.jpg)
ម្ចាស់ហាងធ្វើស៊ុមរូបថតកំពុងរៀបចំដាក់ស៊ុមគំនូរចាក់អំបោះរបស់អតិថិជននៅផ្លូវ ១៦៣។ ផា លីណា
ភ្នំពេញ: ទោះគ្មានតម្លៃខ្ពស់សម្រាប់ជាចំណែកជួយផ្គត់ផ្គង់ជីវភាពធំដុំយ៉ាងណាក៏ដោយ ក៏ការចាក់រូបគំនូរអំបោះនៅតែជាទម្លាប់ដ៏ជក់ចិត្ដចំពោះស្ដ្រី ដែលស្រឡាញ់នូវរូបភាពស្នាដៃផ្ទាល់ខ្លួនស្អាតៗ ជាមួយភាពអំណត់អត់ធ្មត់ និងមិនធ្វើឲ្យខ្លួនឯងទំនេរឥតប្រយោជន៍។
ក្រោយពីបំពេញការងារនៅតាមក្រុមហ៊ុន រោងចក្រ ការលក់ដូរ កិច្ចការផ្ទះ ចង្ក្រាន ជើងឆ្នាំង ពេលទំនេរបន្ដិចបន្ដួច ស្ដ្រីមួយចំនួនមិនភ្លេចទាញយកក្រណាត់រំលេចពណ៌ចម្រុះមកអង្គុយដោតអំបោះដេរ ១ ម្ជុលម្ដងៗរាប់ពាន់រាប់ម៉ឺនកាយវិការរហូតដល់ទទួលបានសមិទ្ធផលគួរជាទីគាប់ចិត្ដសម្រាប់ដាក់ទាំងក្នុងបន្ទប់ ជូនបងប្អូន និងលក់ដូរបានកម្រៃទ្រនាប់ហោប៉ៅ។
ដោយលើកឡើងពីកំណើតសិល្បៈគំនូរអំបោះក្នុងសង្គមខ្មែរយ៉ាងតិច ១០ ឆ្នាំមុន អ្ន-ស្រី ណៃ គីម អាយុ ២៧ ឆ្នាំ ម្ចាស់ហាង «លក់រូបចាក់ដុំ និងរាយ» លើអនឡាញ អសយដ្ឋានម្ដុំផ្សារគីឡូម៉ែត្រលេខ ៦ ខណ្ឌឫស្សីកែវដែលលក់ក្រណាត់ចាក់រូប ធ្វើឡូហ្គោ រចនារូបថតជារូបចាក់ ឬរូបបិទត្បូង បាននិយាយថា៖ «អ្នកចាក់រូបដូចមានតែស្ដ្រី ចាប់ពីសិស្ស និស្សិត អ្នកធ្វើការនៅការិយាល័យ អ្នកបម្រើការនៅរោងចក្រ អ្នក លក់ដូរ និងស្ដ្រីមេផ្ទះ»។
អ៊ំស្រី ឡេង សុខគង់ ឆ្លៀតចាក់រូបបណ្ដើរអំឡុងពេលលក់ភេសជ្ជៈ។ ផា លីណា
អ្នកស្រី ឡេង សុខគង់ ដែលចំណាយពេលពី ៧ ទៅ ៨ ម៉ោងក្នុង ១ ថ្ងៃ ទទួលលទ្ធផលបាន ២០ ផ្ទាំងលើរយៈពេលជាង ១ ឆ្នាំ បានប្រាប់ថា៖ «អ៊ំទទួលចាក់រូបឲ្យគេ។ រូបធំប្រវែងជាង ២ ម៉ែត្រគុណ ១ ម៉ែត្រជាង អ៊ំយកតែ ៨០ ដុល្លារ និងចំណាយពេលចាក់ដល់ ១ ខែ ២០ ថ្ងៃ។ អាទំហំ ១ ម៉ែត្រគុណ ៦ តឹក បានឈ្នួល ៥០ ដុល្លារ ប្រើពេល ១ ខែ»។
ដោយមានពេលទំនេរច្រើនពីការលក់ភេសជ្ជៈនៅច្រកចូលភ្នំពេញសេនធ័រ តាំងពីព្រលឹមទល់ព្រលប់រហូតដល់យប់ ស្ដ្រី អាយុ ៥៦ ឆ្នាំ រូបនេះ ភ្នែករំពៃមើលតែរូបភាពលើក្រណាត់ ខណៈដៃធ្វើកិច្ចការដោយចិត្ដអំណត់បំផុត។
កំពុងចាក់រូបខ្លាមួយគូ អ៊ំស្រី ប្រាប់ថា៖ «អ៊ំមានពេលអង្គុយចាក់រូបច្រើន។ រូបមួយបាន ៥០ ដុល្លាររយៈពេល ១ ខែ វាគ្មានអ្វីចំណេញទេ។ ប៉ុន្ដែជាជាងទំនេរ ហើយចាក់យូរៗទៅ ជក់ចិត្ដ មិនចង់ឈប់»។
អ្នកស្រី វី រស់នៅក្នុងខណ្ឌឫស្សីកែវ រាជធានីភ្នំពេញ បានឲ្យដឹងថា រយៈពេលជាង ២ ឆ្នាំមកនេះ អ្នកស្រីចំណាយពេលពី ៣ ទៅ ៥ ម៉ោងក្នុង ១ ថ្ងៃ ចាក់រូបបានជិត ២០ ផ្ទាំង។
ក្រោយចាក់រួច គំនូរអំបោះត្រូវយកទៅបោកទឹក និងរំលេចពន្លឺចាំងព្រាកៗ។ ផា លីណា
ស្ដ្រីមេផ្ទះ អាយុ ៣៧ ឆ្នាំ មានរូបតាំងក្នុងផ្ទះ ៣ ផ្ទាំងរូបនេះនិយាយថា៖ «ខ្ញុំចូលចិត្ដ ចេះតែចាក់ៗទៅ។ បើមានគេរកទិញ ខ្ញុំក៏លក់។ ពីមុនរូបធម្មតា [១០០x៦០] តម្លៃ ៧០ ដុល្លារ ឥឡូវបានតែ ៥០ ដុល្លារ មកពីមានគេចាក់ច្រើន»។
អ្នកស្រីណៃ គីម ជាអ្នកជក់ចិត្តនសិល្បៈរូបចាក់ និងបិទត្បូងម្នាក់ឲ្យដឹងពីតម្លៃត្រួសៗថា រូបចាក់ ១១០ x ៦០ សង់ទីម៉ែត្រ តម្លៃ ៨ ដុល្លារ ខណៈទំហំដូចគ្នា ចំពោះរូបចាក់រួច តម្លៃ ៧០ ដុល្លារ។ រូបចាក់រួច ទំហំ ១១០ x ៥៥ សង់ទីម៉ែត្រ តម្លៃ ១២០ ដុល្លារ ឬរូបចាក់រួច ១៥០x៦០ តម្លៃ ៨០ ដុល្លារ។
អ្នកស្រី ណៃ គីម បញ្ជាក់ថា រូបចាក់អំបោះធម្មតា និងរូបបំប្លែងពីរូបថតសុទ្ធតែមានតម្លៃថ្លៃជាងរូបបិទត្បូងចំពោះទំហំប៉ុនៗគ្នា ហើយសម្រាប់ផលិតផលសម្រេច រូបចាក់ដោយអំបោះសុទ្ធគឺថ្លៃខ្ពស់ជាងគេ ទាំងអស់ ពីព្រោះវាត្រូវប្រើ រយៈពេលយូរ៕
