The Phnom Penh Post Search

Search form




Logo of Phnom Penh Post newspaper Phnom Penh Post - រកឃើញ​ម្ចាស់​ជ័យលាភី​ពី​ការ​ប្រកួត​ថតរូប Canon Photo Marathon ឆ្នាំ​២០១៤

រកឃើញ​ម្ចាស់​ជ័យលាភី​ពី​ការ​ប្រកួត​ថតរូប Canon Photo Marathon ឆ្នាំ​២០១៤

ស្នាដៃ​រូបថត​លើ​ប្រធានបទ ការ​បង្ហាញ​អំពី​ទីក្រុង​ភ្នំពេញ ដែល​ជាប់​ចំណាត់​ថ្នាក់​លេខ​មួយ​។
ស្នាដៃ​រូបថត​លើ​ប្រធានបទ ការ​បង្ហាញ​អំពី​ទីក្រុង​ភ្នំពេញ ដែល​ជាប់​ចំណាត់​ថ្នាក់​លេខ​មួយ​។ រូបថត Patrick Kooijman

រកឃើញ​ម្ចាស់​ជ័យលាភី​ពី​ការ​ប្រកួត​ថតរូប Canon Photo Marathon ឆ្នាំ​២០១៤

ភ្នំពេញៈ ការ​ប្រកួត​ថតរូប​របស់​អ្នក​មិន​អាជីព​នៅ​កម្ពុជា​បាន​ប្រព្រឹត្ដ​ទៅ​ជា​លើក​ទី​៤​សម្រាប់​ការ​ប្រកួត Canon Photo Marathon។ ដោយ​មាន​ការ​ចូលរួម​ពី​សំណាក់​អ្នក​ប្រើ​កាមេរ៉ា​ឌីជីថល​៨០០​នាក់​ដើម្បី​ផ្ដិត​យក​រូបភាព​ប្លែកៗ​ដ៏ល្អ​បំផុត ទីកន្លែង​រៀបចំ​កម្មវិធី​នៅ​អគារ G នៃ​កោះពេជ្រ កាលពី​រសៀល​ថ្ងៃ​អាទិត្យ​បាន​រំពឹង​ថា ទទួល​បាន​លទ្ធផល​ល្អ​។

ជេស៊ីកា លីម (Jessica Lim) ជា​អ្នក​សម្របសម្រួល​សម្រាប់​កម្មវិធី​បុណ្យ​រូបភាព​អង្គរ និងជា​អ្នក​វិនិច្ឆ័យ​ក្នុង​កម្មវិធី​ប្រកួត​រូបថត​ម៉ារ៉ាតុង ប្រចាំ​តំបន់​អាស៊ី បាន​និយាយ​ថា អ្នកនាង​មាន​ក្ដី​រំភើប​រីករាយ​ចំពោះ​ចំនួន​អ្នក​ចូលរួម​ដ៏ច្រើន​សន្ធឹកសន្ធាប់​នេះ​។

អ្នកនាង​បាន​និយាយ​ដោយ​មើល​ឃើញ​មាន​អ្នក​មក​ចុះឈ្មោះ ប្រកួត​តាំងពី​ម៉ោង​៦​កន្លះ​ព្រឹក​ថា​៖ «​ពិតជា​អស្ចារ្យ​ណាស់​ដែល​បាន​ឃើញ​ប្រជាជន​កម្ពុជា​ច្រើន​ចាប់​អារម្មណ៍​ការ​ថតរូប និង​ចង់​ចំណាយ​ពេលវេលា​ពេញ​មួយ​ថ្ងៃ​អាទិត្យ​ដើម្បី​ចូលរួម​ការ​ប្រកួត​នេះ»។

ការ​ប្រកួត​ដែល​ត្រូវ​បាន​បែងចែក​ជា​៣​ប្រភេទ ដោយ​ប្រភេទ​នីមួយ​ៗ​មាន​ប្រធានបទ​ខុស​គ្នា ចាប់ផ្ដើម​នៅ​ម៉ោង​៩​ព្រឹក​។

