ភ្នំពេញ: ទន្ទឹមនឹងខ្សែភាពយន្តភាគថៃដ៏ល្បីល្បាញរឿង បុព្វេសន្និវាស បានចូលមកបំពេញចំណីចក្ខុទស្សនិកជនខ្មែរមួយចំនួនយ៉ាងជក់ចិត្តដិតអារម្មណ៍ សម្លៀកបំពាក់ចម្លងចេញពីឈុតបុរាណសម័យអយុធ្យា ដែលគ្រងដោយតួស្រីនាង ការ៉ាកេត ក្នុងរឿងភាគនេះ ក៏ត្រូវបាននាំយកមកលក់អនឡាញតាមបណ្ដាញសង្គម អមដោយសារផ្សព្វផ្សាយឲ្យអតិថិជនជាវយកទៅស្លៀកត្រៀមសង្ក្រាន្តឆ្នាំថ្មី ប្រពៃណីខ្មែរ។
នៅក្នុងបណ្ដាញសង្គមហ្វេសប៊ុកថ្មីៗនេះ មានអ្នកលក់តាមអនឡាញជាច្រើន បានបង្ហោះរូបថត ឈុតពណ៌ស្រស់ឆើតៗ ដែលចម្លងចេញពីសម្លៀកបំពាក់ក្នុងរឿងភាគថៃ បុព្វេសន្និវាស ដោយភ្ជាប់ជាមួយសារពពាយនាយលក់ទំនិញយ៉ាងដូច្នេះថា៖ «តោះ ត្រៀមៗសម្រាប់សង្ក្រាន្តឆ្នាំថ្មី។ ឆាប់កុម្ម៉ង់ ស្តុកមានកំណត់»។
នៅពីក្រោមការផ្សព្វផ្សាយលក់សម្លៀកបំពាក់ចម្លងតាមរឿងភាគថៃ ចំរដូវកាលចូលឆ្នាំប្រពៃណីខ្មែរខាងមុខនេះ មានអ្នកគាំទ្ររឿង បុព្វេសន្និវាស ជាច្រើននាក់ បានបញ្ចេញមតិសួរនាំ ដោយចំណាប់អារម្មណ៍ចង់ជាវយកមកស្លៀកលេងផងដែរ។
ខណៈមានការជំរុញឲ្យអតិថិជនខ្មែរទិញឈុតបុរាណចម្លងពីរឿងភាគ បុពេសន្និវាស មកស្លៀកនៅថ្ងៃចូលឆ្នាំប្រពៃណីខ្មែរខាងមុខនោះ ផលិតករដឹកនាំការសម្ដែងមួយរូបនៅផលិតកម្មថោន លោក អ៊ុក រតនា បានបញ្ចេញទស្សនៈផ្ទាល់ខ្លួនរបស់លោកថា ការស្លៀកពាក់គួរតែជ្រើសរើសឲ្យបានត្រឹមត្រូវតាមទីកន្លែង និងឱកាសកាលវេលាផងដែរ។
ផលិតករល្បីខាងច្នៃប្រឌិតសម្លៀកបំពាក់ពីសារុង និងកន្ទេល ឲ្យតារាចម្រៀង មាស សុខសោភា រូបនេះ បានប្រាប់ ភ្នំពេញ ប៉ុស្ដិ៍ ថា៖ «ឈុតខោអាវនេះជាឈុតសម័យបុរាណរបស់ថៃ ដែលគេពាក់តាមតំបន់តាមភូមិគេអ៊ីចឹង»។
លោកបានបន្តឲ្យដឹងទៀតថា៖ «ចំពោះការលក់ខោអាវបែបនេះ គឺជាសិទ្ធិរបស់បុគ្គល គឺយើងមិនអាចហាមឃាត់គេបានទេ ហើយណាមួយយើងចូលអាស៊ានទៀត ក៏ប៉ុន្តែគ្រាន់តែថា នៅពេលយើងទៅកន្លែងណាអ៊ីចឹង សូមមេត្តាជួយធ្វើឲ្យបានសមរម្យផង»។
លោក អ៊ុក រតនា បានប្រៀបធៀបទៀតថា៖ «ឧទាហរណ៍ថា ការស្លៀកសំពត់ខ្លីខើចចូលទៅក្នុងបរមរាជវាំង ឬមួយក៏ក្នុងវត្ត តើវាសមរម្យ ឬអត់? អ៊ីចឹងយើងនាំគ្នាជួយគិតមើលកន្លែងហ្នឹងបន្តិចទៅ ដូចជាការស្លៀកសម្លៀកបំពាក់ប្រពៃណីថៃក្នុងកម្មវិធីចូលឆ្នាំខ្មែរ តើមើលទៅវាសមរម្យ ចូលភ្នែកគេឬអត់? ចូលចំណោមគេចុះអត់?»។
ទន្ទឹមនឹងនោះ ផលិតករដឹកនាំការសម្ដែងរូបនេះ ក៏សំណូមពរផងដែរថា៖ «សម្រាប់ខ្ញុំ ចង់ឲ្យអ្នកលក់អនឡាញខ្មែរយើង គួរតែរកខោអាវខ្មែរមកលក់សម្រាប់ពាក់ចូលឆ្នាំខ្មែរទៅវាប្រសើរជាង ខ្វះអីនៅផ្សារអូរឫស្សីមានលក់ច្រើនណាស់ ខោអាវខ្មែរ ដូចជាខោចែវ ក្រមា ជាដើម»៕