.jpg)
សិស្សវិទ្យាល័យជំនាន់ថ្មី (វិទ្យាល័យព្រះស៊ីសុវត្ថិ) ដែលខិតខំធ្វើកិច្ចការច្នៃផ្គុំ ដ្រូន។ ហេង ជីវ័ន
ភ្នំពេញៈ ទន្ទឹមនឹងមោទនភាពពីស្នាដៃច្នៃដ្រូនដែលត្រូវបានយកទៅតាំងបង្ហាញនៅសាលាតិចណូ អាកាសយានដ្ឋានកងទ័ពអាកាស និងនៅវិមានឈ្នះ-ឈ្នះ ក្រុមសិស្សថ្នាក់ទី ៨ នៃវិទ្យាល័យជំនាន់ថ្មីក៏កំពុងធ្វើការសិក្សាអំពីការផលិតយន្តហោះមួយប្រភេទធ្វើពីស្នោជំនួសហ្វាយប៊័រអាស្រ័យទៅតាមលទ្ធភាពថវិកា។
យុវសិស្សវ័យក្មេងថា្នក់ទី ៨ នៃវិទ្យាល័យជំនាន់ថ្មី (វិទ្យាល័យព្រះស៊ីសុវត្ថិ) ១ ក្រុមនេះមានសមាជិក ៦ នាក់រួមមាន រង្ស៊ី ចន្ទចេស្តា មុន្នី គន្ថធុរ ណាន់ សុវណ្ណសាន ង៉ែត វិសុទ្ធ ម៉េង សុវណ្ណមុនិន្ទ និងកុសល ករុណា បានកែច្នៃដ្រូនចេញជារូបរាងល្អស្អាតដែលអាចហោះបានរយៈពេលជាង ២០ នាទី។
សមាជិកក្រុមមួយរូបយុវជន រង្ស៊ី ចន្ទចេស្តា បានប្រាប់ ភ្នំពេញ ប៉ុស្តិ៍ ឲ្យដឹងថា៖ «គំនិតក្នុងការបង្កើតដ្រូនហ្នឹងមានតាំងចុងឆ្នាំ ២០១៧ នៅពេលដែលខ្ញុំឃើញគេបង្ហោះដ្រូនមុនដំបូង ទើបខ្ញុំ និងមិត្តភក្តិម្នាក់ទៀតក៏ចាប់សិក្សាពីការធ្វើដ្រូនហ្នឹង តែពួកយើងបានបោះបង់ទៅវិញ ដោយសារតែពេលហ្នឹងពួកយើងមានគ្នាតិច ណាមួយអត់ច្បាស់លាស់ទៀត រហូតពួកខ្ញុំបានឡើងដល់ថ្នាក់ទី ៨ ក៏នឹកឃើញគំនិតហ្នឹងដដែលទៀតទើបពួកខ្ញុំរកសមាជិកដើម្បីបង្កើតក្រុមធ្វើការសិក្សាដ្រូនហ្នឹងទៅ»។
ក្រៅពីការដាក់ទុនពេលវេលាស្រាវជ្រាវមេរៀនតាមប្រព័ន្ធអ៊ីនធឺណិតយកមកអនុវត្ត និងជួសជុលក្រោមការណែនាំពីរៀមច្បង ការកែច្នៃដ្រូននេះត្រូវបានចំណាយប្រាក់ជាង ១ លានរៀល និងប្រើរយៈពេលជាង ១ ខែ លើការសិក្សា និងធ្វើតេស្តជាហូរហែ ដើម្បីកែលម្អចំណុចខ្វះខាត។
ដ្រូនកែច្នៃដោយយុវសិស្សអាចហោះហើរបានរយៈពេលប្រមាណ ២០ នាទី។ហេង ជីវ័ន
