គ្លេសពេលនៅក្មេង ចូលចិត្តឆ្ងល់ពីវេយ្យាករណ៍ និងពាក្យអង់គ្លេសខ្លះៗ ហើយអត់ចូលចិត្តសួរលោកគ្រូ អ្នកគ្រូទេ ចូលចិត្តស្រាវជ្រាវរកចម្លើយដោយខ្លួនឯង ហើយសម្រាប់ការរៀនពាក្យវិញ គឺខ្ញុំចូលចិត្តរកទិចនិកឲ្យខ្លួនឯងចាំពាក្យបានងាយស្រួល អ៊ីចឹងហើយក៏គិតថា គ្នាយើងខ្លះប្រហែលអាចមានចម្ងល់ និងមានផលលំបាកក្នុងការចាំពាក្យដែរ ទើបខ្ញុំធ្វើវីដេអូ ចង់ចែករំលែកពីអ្វីដែលខ្ញុំបានដឹង និងទិចនិកខ្លះៗក្នុងការរៀន ព្រោះគិតថាជាផ្នែកតូចមួយអាចជួយអ្នកទាំងអស់គ្នាបាន»។
កញ្ញា Jannica ដែលបញ្ចប់ការសិក្សាពីវិទ្យាស្ថានភាសាបរទេស (IFL) និងកំពុងបន្តការសិក្សានៅក្រៅប្រទេសរូបនេះ ទើបតែចាប់ផ្ដើមនៅខែធ្នូ ឆ្នាំ ២០១៩ ដោយលើកយកមេរៀនមកបកស្រាយទាក់ទិននឹងវេយ្យាករណ៍ ពាក្យគន្លឹះ គ្រាមភាសា និងវាក្យសព្ទ មកបង្ហាញក្នុងវីដេអូនីមួយៗក្នុងរយៈពេលពី ៥ ទៅ ១៥ នាទី។
យុវតីមុខឃ្យូត នឹងលេងស្តាយសម្លៀកបំពាក់រូបនេះបានបន្តទៀតថា៖ «ប្រធានបទដែលខ្ញុំបានលើកយកមកនិយាយក្នុងវីដេអូ គឺសុទ្ធតែជាអ្វីដែលខ្ញុំធ្លាប់ឆ្ងល់ ឬក៏ចំណុចមេរៀនណាដែលតែងតែធ្វើឲ្យខ្ញុំយល់ច្រឡំ ហើយត្រូវការឲ្យខ្ញុំប្រុងប្រយ័ត្ននៅក្នុងការប្រើប្រាស់ភាសាអង់គ្លេស ដោយគិតថា គ្នាយើងក៏ប្រហែលជាអាចនឹងច្រឡំដូចគ្នា ទើបគិតថាវីដេអូខ្ញុំខ្លះអាចជួយឲ្យពួកគាត់ងាយយល់ និងឆាប់ចាំបានងាយស្រួលជាងមុនហើយអាចឲ្យឈប់ច្រឡំច្រើនក្នុងការរៀនភាសាមួយនេះបាន (ភាសាអង់គ្លេស)»។
ក្នុងរយៈពេល ២ ខែកន្លងមកនេះ Jennica បានបង្ហោះ ១៣ វីដេអូ នៅទំព័រហ្វេសប៊ុក និង ១០ វីដេអូ នៅលើបណ្តាញយូធូប ជាមួយការចែកចាយបន្តរាប់ពាន់នាក់ ដោយអ្នកគាំទ្រភាគច្រើនមានវ័យចាប់ពី ១៥ ឆ្នាំ រហូតដល់ ២៥ ឆ្នាំ ចូលទស្សនាវីដេអូ ជាពិសេសអ្នកមានមូលដ្ឋានគ្រឹះភាសាអង់គ្លេសកម្រិតទាប។
កញ្ញា Jennica បានរៀបរាប់ថា៖ «ប្រសិនបើគាត់ធ្លាប់រៀនភាសាអង់គ្លេសបានខ្លះ វីដេអូខ្ញុំក៏ប្រហែលជាអាចជួយគាត់បានច្រើន ប៉ុន្តែប្រសិនបើគាត់មានមូលដ្ឋានគ្រឹះអង់គ្លេសច្រើនមកហើយ នោះ វីដេអូនេះប្រហែលជាអាចមានប្រយោជន៍សម្រាប់គាត់តិចតួចប៉ុណ្ណោះ ហើយចំណុចតិចតួចនេះអាចជាគន្លឹះ ឬជាចំណុចពិសេសៗក្នុងមេរៀន ដែលអាចជាអ្វីដែលអ្នកគ្រប់គ្នាមើលរំលង»។
