.jpg)
សាស្ត្រាចារ្យអក្សរសាស្ត្រខ្មែរ យូ សុភា ត្រូវបានគេស្គាល់តាមរយៈស្នាដៃប្រលោមលោកល្បីៗ។ រូបថត Yousos Apdoulrashim
ភ្នំពេញៈ អ្នកនិពន្ធល្បីឈ្មោះមួយរូប និងជាម្ចាស់ពានរង្វាន់ជាង ១០ ស្នាដៃសាស្ត្រចារ្យអក្សរសាស្ត្រខ្មែរលោក យូ សុភា ត្រូវបានគេទទួលស្គាល់ថា ជាអ្នកនិពន្ធខ្មែរមួយរូបដែលទទួលបានពានរង្វាន់ច្រើនជាងគេនៅក្នុងប្រទេសកម្ពុជា។
ជាមួយជំនាញនិពន្ធជាង ២០ ឆ្នាំសាស្ត្រចារ្យអក្សរសាស្ត្រខ្មែររូបនេះបានប្រាប់ ភ្នំពេញ ប៉ុស្តិ៍ ថា៖ «ខ្ញុំមើលឃើញថាចំនួនអ្នកនិពន្ធកម្ពុជាបច្ចុប្បន្នគឺមានការកើនឡើងច្រើនបើនិយាយពីការបោះពុម្ពជាសៀវភៅគឺមានតិចតួច ប៉ុន្តែបើនិយាយពីកម្រិតនៃការតែងនិពន្ធបង្ហាញតាមហ្វេសប៊ុក ឬតាមអនឡាញអីផ្សេងៗទៀតមានការកើនឡើង ដោយសារតែបើទោះបីជាយុវជនទាំងនោះគាត់អត់មានធនធានក្នុងការបោះពុម្ពតែគាត់អាចយកស្នាដៃរបស់គាត់ បង្ហោះលើប្រព័ន្ធផ្សព្វផ្សាយបាន»។
លោកក៏សម្គាល់ដែរថា៖ «ចំពោះគុណភាព យើងអាចនិយាយបានថាមានបរិមាណច្រើនប៉ុន្តែគុណភាពគឺនៅមានកម្រិតផងដែរក្នុងនោះក៏មានគេអ្នកល្អៗច្រើនក៏នៅមានអ្នកមធ្យម និងអ្នកខ្វះខាតតែបើតម្រូវឲ្យមានគុណភាពខ្ពស់យើងមិនទាន់អាចឆ្លើយតបបានទេ»។
លោក យូ សុភា ជាអ្នកនិពន្ធទទួលបានរង្វាន់ច្រើន។ រូបថត Yousos Apdoulrashim
យ៉ាងណាមិញម្ចាស់ពានរង្វាន់ជាង ១០ ស្នាដៃរូបនេះជំរុញឲ្យអ្នកនិពន្ធវ័យក្មេងកម្ពុជាបញ្ចេញស្នាដៃរបស់ខ្លួនឲ្យបានច្រើន បើទោះបីជានៅមានកម្រិតក៏ដោយ និងចូលរួមក្នុងការប្រកួតប្រជែងតែងនិពន្ធនានាព្រោះថាការចូលរួមប្រកួតអាចពង្រឹងសមត្ថភាពក្នុងការសរសេររបស់អ្នកនិពន្ធ និងធ្វើឲ្យមហាជនទទួលស្គាល់ផង។
សាស្ត្រាចារ្យរូបនេះបន្តថាប្រសិនបើអ្នកនិពន្ធមិនបានចូលរួមប្រកួតប្រជែងនោះទេ អ្នកនិពន្ធគួរតែបោះពុម្ពផ្សាយស្នាដៃរបស់យើង ឬផ្សាយស្នាដៃរបស់ខ្លួននៅកន្លែងណាមួយដើម្បីឲ្យគេទទួលស្គាល់នឹងមានឈ្មោះជាអ្នកនិពន្ធ តែបើអ្នកនិពន្ធមិនបញ្ចេញស្នាដៃទេនោះមិនអាចហៅថាអ្នកនិពន្ធឡើយ។
អ្នកនិពន្ធ យូ សុភា ក៏បានប្រាប់ពីគន្លឹះក្នុងការតែងនិពន្ធរឿងឲ្យមានគុណភាពថា៖ «គឺអ្នកនិពន្ធត្រូវគិតទៅដល់ខ្លឹមសាររបស់រឿងគំនិតអប់រំ និងត្រូវមានលក្ខណៈកម្សាន្តផ្តល់ចំណេះដឹងឲ្យអ្នកអាន។ នៅពេលដែលមើលរឿងយើងចប់គេទទួលបានចំណេះដឹងហើយបន្ទាប់មកទៀតគេអាចយកខ្លឹមសាររឿងហ្នឹងយកទៅអនុវត្តបាននៅក្នុងជីវភាពរស់នៅប្រចាំថ្ងៃឲ្យកាន់តែប្រសើរ។ នៅចុងក្រោយគឺអាចធ្វើឲ្យគេផ្លាស់ប្តូរឥវិយាបថបានគេផ្លាស់ប្តូរពីអត្តចរិតមិនល្អមកជាល្អវិញ ហើយគេអាចយកគំនិតរបស់យើងយកទៅអភិវឌ្ឍសង្គមជាតិឲ្យផ្លាស់ប្តូរមានការរីកចម្រើន អ៊ីចឹងទើបរឿងរបស់យើងមានខ្លឹមសារ និងគេមើលទៅហើយគឺមិនអត់ប្រយោជន៍»។
គួរបញ្ជាក់ថាលោក យូ សុភា ចាប់ផ្ដើមក្លាយជាអ្នកនិពន្ធរឿងប្រលោមលោកនៅក្នុងឆ្នាំ ២០០០ ដោយស្នាដៃល្បីៗរួមមានរឿងកញ្ញាម្ទេសខ្មាំង រឿងរាជកញ្ញា រឿងបើបេះដូងជាប់ឈាម រឿងបងជាស្វាមីក្រៅបេះដូង រឿងជាកំណប់ស្នេហ៍អូនថែជូនបង រឿងសច្ចៈសីលគុណ រឿងកុំផ្តាច់និស្ស័យកុំប្រល័យស្នេហ៍បង រឿងទុកបរិញ្ញាបត្រឲ្យមេឃមើល រឿងស្ពានកោះពេជ្រផ្តាច់ស្នេហ៍ រឿងព្រលឹងខ្មោចស្រីបំបែកក្តីឃាតកម្ម រឿងស្អប់អូនចុះបើបងដឹង និងរឿងខ្លីៗជាច្រើនចុះផ្សាយតាមទស្សនាវដ្ដីនានា៕
