ភ្នំពេញ៖ ការហាត់យោគៈជាមួយសម្លាញ់ជើង ៤ ដុះរោមពេញខ្លួន គឺជាទិដ្ឋភាពដ៏កម្រនៅប្រទេសកម្ពុជា ហើយនេះអាចជាលើកទី១ នៅកម្ពុជាដែលអ្នកនាង ចចជា ម័រហ្វី (Georgia Murphy) ម្ចាស់ហាងកាហ្វេ Ministry of Cat នៅរាជធានីភ្នំពេញ បានរៀបចំកម្មវិធីហាត់យោគៈជាមួយសត្វឆ្មានៅហាងកាហ្វេ។
ស្ត្រីជនជាតិអូស្ត្រាលីវ័យ ៣២ ឆ្នាំរូបនេះបានឱ្យដឹងដែរថា៖ «ពួកយើងមានគំនិតបង្កើតកម្មវិធីនេះឡើង ព្រោះវាជារបស់ ២ យ៉ាងដែលយើងស្រឡាញ់ទាំងយោគៈ និងសត្វឆ្មា ហើយក៏ជាឱកាស ដើម្បីឱ្យមនុស្សបានស្គាល់ពីសត្វឆ្មាដ៏គួរឱ្យស្រឡាញ់របស់យើងផងដែរ»។
នេះជាឱកាសដ៏ល្អសម្រាប់អ្នក ដែលស្រឡាញ់សុខភាព និងចង់ធ្វើលំហាត់ប្រាណជាមួយសម្លាញ់ឆ្មា។
អ្នកនាង ចចជា បានបន្តទៀតថា៖ «ពួកយើងបានឃើញថា យោគៈជាមួយសត្វឆ្មានៅបណ្ដាប្រទេសផ្សេងៗបានពង្រឹងចំណងមិត្តភាពរវាងមនុស្ស និងឆ្មា។ ដូច្នេះយើងគិតថាវាអាចជួយឱ្យអតិថិជនដែលចូលរួមជាមួយពួកយើង មានចិត្តក្នុងការចង់យកវាទៅចិញ្ចឹម»។
ស្នាក់អាស្រ័យនៅកម្ពុជាជាង ៥ ឆ្នាំមកនេះ អ្នកនាង ចចជា និងសហស្ថាបនិកហាងកាហ្វេម្នាក់ទៀត បានបង្កើតហាង Ministry of Cat តែវាមិនមែនគ្រាន់តែជាហាងកាហ្វេធម្មតា តែវាជាផ្ទះសម្រាប់ជួយសង្គ្រោះសត្វឆ្មាអនាថា ដោយមានការចូលរួមសហការជាមួយអង្គការជួយសង្គ្រោះសត្វនៅកម្ពុជា (Animal Rescue Cambodia)។
អ្នកនាងបានបញ្ជាក់ថា បើសិនជាកម្មវិធីហាត់យោគៈជាមួយសត្វឆ្មាលើកទី១ នេះជោគជ័យ អ្នកនាងនឹងដាក់កម្មវិធីអនុវត្តប្រចាំ។
ម្ចាស់ហាងកាហ្វេរូបនេះក៏នឹងមានគម្រោងសម្រាប់ការបង្កើតយោគៈឆ្មាជាមួយក្មេងតូចៗផងដែរ។
អ្នកនាង ចចជា បាននិយាយថា៖ «យើងគិតថាវានឹងជាឱកាសដ៏ល្អដែលអាចឱ្យក្មេងៗទាក់ទងជាមួយសត្វនៅក្នុងការហាត់យោគៈបានយ៉ាងធូរស្រាល»។
ជាលំហាត់ប្រាណសម្រួលចលនារាងកាយ ផ្លូវដង្ហើម និងផ្លូវចិត្តដ៏មានអាយុកាលរាប់សិបសតវត្សរ៍ យោគៈបានសាយភាយមែកធាងជាប្រភេទប្លែកពីគ្នាដូចជា យោគៈអង្រឹង យោគៈក្នុងទឹក យោគៈបែបកាយសម្ព័ន្ធ និងយោគៈហាត់ជាមួយសត្វ។
យោគៈហាត់ជាមួយសត្វរួមមាន ឆ្កែ ឆ្មា និងពពែទទួលបានប្រជាប្រិយភាពច្រើន ជាពិសេសក្នុងចំណោមអ្នកស្រឡាញ់សត្វចិញ្ចឹម។
សម្រាប់លំហាត់ប្រាណយោគៈនៅ Ministry of Cat នេះ អ្នកគ្រូបង្វឹកយោគៈ Mytro ពី Surya Rooftop Yoga Studio នឹងបង្ហាញក្បាច់ហាត់ដល់អ្នកចូលរួមដោយកំណត់ត្រឹមតែ ៨ នាក់ប៉ុណ្ណោះ ហើយក្នុងនោះមានការកក់ទុក ៤ កន្លែងរួចទៅហើយ។
តម្លៃហាត់យោគៈជាមួយឆ្មាម្នាក់ ១០ ដុល្លារ។ អ្នកចូលរួមទាំងអស់ត្រូវយកកម្រាលហាត់មករៀងៗខ្លួន។
ឆ្មាចិញ្ចឹមនៅក្នុងហាង និងឆ្មាដែលគេយកមកផ្ញើនៅហាង គឺអាចចូលរួមបានក្នុងលំហាត់យោគៈជាមួយគ្នា។
អ្នកនាង ចចជា ក៏បានឱ្យដឹងដែរថា៖ «ការធ្វើលំហាត់ប្រាណជាមួយឆ្មាវានឹងមានភាពរីករាយដែលឥតព្រាងទុកជាច្រើនពីព្រោះឆ្មាត្រូវបានស្គាល់ថាជាសត្វឯករាជ្យ ពូកែលេង និងរួសរាយ។ សម្រាប់យោគៈនឹងមានលក្ខណៈបែបទន់ភ្លន់ ជាមួយនឹងការពត់ពេនខ្លួនធ្វើឱ្យអារម្មណ៍ ចិត្តគំនិត និងរាងកាយបានស្ងប់ស្ងាត់»។
អ្នកនាងបន្តថា៖ «ក្រៅពីវាជាយោគៈដែលនាំមកនូវភាពរីករាយ និងស្រស់ស្រាយ យោគៈផ្ទាល់បានជួយសម្រួលដល់ការធ្វើចលនាបត់បែននៃរាងកាយបានយ៉ាងល្អប្រសើរជាមួយ នឹងសត្វឆ្មាជាទីស្រឡាញ់ដែលអ្នកចូលរួមអាចរំពឹងទុក»។
យោគៈហាត់ជាមួយឆ្មា នឹងធ្វើឡើងនៅថ្ងៃអាទិត្យ ទី ១០ ខែមករា ពីម៉ោង ៩ ទៅម៉ោង ១០ ព្រឹក។ ព័ត៌មានបន្ថែមសូមចូលទៅកាន់ទំព័រហ្វេសប៊ុក @ministryofcat៕