ភ្នំពេញៈ បង្កការភ្ញាក់ផ្អើលសាជាថ្មី នៅពេលឃើញរូបថតមួយសន្លឹកបែបស៊ីអារម្មណ៍លើសពីសិចស៊ី ដែលតារាម៉ូដែល តារាសម្តែង និងជាពិធីការិនីទូរទស្សន៍ប៉ុស្តិ៍លេខ ៥ កញ្ញា យ៉ែម ស្រីពេជ្រ បង្ហោះតាមអ៊ីនស្តាក្រាមនោះក៏ធ្វើឲ្យមហាជនគិតសង្ស័យថា ជាឈុតឆាកសម្តែងនៃគូស្នេហ៍ដ៏ផ្អែមល្ហែមមួយក្នុងរឿង ហើយអាចមានសម្តែងអាក្រាតល្វែងលើទៀតផង។
ពេលបង្ហោះរូបហើយ ដោយខ្លាចមហាជនច្រឡំនោះ តារាម៉ូដែល និងពិធីការិនីសម្បុរស្រអែមស្រស់កញ្ញា យ៉ែម ស្រីពេជ្រ ដែលបច្ចុប្បន្នប្រែខ្លួនក្លាយមកជាតារាសម្តែងស្រីមានទឹកមាត់លើវិស័យភាពយន្ត និងមានវត្តមាននៅឯទីក្រុងប៊ុមបៃប្រទេសឥណ្ឌាក្នុងកម្មវិធី 4th Edition of Global Exhibition on Services 2018 (GES) ក្នុងនាមជាតារាស្រីតំណាងឲ្យសិល្បការិនីខ្មែរនាពេលថ្មីៗ ក៏បានបង្ហោះសារការពារខ្លួនភ្លាមថា៖ «គ្រាន់តែរូបថតសិចស៊ីដំបូង!រាត្រីសួស្តី Sexy dream អ្នកទាំងអស់គ្នា។ វាគ្រាន់តែជាសិល្បៈនៃការថតរូបទេ ដូច្នេះកុំគិតថាអូនស្រាតអីណា អូនខ្លាចខិខិខិខ!»។
អតីតជា Freshie Girl កញ្ញា យ៉ែម ស្រីពេជ្រ ដែលលេចធ្លោនៅក្នុងកុនភាគនានាដូចជារឿង «កូនក្រមុំលោកមេឃុំ» និងរឿង «ភ្លើងស្នេហ៍ភ្លើងឫស្យា» របស់ទូរទស្សន៍ប៉ុស្ដិ៍លេខ ៥ និងទើបតែឆក់បានតំណែងតួឯករឿងថ្មីមួយគឺរឿង «ចម្ការលាក់ស្នេហ៍» ដែលបានសម្តែងប៉ះជាមួយតួប្រុសក្មេង អតីតជា Freshie Boy លោក ជា លាងឈែ នោះ ក៏បានបញ្ជាក់ពីរូបថតជាមួយតួសម្តែងប្រុសលោក ដារ៉ាវុធ ដែលបង្កការភ្ញាក់ផ្អើលនោះថា៖ «តាមពិតទៅនោះជារូបថតលេងតែប៉ុណ្ណោះ ខណៈពួកយើងបានទៅថតកុនរឿងផ្ទះសសរកណ្តាលមកម្ល៉េះ! មិនមែនជាឈុតសម្តែងស្រាតអ្វីនោះទេ និងក៏មិនមែនជាឈុតនៅក្នុងកុនណាមួយនោះដែរ»។
កាលពីថ្ងៃទី ២០ ខែមេសា ឆ្នាំ ២០១៧ កន្លងមកនោះ ក៏នាងធ្លាប់បានប្រាប់ភ្នំពេញប៉ុស្តិ៍ ជាសំឡេងតាមឆាត Messenger កាលនៅឯប្រទេសឥណ្ឌានោះឲ្យដឹងដែរថា៖ «នាងខ្ញុំ ត្រូវបានខាងប្រទេសឥណ្ឌាអញ្ជើញមកចូលរួមកម្មវិធីនេះ ដែលតំណាងភាគីនានាចូលរួមប្រមាណ ១០០ ប្រទេស ដែលបានចាប់ផ្តើមពីថ្ងៃទី ១៥ ដល់ទី ១៨ ខែឧសភា ឆ្នាំ ២០១៨ នេះនៅទីក្រុងប៊ុមបៃប្រទេសឥណ្ឌា។ សប្បាយចិត្តខ្លាំងណាស់ ដែលខ្លួនឯងបានក្លាយជាតារាតំណាងផ្នែកសិល្បៈ ខណៈនេះក៏ជាលើកទី ១ ផងដែរ សម្រាប់នាងខ្ញុំបានមកកាន់ទឹកដីប្រទេសឥណ្ឌា»។
តារាសម្តែង និងជាពិធីការិនីទូរទស្សន៍កញ្ញា យ៉ែម ស្រីពេជ្រ វ័យ ២០ ឆ្នាំ ដែលមានស្រុកកំណើតនៅទីក្រុងភ្នំពេញ ក្រៅពីការងារសិល្បៈនោះ នាងក៏ជានិស្សិតកំពុងតែសិក្សានៅសាកលវិទ្យាល័យជាតិគ្រប់គ្រងផ្នែកគណនេយ្យ និងជាកូនស្រីទី ៣ នៅក្នុងចំណោមសមាជិកគ្រួសារនៃបងប្អូនបង្កើតចំនួន ៤ នាក់របស់នាង៕