.jpg)
តារាសម្ដែង ស៊ីន យូប៊ីន និងលោក វ៉ៃហាំង។ រូបថត ភ្នំពេញ ប៉ុស្ដិ៍
ភ្នំពេញ៖ ក្រៅពីមានភាពស្និទ្ធស្នាលក្រៅឆាកបណ្តើរគ្នាត្រសងក្នុងកម្មវិធីនានានោះ តារាសម្តែងស្រីរូបស្រស់កញ្ញា ស៊ីន យូប៊ីន និងតារាប្រុសរូបសង្ហាលោក ខាត់ វ៉ៃហាំង នឹងមានឱកាសផ្អែមល្ហែមបន្ថែមទៀតក្នុងការសម្តែងកុនដុំខ្នាតធំរឿង «ប្រមាញ់ប្រវត្តិសាស្រ្ត» របស់ផលិតកម្ម DL ដែលគ្រោងបើកពិធីក្រុងពាលីនៅចុងខែកក្កដា ឆ្នាំ ២០២០ នេះហើយ។
តារាសម្ដែងស្រីដែលមានសំនៀងពីរោះមិនចាញ់តារាចម្រៀងអាជីព កញ្ញា ស៊ីន យូប៊ីន ក៏ទើបតែបានសម្តែងជាតួឯក ចាប់ដៃគូសមឥតខ្ចោះជាមួយនឹងតារាសម្ដែងប្រុសសង្ហា ខាត់ វ៉ៃហាំង ដែលទើបបានបញ្ចប់ការថតរឿងថ្មីឲ្យទូរទស្សន៍ភីអិនអិនក្នុងរឿង «អាថ៌កំបាំងត្រីសូល៍» នាពេលថ្មីៗនេះដែរ។
កញ្ញា ស៊ីន យូប៊ីន ដែលមានភាពមមាញឹកខ្លាំងក្នុងការសម្តែងកុនភាគជាច្រើនបន្តបន្ទាប់ និងមានការអញ្ជើញចូលរួមកម្មវិធីតូចធំជាច្រើនមិនដាច់ដូចគ្នា ជាមួយនឹងតារាប្រុសដៃគូលោក ខាត់ វ៉ៃហាំង ហើយតែងតែបង្កើតរលកព័ត៌មានលេចឮជារឿយៗពីការបង្កាត់ភ្លើងស្នេហ៍ តែអ្នកទាំង ២ ក៏រមែងបដិសេធរឿងនេះផងដែរ។
តារាសម្ដែងរូបស្រស់កញ្ញា ស៊ីន យូប៊ីន។ ហុង មិនា
អារម្មណ៍ពីការចាប់ដៃគ្នាធ្វើតួឯកជាថ្មីរបស់តារាសម្តែងទាំង ២ ភ្នំពេញ ប៉ុស្តិ៍ មិនអាចទទួលបានការបកស្រាយពីកញ្ញា យូប៊ីន និង វ៉ៃហាំង អំពីការបានលាភថ្មីក្នុងការថតរឿង «ប្រមាញ់ប្រវត្តិសាស្រ្ត» របស់ផលិតកម្ម DL ដែលទើបតែបានបង្កើតឡើងថ្មីសន្លាង ហើយមិនទាន់មានស្នាដៃថតកុននោះទេ។
គួរបញ្ជាក់ឲ្យដឹងដែរថារឿង «ប្រមាញ់ប្រវត្តិសាស្រ្ត» នេះត្រូវបានប៉ាន់ប្រមាណថា នឹងមានខ្ទង់ចំណាយជាង ១ លានដុល្លារ លើសម្ភារបុរាណ និងការតុបតែងប្លង់ ពន្លឺ និងបច្ចេកទេស ក្នុងការផលិត ហើយក៏មានបណ្តាក្រុមហ៊ុនមួយចំនួនបានចូលរួមឧបត្ថម្ភក្នុងការផលិតនេះដែរ ទើបផលិតកម្ម DL អាចផលិត និងដំណើរការទៅបានរលូន។
បើតាមលោក ជិន ជ័យណារ៉ា ជាអ្នកនិពន្ធ ដឹកនាំផលិតខ្សែភាពយន្ត និងអ្នកគ្រប់គ្រងការផលិតទូទៅបានឲ្យដឹងថា៖ «រឿងដែលយើងកំពុងតែផលិតនេះ គឺជារឿងបែបសម័យ ដែលនិយាយពីក្រុមបុរាណវិទ្យាមួយក្រុម បានចុះទៅស្រាវជ្រាវនៅតំបន់អង្គរ រួចពួកគេក៏បានមើលឃើញរូបភាពពីអតីតកាលមួយ ដែលផុសចេញពីសិលាចារឹក ឬរូបបដិមា ដែលជាកំណាយបុរេប្រវត្តិ គេបានឃើញចម្បាំង និងរឿងរ៉ាវវប្បធម៌ និងសិល្បៈគ្រប់ទម្រង់ ដែលបានផ្សារភ្ជាប់គ្នា ដើម្បីបង្ហាញអ្នកទស្សនាបានយល់ដឹងពីសិល្បៈគ្រប់ទម្រង់ ហើយតួអង្គសំខាន់ៗនៅក្នុងការថតកុនដុំរឿង «ប្រមាញ់ប្រវត្តិសាស្រ្ត» នេះមានដូចជា លោក ខាត់ វ៉ៃហាំង កញ្ញា ស៊ិន យូប៊ីន លោក លាង ឆេ តារាចម្រៀងប្រុស អាន គុណកូឡា លោក DJ milk លោក អេង លីហ៊ួ និងតារារលកថ្មី ហើយក៏មានក្រុមតន្ត្រីបុរាណ និងរបាំប្រពៃណីជាច្រើនរូបទៀត»៕