ក្នុងការធ្វើវីដេអូបកស្រាយពីមេរៀនក្នុងភាសាអង់គ្លេសនេះ កញ្ញា Jennica ត្រូវរកនឹកឃើញប្រធានបទដែលនឹងយកមកបកស្រាយ ប៉ុន្តែកញ្ញាមិនបានរៀបចំ script ក្នុងការថតនោះទេ។
កញ្ញាបានលើកហេតុផលថា៖ «ខ្ញុំនិយាយយកតែម្តង ដោយអត់មាន script ទេ ព្រោះនិយាយតាម script ចេះតែភ្លេច ហើយត្រូវរកនឹក អ៊ីចឹងហើយមើលទៅវាអត់ចេញមកពីធម្មជាតិផង ទើបមិនចូលចិត្តមាន script»។
រីឯបច្ចេកទេសកាត់ត អ្នកគ្រូមុខឃ្យូត និងកាយវិការបង្រៀនគួរឲ្យស្រឡាញ់រូបនេះបានបង្ហើបប្រាប់ថា៖ «មានអ្នកឆាតសួរច្រើនដែរ ពីការកាត់ត ថាកាត់តាមអ្វី? គឺខ្ញុំកាត់តាមទូរស័ព្ទ ធម្មតាទេ អ៊ីចឹងហើយរាងចំណាយពេលយូរបន្តិច ប៉ុន្តែបើមេរៀននិយាយពីពាក្យ (Vocabulary) កាត់បានលឿនត្រឹម ២ ម៉ោងអីអាចបាន ១ វីដេអូហើយ ប៉ុន្តែបើនិយាយពីវេយ្យាករណ៍វិញ ស៊ីពេលខ្លាំងណាស់»។
ទន្ទឹមនឹងប្រជាប្រិយភាពជាអ្នកគ្រូភាសាអង់គ្លេសមុខឃ្យូតនោះ វីដេអូចែករំលែកចំណេះដឹងភាសាអង់គ្លេសរបស់កញ្ញា ក៏ធ្លាប់រងការរិះគន់ខ្លះផងដែរ។
តបនឹងមតិទាំងនេះ Jennica និយាយថា៖ «ខ្ញុំទទួលស្គាល់ថាខ្ញុំនៅមិនទាន់ល្អប្រសើរខ្លាំងចំពោះការបញ្ចេញសំឡេងដែលធ្វើឲ្យមានការរិះគន់ខ្លះៗ ប៉ុន្តែខ្ញុំក៏បានធ្វើវីដេអូបកស្រាយរួចហើយដែរ។
ខ្ញុំអាចមានកំហុសក្នុងការបញ្ចេញសំឡេង ប៉ុន្តែទោះជាយ៉ាងណាក៏ដោយ ខ្ញុំជឿជាក់ថាទោះតិច ឬក៏ច្រើន អ្នកទស្សនានឹងទទួលបានចំណេះដឹងបន្ថែមខ្លះដែលជា Main Content ដែលជាប្រធានបទចម្បងក្នុងវីដេអូខ្ញុំនីមួយៗ»។
ក្នុងរយៈពេល ១ ខែចុងក្រោយនេះ ការផលិតវីដេអូក៏ហាក់មានការយឺតយ៉ាវ ដោយត្រូវចំណាយពេលចាប់ពី ១ អាទិត្យ ឬ ១០ ថ្ងៃ ទើបមានការបង្ហោះវីដេអូ ១ ទៀត។
យុវតី Jennica បានប្រាប់ពីការតាំងចិត្តក្នុងការធ្វើវីដេអូបង្រៀនពីភាសាអង់គ្លេសដូច្នេះទៀតថា៖ «ទោះជាយ៉ាងណាក៏ដោយ ខ្ញុំពិតជាអរគុណអ្នកទាំងអស់គ្នាដែលចូលចិត្ត និងគាំទ្រកន្លងមក ហើយសង្ឃឹមថា បងប្អូនយើងនឹងនៅតែចូលចិត្ត និងរង់ចាំមើលវីដេអូបន្តទៀត ទោះបីជាចេញរាងយូរបន្តិចក៏ដោយ ព្រោះថាខ្ញុំនៅមានប្រធានបទពិសេសៗប្លែកៗច្រើនទៀតណាស់ ដែលចង់ចែករំលែកទៅអ្នកទាំងអស់គ្នា»៕