.jpg)
លោក យ៉ែម សំអូន ប្រកាសបើកមូលនិធិជួយអ្នកនាង ស៊ិន ឧត្តមផល្លា ដែលកំពុងព្យាបាលជំងឺមហារីក។ ហ្វេសប៊ុក
ភ្នំពេញ៖ ដោយសារយល់ច្បាស់អំពីអារម្មណ៍បែកបាក់គ្រួសារ និងមានភាពតក់ស្លុត សង្វេគខ្លាំង ក្រោយពីដឹងដំណឹងថា តារាសម្តែង និងចម្រៀង អ្នកនាង ស៊ិន ឧត្តមផល្លា កំពុងតែរស់នៅជាមួយនឹងជំងឺមហារីកកាចសាហាវក្នុងដំណាក់កាលចុងក្រោយនោះ លោក យ៉ែម សំអូន ដាច់ចិត្តបង្ហោះវីដេអូមួយទាំងកណ្តាលអធ្រាត្រ ជាឆន្ទ:បង្កើតមូលនិធិមួយ ដើម្បីរកប្រាក់សប្បុរសធម៌ពីសប្បុរសជនជាមិត្តអ្នកសិល្បៈជួយឧបត្ថម្ភតាមលទ្ធភាព។
លោក យ៉ែម សំអូន តារាសម្តែង និងចម្រៀងប្រុស ដែលមានឈ្មោះបោះសំឡេងនាទសវត្សរ៍ឆ្នាំ ១៩៩០-២០០០ ក៏បានបង្ហោះវីដេអូមួយមានរយៈពេលប្រមាណជា ៥ នាទី ទាំងកណ្តាលអធ្រាត្រ ក្នុងអារម្មណ៍សោកសង្រេងមែនទែន ផ្តើមចេញដោយពាក្យពេចន៍សុំខន្តី អភ័យទោសទុកជាមុន ព្រោះលោកគិតថាមិនសមគួរណាមកអំពាវនាវ រៃប្រាក់ជំនួយក្នុងកាលៈទេសៈ កំពុងតែមានវិបត្តិកូវីដ១៩នេះឡើយ តែដោយសារភាពចាំបាច់ខ្លាំងទើបសម្រេចធ្វើបែបនេះ។ លោក យ៉ែម សំអូន គ្រាន់តែចង់ធ្វើការអំពាវនាវទៅដល់មិត្តរួមអាជីពសិល្បៈ ជាក្រុមសិល្បករ-សិល្បការិនី តន្ត្រីករ និងក្រុមការងារ ដែលធ្លាប់បំពេញការងារ នៅក្នុងក្រុមតន្ត្រីសម័យរបស់ Dara Entertainment លោកជាពិសេសតែម្តង សូមឱ្យជួយឧបត្ថម្ភតាមលទ្ធភាព ដើម្បីផ្តល់ជាកម្លាំងចិត្តជួយសម្រួលថ្លៃព្យាបាលដល់អ្នកនាង ស៊ិន ឧត្តមផល្លា កំពុងតែសម្រាកព្យាបាលជំងឺមហារីកកូនកណ្តុរនៅដំណាក់កាលចុងក្រោយ នៅឯមន្ទីរពេទ្យ។
តារាចម្រៀងលោក យ៉ែម សំអូន និងអ្នកនាង ស៊ិន ឧត្តមផល្លា។ ហ្វេសប៊ុក
លោក សំអូន បានស្នើសុំដោយទទូចថា៖ «ខ្ញុំបាទ យ៉ែម សំអូន សូមខន្តីអភ័យទោស និងសុំសំណូមពរតែក្រុមសមាជិកនៃក្រុមអ្នកសិល្បៈនៃក្រុម Dara Entertainment ប៉ុណ្ណោះ។ ខ្ញុំពិតជា តក់ស្លុតខ្លាំងណាស់ ដោយបានដឹងឮថាប្អូន ស៊ិន ឧត្តមផល្លា កំពុងតែមានជំងឺមហារីកដំណាក់កាលចុងក្រោយនោះ។ ហើយបងប្អូនក្រុមសិល្បករ-សិល្បការិនី ពិតជាមានភាពជ្រួលច្របល់ខ្លាំងណាស់ គឺចង់ទៅជួបសួរទុក្ខប្អូន