ស្នាដៃ​រូបថត​ចំណាត់​ថ្នាក់លេខ​មួយ​សម្រាប់​ប្រធានបទ ជំនាន់។
ស្នាដៃ​រូបថត​ចំណាត់​ថ្នាក់លេខ​មួយ​សម្រាប់​ប្រធានបទ ជំនាន់។ រូបថត Sun Vandy

ប្រធានបទ​នីមួយៗ​ត្រូវ​បាន​រក្សា​ជា​ការ​សម្ងាត់​រហូត​ដល់​ពេល​ប្រកួត​ចាប់ផ្ដើម​។ ក្រុម​អ្នក​ចូលរួម​មាន​រយៈពេល​៣​ម៉ោង​ដើម្បី​រុករក​រូបភាព​ដ៏ល្អ​បំផុត​ដែល​ពួកគេ​អាច​ប្រទះ​ឃើញ​ក្នុង​ទីក្រុង​។ ក្រោយពី​បញ្ជូន​រូបភាព​ពេញចិត្ដ​បំផុត ពួកគេ​ត្រូវ​បាន​ជូន​ដំណឹង​ពី​ប្រធានបទ​បន្ទាប់ និង​ចេញ​ទៅ​ប្រមាញ់​រូប​ម្ដង​ទៀត​។

ចំពោះ​លក្ខខណ្ឌ អ្នក​ចូលរួម​ត្រូវ​ថត​រូបភាព​ទាំងឡាយ​ណា​ដែល​មាន​សកម្មភាព​នៅក្នុង​ថ្ងៃ​ប្រកួត ហើយ​រូបភាព​ទាំងនោះ​មិន​ត្រូវ​បាន​ដក​ចេញ​ពី​អង្គ​ចងចាំ​របស់​កាមេរ៉ា​ឡើយ​ដើម្បី​រក្សា​ទម្រង់​ដើម​។

គង់ សង្វាសេសា (Kong Sangvar Cesare) ជា​ប្រធាន​គ្រប់គ្រង​ជំនួញ​នៃ​ក្រុមហ៊ុន អាស្កាព ហ្គោល អ៊ិនវេសមិន (Askap Gold Investment)​ដែល​មាន​វ័យ​២៤​ឆ្នាំ​បាន​សម្រេចចិត្ដ​ចាប់​ដៃគូ​ជាមួយ​មិត្ដភក្ដិ​២​នាក់​ទៀត​ដើម្បី​ស្វែងរក​រូបភាព​តំណាង «ក្ដីសង្ឃឹម​» ដែល​ជា​ប្រធានបទ​ចុងក្រោយ​។

លោក​បាន​ថ្លែង​ខណៈ​ការ​ប្រកួត​ឈាន​ដល់​ទីបញ្ចប់​ថា​៖ «​បច្ចុប្បន្ន យើង​បាន​រកឃើញ​រូបថត​២​សន្លឹក មួយ​ជា​រូប​ផ្កា​អណ្ដែត​លើ​ផ្ទៃទឹក​ដោយ​មាន​ចាំង​ស្រមោល ហើយ​រូបថត​មួយ​ទៀត​ជា​ស្នាមញញឹម​។ ប៉ុន្ដែ​យើង​ផ្ដោត​លើ​ទម្រង់​មាត់​តែ​ពាក់កណ្ដាល​ប៉ុណ្ណោះ​»។

ផាត សុភ័ក្ត្រ ជា​អ្នក​រៀបចំ​គម្រោង​នៅ​អង្គការ​ឃ្លាំ​មើល​ការ​បោះឆ្នោត​ខុម ហ្វ្រែល វ័យ​២៨​ឆ្នាំ ក៏​បាន​កំពុង​សញ្ជឹង​គិត​ពី​រូបថត​មួយ​ណា​ដែល​ត្រូវ​បញ្ជូន​ទៅ​ដាក់​ប្រកួត​ក្រោយ​ពី​ត្រឡប់​មកពី​ប្រមាញ់​រូប​រយៈពេល​៣​ម៉ោង​មក​។