ទាក់ទិនការកែច្នៃដ្រូននេះយុវសិស្ស មុន្នី គន្ថធុរ បានបញ្ជាក់ថា៖ «ដ្រូនហ្នឹងមិនមែនជាការបង្កើតថ្មីនោះទេគឺជាការកែច្នៃដ្រូនចាស់ដែលបានខូចស្ទើរតែទាំងស្រុងគឺដំបូងឡើយពួកយើងមានគំនិតថាប្រមូលលុយទិញផ្នែកនានានៃដ្រូនមកផ្គុំឡើង តែវាអស់លុយច្រើនពេក ហើយចៃដន្យពួកយើងមានមិត្តភក្តិម្នាក់មានដ្រូនចាស់ដែលខូចហើយពួកយើងក៏បានទិញដ្រូនហ្នឹងពីគាត់តម្លៃ ៩០ ដុល្លារបានពួកយើងចាប់ផ្តើមសិក្សាថា វាខូចអីសិក្សាផ្នែកនីមួយៗនៃដ្រូន និងតួនាទីរបស់វាហើយក៏រកឃើញហើយ យើងក៏ចាប់ធ្វើវាទៅ»។
ដោយមានភាពមមាញឹកក្នុងការសិក្សាតាំងពីព្រឹករហូតដល់រសៀល យុវជនមួយក្រុមតែងតែយកពេលទំនេរនាពេលយប់មកធ្វើការសិក្សាស្រាវជ្រាវ និងថ្ងៃចុងសប្តាហ៍ ពួកគេតែងជួបជុំពិភាក្សាបញ្ចេញគំនិតរៀងៗ ដើម្បីរកដំណោះស្រាយក្នុងការកែច្នៃដ្រូននេះ។
ចន្ទចេស្តា បន្ថែមថាដ្រូនដែលបានយកមកកែច្នៃគឺមានការពិបាកណាស់ដោយសារដ្រូននេះមានចំណុចខូចធំៗរួមមានរូបរាង និងប្រព័ន្ធបច្ចេកទេស។ កង្វះឧបករណ៍ទំនើបក្នុងការកាត់សម្បកដ្រូនតម្រូវឲ្យពួកគេប្រើរណារ ម៉ាស៊ីនកាត់កាត និងស្វានវីសដោយផ្ទាល់ដៃ។ រីឯផ្នែកបច្ចេកទេសវិញ ពួកគេធ្លាប់បានតខ្សែខុសជាច្រើនលើកដែលធ្វើឲ្យកង្ហារដ្រូនរត់មិនត្រូវគ្នា និងជួនកាលគាំងធា្លក់ចុះមកដីក៏មាន។
ក្រោយសម្រេចបានសមិទ្ធផលប្រើការបានយុវសិស្សទាំង ៦ នាក់នេះទទួលបានការកោតសរសើរយ៉ាងខ្លាំងពីក្រុមគ្រួសារ មិត្តភក្ដិ និងបណ្ដាអ្នកប្រើប្រាស់បណ្ដាញសង្គមដែលជាកម្លាំងជំរុញឲ្យពួកគេបន្តផលិតអ្វីដែលថ្មីបន្តទៀត។
មកដល់ពេលនេះក្រុមសិស្សវិទ្យាល័យដដែលកំពុងធ្វើការសិក្សាអំពីការផលិតយន្តហោះមួយប្រភេទដែលហៅថា អាមិចដែលធ្វើអំពី ហ្វាយប៊ឺ តែដោយសារថវិកាមានកំណត់ក្រុមសិស្សច្នៃដ្រូនបានលើកឡើងថា៖ «ពួកយើងធ្វើពីស្នោវិញដែលនេះជាគំនិតច្នៃប្រឌិតមួយទៀតរបស់កូនខ្មែរ»។
ពួកគេក៏អំពាវនាវផងដែរថា៖ «សំណូមពរដល់រដ្ឋាភិបាលក៏ដូចជាសាលានានាគួរតែបង្កើតកន្លែងសិក្សាស្រាវជ្រាវដល់សិស្សានុសិស្សដែលមានបំណងចង់ស្រាវជ្រាវរករបកគំហើញថ្មី និងស្នើឲ្យមានការជួយឧបត្ថម្ភគាំទ្រដល់ស្នាដៃ និងការស្រាវជ្រាវរបស់សិស្សនិស្សិតផងដែរ»៕