តែដោយសារកាល:ទេស:នេះស្ថិតក្នុងវិបត្តិនៃការបិទខ្ទប់តំបន់ទីក្រុង ដើម្បីការពារ និងទប់ស្កាត់ការឆ្លងជំងឺកូវីដ១៩ ទើបមិនអាចឱ្យចេញក្រៅទៅជួបប្អូនបាន។ ដូច្នេះខ្ញុំ យ៉ែម សំអូន សម្រេចបង្កើតមូលនិធិនេះឡើង ហើយក៏សំណូមពរទៅដល់បងប្អូនមិត្តសិល្បករ មេត្តាចូលរួមជួយបន្តិចបន្តួចតាមលទ្ធភាពជាការលើកទឹកចិត្ត ព្រោះថាការលើកទឹកចិត្តពេលខ្លះ ក៏អាចជាឱសថមួយជួយព្យាបាលអ្នកជំងឺដូចជាដាក់ថ្នាំត្រូវអ៊ីចឹងដែរ ដោយខ្ញុំបាទចូលរួម ១០០ ដុល្លារ។ ហើយប្រសិនបើ បងប្អូនចូលរួមតាមរយៈខ្ញុំបាទក៏បាន ដោយខ្ញុំក៏មានដាក់នូវគណនី ABA និងតាមវីងក៏បាន»។
គួរបញ្ជាក់ដែរថា តារាស្រីវ័យ ៤១ ឆ្នាំ ស៊ិន ឧត្តមផល្លា កាលពីពេលថ្មីៗកន្លងមកនេះ បានសម្រេចចិត្តបង្ហោះសំណេរបរិយាយដំណឹងអកុសលស្ដីអំពីសុខភាពរបស់អ្នកនាងយ៉ាងដូច្នេះថា៖ «បងប្អូនតែងតែខមមិន (comment) សួរខ្ញុំថាតើខ្ញុំកើតអីមែនទេ? ឥឡូវនេះ ខ្ញុំសម្រេចថា បង្ហាញការពិតហើយ គឺខ្ញុំកំពុងតែរស់នៅជាមួយជំងឺមហារីកដំណាក់កាលចុងក្រោយ»។
តារាចម្រៀងពូកែច្រៀងបទបរទេសអ្នកនាង ស៊ិន ឧត្តមផល្លា ធ្លាប់នៅក្នុងក្រុម Dara Entertainment។ ហ្វេសប៊ុក
ខណៈសុខភាពរួមរឹតដោយជំងឺកាចសាហាវ តារាសម្ដែង និងចម្រៀងស្រីមេម៉ាយកូន ៣ រូបនេះក៏បានលាតត្រដាងពីក្ដីរំពឹងអំពីអនាគតនៃមនុស្សជាទីស្រឡាញ់របស់ខ្លួនថា៖ «ក្នុងចិត្តខ្ញុំគ្រាន់តែចង់ឃើញកូនៗខ្ញុំមានប្ដីមានប្រពន្ធរួចហើយ ចាំយកខ្ញុំទៅពេលណាក៏បានដែរ»។
បងប្អូនជនសប្បុរស ទោះបីជាមិត្តសិល្បៈរួមអាជីពក្តី ឬសប្បុរសជនក្រៅសិល្បៈក្តី ប្រសិនបើចង់ចូលរួមបរិច្ចាគប្រាក់មូលនិធិក្រុមតន្ត្រីសម័យ យ៉ែម សំអូន សម្រាប់ជួយថ្លៃព្យាបាលអ្នកនាង ស៊ិន ឧត្តមផល្លា នោះអាចវេរប្រាក់តាមគណនី ABA 000 812 899-YEM SAMONN ឬផ្ញើតាមវីងជាមួយលេខទូរស័ព្ទ 012 237 056 /070 493 176៕
អ្នកនាង ស៊ិន ឧត្តមផល្លា ជាតារាចម្រៀង និងសម្ដែងរូបស្រស់ដែលកំពុងព្យាបាលជំងឺមហារីកដំណាក់កាលចុងក្រោយ។ ហ្វេសប៊ុក
អ្នកនាង ស៊ិន ឧត្តមផល្លា និងមិត្តរួមអាជីពសិល្បៈក្នុងក្រុម Dara Entertainment។ ហ្វេសប៊ុក
