ភ្នំពេញ: បើទម្រង់សិល្បៈសៀកគួរឲ្យទាក់ចិត្ដ ហើយការដាំដូងមិនធ្វើឲ្យអ្នកវិលមុខក្រឡាប់ផ្កាប់ផ្ងារ អ៊ីចឹង កីឡាយោគៈលើអាកាសប្រាកដជាស័ក្ដិសមចំពោះអ្នកចូលចិត្ដហាត់ប្រាណដើម្បីសុខភាពរាងកាយ និងការកម្ចាត់ស្ដ្រេស។
មិនថា ធ្លាប់ ឬមិនធ្លាប់ហាត់យោគៈ សិល្បៈកីឡាយោគៈលើអាកាសទំនងជារាងចម្លែកបន្ដិច។ ប៉ុន្ដែកុំបារម្ភ កីឡាលើអាកាស មិនមែនមានន័យថា អ្នកត្រូវយោលក្រឡាប់ខ្លួនលើអាកាសដូចសៀកនោះទេ។
ផ្ទុយទៅវិញ រាងកាយអ្នកត្រូវបានទ្រដោយក្រណាត់អង្រឹងទន់ ផុតពីដី ដើម្បីរាងកាយបង្កើតចលនាកាន់តែបត់បែន។ ជំនួយដោយការធ្វើលំហាត់ប្រាណលើកម្រាល អ្នកលេងកីឡាយោគៈអង្រឹងត្រូវរុំខ្លួនក្នុងក្រណាត់អង្រឹងយោលស្ដោកពីលើពិតាន ដែលមានលក្ខណៈស្រដៀងនឹងសិល្បៈលើអាកាស Cirque du Soleil ផងដែរ។
នៅស្ទូឌីយោ Aerial BhaVana អ្នកនាង សេង បុប្ផា កំពុងតោងក្រណាត់អង្រឹងនីឡុងយោលខ្លួនដាំដូងក្បែរពិតាន ក្រោមក្រសែភ្នែកសិស្សជាច្រើនត្របាញ់មើលយ៉ាងយកចិត្ដទុកដាក់ទាំងសភាពបុកពោះ។
អ្នកនាង សេង បុប្ផា ស្ថាបនិកស្ទូឌីយូ Aerial BhaVana ដែលទើបបើកសម្ពោធ ៤ ខែមុនបាននិយាយថា ដោយមានប្រវត្ដិពីក្រុមសៀកបារាំងនៅកាណាដា កីឡាអាកាស ឬយោគៈអង្រឹងមានមូលដ្ឋានគ្រឹះចេញពីប្រភេទកីឡាចំនួន ៣ គឺ សិល្បៈសៀកលើអាកាសសិល្បៈពត់ពេនខ្លួន និងយោគៈ ដើម្បីបង្កើតជាសមត្ថភាពពត់រាងកាយធ្វើលំនឹងបន់បែននិងធ្វើឲ្យយឺតសរសៃសសូង។
យោគៈអង្រឹងត្រូវបានចាត់ទុកជាលំហាត់ប្រាណរាងកាយ និងផ្លូវចិត្ដ សម្រាប់អ្នកដែលប្រាថ្នាការសប្បាយគួបផ្សំនឹងសកម្មភាពលំហាត់ប្រាណ។
អ្នកនាងបានឲ្យដឹងថា៖ «យោគៈអង្រឹងក៏ជាផ្នែកមួយដែរ។ ប៉ុន្ដែអ្វីដែលខ្ញុំបង្រៀន និងចែកចាយនោះ វាបូកផ្សំនឹងយោគៈ pilates និងរបាំ។ អ៊ីចឹង ខ្ញុំចង់ហៅថា កីឡាលើអាកាសច្រើនជាង ពីព្រោះយើងមានឧបករណ៍ច្រើន និងគ្រឿងផ្សំច្រើន។ អង្រឹងគ្រាន់តែជាឧបករណ៍មួយ ដែលងាយស្រួលជាងគេ នៅមានកង និងខ្សែ ព្រមទាំង ឧបករណ៍ចងលើអាកាសទាំងអស់»។
ចំពោះអ្នកហ្វឹកហាត់ថ្មោងថ្មីអង្រឹងត្រូវបានចងទ្រត្រគាកទាបៗ ដើម្បីបញ្ចៀសឧប្បត្ដិហេតុផ្សេងៗកើតឡើងលើ អ្នកកីឡាចំណូលថ្មីនេះ។ ប៉ុន្ដែសម្រាប់អ្នកហ្វឹកហាត់ជំនាញខ្សែត្រូវបានចងខ្ពស់ ដែលហាក់បីដូចជាការសម្ដែងសៀកលើអាកាសដូច្នោះដែរ។
គ្រូបង្វឹកយោគៈអង្រឹងដែលមានបទពិសោធហ្វឹកហាត់ ៨ ឆ្នាំ និងបង្រៀន ៤ ឆ្នាំ អ្នកនាង បុប្ផា បានប្រាប់ថា៖ «ដោយសារប្រជាជនខ្មែរយើងខ្លះធ្លាប់ហាត់យោគៈខ្លះធ្លាប់រត់ ខ្លះធ្លាប់ហែលទឹក ខ្លះរាំ និងខ្លះទៀតទៅ gym ពួកគេផ្ដើមពីថ្នាក់ដំបូង»។
មិនខុសពីយោគៈលើកម្រាល ដែលផ្ដល់អត្ថប្រយោជន៍ចំពោះអារម្មណ៍ស្ងប់ សមាធិ ស្គាល់ពីវិធីធ្វើចលនាដង្ហើម ពត់ពេន និងពន្យឺតរាងកាយ យោគៈអង្រឹងទន់ភ្លន់ តែទាមទារកាយសម្បទារឹងមាំ។