លោក​បាន​លើក​ឡើង​ដោយ​មិន​សូវ​ពេញចិត្ដ​ចំពោះ​រូប​របស់​ខ្លួន​ថា​៖ «នៅពេល​ពួកគេ​ប្រាប់​ពី​ប្រធានបទ ខ្ញុំ​គិត​ដល់​បុរស ឬ​ស្ដ្រី​ម្នាក់​កំពុង​សម្លឹង​មើល​រូបភាព ហើយ​រូបភាព នោះ​បង្ហាញ​ពី​ការ​អភិវឌ្ឍ​»។

តាន់ លីវេន (Tan Liwen) ជា​ប្រធាន​គ្រប់គ្រង​ទីផ្សារ​ប្រចាំ​តំបន់​របស់ i-Qlick Canon ដែល​បាន​រៀបចំ​ការ​ប្រកួត បាន​ថ្លែង​ថា ប្រធានបទ​ទាំង​៣​ដែល​រួម​ទាំង «​ជំនាន់​» និង «​មុខមាត់​ក្រុង​ភ្នំពេញ​»​ត្រូវ​បាន​អនុញ្ញាត​ឲ្យ​បង្កើត​ស្នាដៃ​ផ្ទាល់​ខ្លួន​ដោយ​មាន​ព្រាងទុក​។

អ្នកនាង​បាន​បន្ដ​ថា​៖ «​យើង​ស្នើ​ឲ្យ​អ្នក​ចូលរួម​បង្កើត​ស្នាដៃ​ច្នៃប្រឌិត ហើយ​យើង​ក៏​ស្នើ​ពួកគេ​ឲ្យ​ប្រញាប់ប្រញាល់​បន្ដិច​ក្រោយពី​ថតរូប​រួចរាល់​ដើម្បី​ត្រឡប់​មក​ជ្រើសរើស​រូបភាព​ដែល​ខ្លួន​ពេញចិត្ដ​បំផុត​»។

ការ​ប្រកួត​ត្រូវ​បាន​បែងចែក​ជា​ក្រុម «​បើក​» សម្រាប់​មនុស្ស​ពេញវ័យ​និង​ក្រុម​«​សិស្ស» សម្រាប់​ក្មេង​ជំទង់ ដែល​អ្នក​ចូលរួម​ក្មេង​បំផុត​អាយុ​ត្រឹម​តែ​៩​ឆ្នាំ​ប៉ុណ្ណោះ​។ ក្រៅពី​រង្វាន់​កាមេរ៉ា​មួយ​ឈុត អ្នក​ទទួល​ជ័យលាភី​កំពូល​ទាំង​៣​សម្រាប់​មនុស្សពេញ​ក្នុង​ប្រធានបទ​នីមួយៗ​នឹង​ចូលរួម​កម្មវិធី​ហ្វូតូគ្លីនិក​នៅ​មហោស្រព​រូបថត​អង្គរ​ក្រុង​សៀមរាប​ខែ​ក្រោយ​ជា​ទី​ដែល​ពួកគេ​ត្រូវ​ប្រកួត​គ្នា​ជាថ្មី​ម្ដង​ទៀត​ដើម្បី​មាន​ឱកាស​ចូលរួម​កម្មវិធី Canon Photo Clinic ឯ​ប្រទេស​ជប៉ុន​នៅ​ខែ​មករា ឆ្នាំ​ក្រោយ​។

អ្នកនាង ជេស៊ីកា លីម ដែល​ធ្វើ​ជា​អ្នក​វិនិច្ឆ័យ​លើក​ទី​៣ បាន​អះអាង​ថា អ្នកនាង​មាន​មើល​ឃើញ​ពី​ការ​រីកចម្រើន​ពី​ឆ្នាំ​កន្លង​ទៅ​។

អ្នកនាង​បាន​បន្ថែម​ថា​៖ «​ខ្ញុំ​មាន​អារម្មណ៍​ថា មនុស្ស​ជាច្រើន​កំពុង​តែ​ព្យាយាម​បង្កើន​សមត្ថភាព​ថតរូប​របស់​ខ្លួន​ដែល​ជា​ការ​ផ្លាស់ប្ដូរ​ដ៏ល្អ​»។

