.jpg)
យូរី និងបុរសជាថៅកែហាងផឹកស៊ីមួយ ដែលរងមន្ទិលថា បង្កាត់ភ្លើងស្នេហ៍នឹងគ្នា។ រូបថត ហ្វេសប៊ុក
ភ្នំពេញ៖ ទើបតែរសាយរឿងមន្ទិលពីមហាជនសង្ស័យថា តារាចម្រៀងស្រីសាច់សខ្ចីលើកញ្ញា យូរី និងបុរសសង្ហាល្បីប្រចាំផលិតកម្មសាន់ដេ លោក Bmo Trapz ដែលតែងតែនិពន្ធបទចម្រៀង ជាច្រើនឲ្យនាងច្រៀងនោះសោះ ស្រាប់តែមករងដំណឹងខ្សិបខ្សៀវថា កំពុងបង្កាត់ភ្លើងនឹងបុរសម្នាក់ជាថៅកែហាងមួយ។
បើតាមប្រភពអ្នកស្និទ្ធស្នាលនឹងតារាចម្រៀងស្រីក្នុងសង្គមសិល្បៈបានបង្ហើបឲ្យដឹងថា តារាចម្រៀងម្ចាស់បទ «ចាក់ទឹកដូង» កញ្ញា យូរី មានទំនាក់ទំនងនឹងបុរសម្នាក់មានឈ្មោះ នី ដែលគេស្គាល់ថា ជាថៅកែហាងផឹកស៊ីមួយនាពេលថ្មីៗនេះ អ្នកទាំង ២ ក៏បានមកបដិសេធព្រមៗគ្នាដែរថា៖ «ពួកគេ គ្រាន់តែរាប់អានគ្នាធម្មតាតែប៉ុណ្ណោះ»។
បើតាមប្រភពអ្នកតាមដានជីវិតឯកជនរបស់តារាចម្រៀងស្រីសាច់សខ្ចីកញ្ញា យូរី ព្រលយបែបខ្សិបខ្សៀវថា ពេលថ្មីៗនេះ គេឃើញកញ្ញា យូរី បានជិះរថយន្តទំនើបរបស់លោកថៅកែនោះម៉ាក Landcruiser V8 ពណ៌ខ្មៅ ទៅច្រៀងនៅតាមឆាកប្រគំតន្រ្ដីផ្សេងៗទៅវិញ ដែលនេះគេក៏កត់សម្គាល់ថា ចំណងស្នេហាខុសវ័យ ១ គូ នេះ នៅតែធ្វើឲ្យគេមានការសង្ស័យដដែលថា ទំនាក់ទំនងរវាងកញ្ញា និងថៅកែ នោះពិតជាស្និទ្ធស្នាលខុសពីធម្មតាមែន។
ម្យ៉ាងវិញទៀតទំនាក់ទំនងរវាង យូរី និងលោក នី ក៏កាន់តែត្រូវគេសង្ស័យខ្លាំង ដោយសារមានឃើញអ្នកទាំង ២ ធ្លាប់ជិះរថយន្ដជាមួយគ្នាកាលពីរាត្រីថ្ងៃទី ៩ ខែ មករា ក្នុងឆ្នាំ ២០២០ កន្លងមក ដើម្បីទៅចូលរួមពិធីឡើងផ្ទះថ្មីរបស់ នាយ ចឺម នៅឯខេត្តកំពង់ស្ពឺ មានចម្ងាយប្រមាណ ៧០ គីឡូម៉ែត្រចេញពីភ្នំពេញនោះ។
តែអ្នកទាំង ២ ក៏ធ្លាប់ច្រានចោលដំណឹងដ៏រសើបនេះដែរ ខណៈពេលនោះបុរសជាថៅកែហាងឈ្មោះ នី បានបកស្រាយថា លោក រាប់អានកញ្ញា យូរី ដូចជាប្អូនស្រីអ៊ីចឹង ហើយលោកបញ្ជាក់ថា មិនដែលជិះរថយន្ត ២ នាក់ នឹងកញ្ញា យូរី នោះឡើយ គឺមានតែជិះរថយន្ដមានគ្នាច្រើនម្តង។
ដោយឡែកបើតាមការសង្កេតមួយទៀតរបស់មហាជន ឃើញថាក្រោយពើបប្រទះនឹងរឿងបង្កាត់ភ្លើងស្នេហ៍ជាមួយថៅកែហាងនោះកញ្ញា យូរី ក៏ចេញបទថ្មីដែលមានចំណងជើងថា «ស្នេហ៍ប្រុសចាស់» និងបទ «ធំម៉េស» ជាដើម ដែលក្បាច់រាំរបស់នាងកាន់តែសាហាវ និងរស់រវើកជាងមុន ធ្វើឲ្យអ្នកទស្សនាកាន់តែក្នាញ់នាងថែមទៀតផង ហើយមួយរយៈពេលចុងក្រោយនេះ គេមិនបានឃើញកញ្ញា យូរី ទៅចាប់ដៃគូច្រៀងជាមួយលោក ប៊ីម៉ូ ដូចមុនទៀតក្រោយពីរងមន្ទិលរឿងស្នេហាដែរ។ មហាជនក៏ចាំមើលថា តើ យូរី និងថៅកែហាងពិតជាធម្មតាៗមែន ឬក៏មិនធម្មតា៕