អ្នកនាង សេង បុប្ផា បានលើកហេតុផលជាក់ស្ដែងថា៖ «នរណាក៏ដោយក៏អាចលេងយោគៈអង្រឹងបានដែរ តែទាមទារកាយសម្បទា និងការព្យាយាមបន្ដិច។ ខ្ញុំឃើញគ្រូយោគៈមួយចំនួនឡើងអត់រួច។ ដូច្នេះហើយ សម្រាប់ខ្ញុំគិតថា យើងមិនគួរហាត់ប្រភេទកីឡាអ្វីតែម្យ៉ាងនោះទេ យើងត្រូវមានការគួបផ្សំគ្នា ពីព្រោះយើងគួរពត់សាច់ដុំទៅតាមគ្រប់រូបភាព»។
ឆ្លើយតបនឹងចម្ងល់ថា ស្ដ្រីភាគច្រើន ជាភេទទន់ខ្សោយ មិនមានកម្លាំងតោងឡើងខ្សែ និងយោលដាំដូង ម្ចាស់ស្ទូឌីយោរូបនេះ បានបកស្រាយថា៖ «ខ្ញុំក៏ជាស្ដ្រីដែរ ចុះហេតុអ្វីខ្ញុំមានកម្លាំងដៃលើកខ្លួន គឺទាមទារការហ្វឹកហាត់។ បើយើងអត់លត់ដំខ្លួន យើងនៅតែអត់មានកម្លាំង។ ស្ដ្រីភាគច្រើនអត់មានកម្លាំងផ្នែកខាងលើដូចមនុស្សប្រុសនោះទេ។ ដូច្នេះស្ដ្រីទាមទារការព្យាយាមខ្លាំង។ ប៉ុន្ដែចំពោះសកម្មភាពកន្ធែកជើង ស្ដ្រីមានភាពងាយស្រួលជាងបុរស»។
យោងតាមរបាយការណ៍ស្ដីពីអត្ថប្រយោជន៍ចំពោះកីឡាលើអាកាសពីស្ទូឌីយោ Aerial BhaVana បានបង្ហាញថា វាជួយបង្កើនសមត្ថភាពសាច់ដុំរាងកាយខាងលើពង្រឹងសមត្ថភាពកន្ដ្រាក់សាច់ដុំអាចបង្កើនលទ្ធភាពហ្វឹកហាត់យោគៈកាន់តែយូរបង្កើនតុល្យភាព ជួយសម្រួលសរសៃឆ្អឹងខ្នង ឆ្អឹងក បង្កើនលំហូរអុកស៊ីហ្ស៊ែនក្នុងសរសៃឈាមជួយគ្រប់គ្រងទម្ងន់រាងកាយបង្កើនសមត្ថភាពពត់ពេនខ្លួន និងសមាធិផ្លូវអារម្មណ៍ផងដែរ។
ជាមួយនឹងបទពិសោធយោគៈអង្រឹង ឬកីឡាលើអាកាស អ្នកនាង បុប្ផា បានលើកឡើងថា៖ «អ្វីដែលជក់ចិត្ដបំផុតនោះគឺ ការសមាធិ។ ពេលយើងសំកាំងខ្លួនផុតពីដីវាធ្វើឲ្យយើងបណ្ដែតអារម្មណ៍ ជាពិសេស ពេលយើងដាំដូងដោយយកជើងថ្ពក់តោងខ្សែអង្រឹងអារម្មណ៍វិលវល់លែងដឹងទិសតំបន់ ដោយគ្មានគិតអ្វីក្រៅពីការតាំងចិត្ដឲ្យស្ងប់នោះទេ។ អ្វីដែលសំខាន់ ១ ទៀតគឺការរក្សាទម្ងន់រាងកាយ និងភាពស្រស់ស្រាយ»។
យ៉ាងណាមិញ គ្រូកីឡាលើអាកាសរូបនេះ ក៏បានណែនាំឲ្យអ្នកចូលរួមទាំងអស់លេងកីឡាប្រភេទផ្សេងៗ ដើម្បីសុខភាពរាងកាយកាន់តែប្រសើរ ដូចជា ប្រភេទកីឡា យោគៈ ហែលទឹក រត់ ឡើងភ្នំ ឬជិះកង់ជាដើម។
អ្នកនាងបញ្ជាក់ថា៖ «ពីមួយកម្រិតទៅមួយកម្រិតអ្នកចូល-រួមត្រូវបញ្ចប់វគ្គសិក្សាពី ១ ទៅ ១០ ដង ដោយយោងទៅតាមសមត្ថភាពជាក់ស្តែងរបស់បុគ្គលនីមួយ»។
ការហ្វឹកហាត់លើកម្រាល ១០ ដុល្លារ ក្នុងមួយវគ្គរយៈពេល ១ ម៉ោង ខណៈការសិក្សាលើអាកាសមានតម្លៃ ១៥ ដុល្លារក្នុងមួយវគ្គ។ សម្រាប់ ១០ ដង ដែលមានសុពលភាព ២ ខែ មានតម្លៃ ៨៩ ដុល្លារ លើកម្រាល និង ១៣៩ ដុល្លារ លើអង្រឹងហោះ។
ស្ទូឌីយោ Aerial BhaVana ស្ថិតនៅជាប់ទី ៤ នៃអាផាតមិន Bhumi Emerald ផ្ទះលេខ ៧៣ ផ្លូវ ៤៤៤ សង្កាត់ទួលទំពូង ២ ខណ្ឌចំការមន។ ទាក់ទងតាមរយៈទូរស័ព្ទលេខ ០៩២ ៨០ ៥៩ ១៧៕