អ្នកនាង ក៏​បាន​សម្គាល់​ពី​កំណើន​នៃ​គុណភាព​រូបថត​នៅ​ថ្ងៃ​ប្រកួត​ផង​ដែរ​។

ជើរី ថៃ អ្នក​ថតរូប​អាជីព​ម្នាក់​ដែល​មាន​តួនាទី​ជា​អ្នក​វិនិច្ឆ័យ បាន​និយាយ​ថា លោក​សង្ឃឹម​ថា ប្រទេស​កម្ពុជា​នឹង​បន្ដ​អភិវឌ្ឍ​ជំនាញ​ថតរូប​នៅក្នុង​ការ​ប្រកួត​ឆ្នាំ​ក្រោយ​ទៀត​។

លោក​បាន​ឲ្យ​ដឹង​ទៀត​ថា​៖ «​ខ្ញុំ​ចង់​និយាយ​ថា ពេល​នេះ​កម្ពុជា​កំពុង​តែ​អភិវឌ្ឍ​វិស័យ​ថតរូប​ឲ្យ​ក្លាយ​ជា​ជំនាញ​បែប​បច្ចេកទេស ហើយ​ក្នុង​លក្ខខណ្ឌ​ទិចនិក​សិល្បៈ វា​កំពុង​តែ​រីកចម្រើន​ដែរ តែ​នៅ​មាន​កម្រិត​នៅ​ឡើយ​។ សង្ឃឹម​ថា នៅ​ឆ្នាំ​ក្រោយ អ្វីៗ​គ្រប់​យ៉ាង​នឹង​កាន់តែ​ប្រសើរ​ទៀត​»។

ប្រធាន​គ្រប់គ្រង​ទីផ្សារ​ប្រចាំ​តំបន់​របស់ i-Qlick Canon អ្នកនាង លី វេន បញ្ជាក់​ថា ការ​ប្រកួត​នេះ​គឺ​ដើម្បី​លើក​ស្ទួយ​ជំនាញ​ថតរូប​នៅ​កម្ពុជា​។

អ្នកនាង​បាន​បន្ដ​ថា​៖ «​តាំងពី​ដំបូង យើង​បាន​តស៊ូ​សម្បើម​ណាស់​ដើម្បី​ចង់​លើក​ស្ទួយ​វប្បធម៌​ថតរូប​នៅ​កម្ពុជា​»។

អ្នក​ឈ្នះ​លើ «​ការ​បង្ហាញ​អំពី​ទីក្រុង​ភ្នំពេញ» ជា​ប្រធានបទ​បើក​បាន​ធ្លាក់​ទៅលើ​ឈ្មោះ Patrick Kooijman សម្រាប់​រង្វាន់​ទី​១ Arik S. Mintorogo រង្វាន់​ទី​២ និង Jake Akitch Almeida រង្វាន់​ទី​៣​។ ជ័យលាភី​ប្រភេទ​សិស្ស បាន​ទៅលើ ឈុនកា ដេវិដ (Chhunka David) សម្រាប់​រង្វាន់​ទី​១ នន់ សុនីហ្សា (Nun Sonisa) រង្វាន់​ទី​២ និង​ឡាយ ប៊ុនឡេង (Lay Bunleng) រង្វាន់​ទី​៣​។

ម្ចាស់​ជ័យលាភី​ប្រភេទ​បើក សម្រាប់​ប្រធានបទ​«​ជំនាន់​» លេខ​មួយ​បាន​ធ្លាក់​ទៅលើ ស៊ុន វណ្ណឌី (Sun Vandy) លេខ​២ វង់ សុភក្ដិ (VongSopheak) និង​លេខ​៣ ស៊ី អេងហៃ (Si Eng Hai) រីឯ​អ្នក​ឈ្នះ​ជា​សិស្ស​លើ​ប្រធានបទ​ដូចគ្នា​បាន​ទៅលើ វាល ចាន់រស្មី (Veal Chanraksmey) ទទួល​បាន​រង្វាន់​លេខ​១ ហេង ពុទ្ធីរក្ស (HengPuthyrak) បាន​លេខ​២ និង ចិត្រ បូរមី (Chet Bomey) បាន​លេខ​៣៕ HR

អត្ថបទគួរចាប់អារម្មណ៍