ក្រុងវ៉ាស៊ីនតោន៖ ខណៈមន្ដ្រីអាមេរិកកំពុងខិតខំបញ្ចុះបញ្ចូលពលរដ្ឋឱ្យទៅទទួលការចាក់វ៉ាក់សាំងប្រឆាំងជំងឺកូវីដ១៩ រដ្ឋមួយនេះកំពុងតែធ្វើយុទ្ធនាការផ្ដល់ប្រាក់រង្វាន់ជាមួយនឹងអ្វីដែលប្រកាសថា ជាការផ្ដល់ប្រាក់សំណាងរាប់លានដុល្លារសម្រាប់អ្នកទទួលវ៉ាក់សាំង។
អភិបាលរដ្ឋអូហាយូ លោក ម៉ៃ ដេវីន បានសរសេរកាលពីថ្ងៃពុធថា រដ្ឋនេះនឹងផ្ដល់ប្រាក់ឆ្នោតសំណាង ១ លានដុល្លាររៀងរាល់សប្ដាហ៍រយៈពេល ៥ សប្ដាហ៍សម្រាប់ពលរដ្ឋអាយុចាប់ពី ១៨ ឆ្នាំដែលមកទទួលវ៉ាក់សាំងយ៉ាងតិច ១ ដូស។
លោកបានសរសេរថា៖ «ខ្ញុំដឹងថា អ្នកខ្លះអាចនិយាយថា ដេវីន លោកឆ្កួតមែន! គំនិតផ្ដល់ប្រាក់សំណាងរាប់លានដុល្លាររបស់លោកពិតជាខ្ជះខ្ជាយមែន»។
អភិបាលរដ្ឋមកពីគណបក្សសាធារណរដ្ឋរូបនេះបានបន្ដថា៖ «ប៉ុន្ដែច្បាស់ណាស់ ការខ្ជះខ្ជាយលុយពិតប្រាកដនៅដំណាក់កាលវិបត្ដិកូវីដនេះ ពេលការចាក់វ៉ាក់សាំងមានសម្រាប់គ្រប់គ្នាដែលស្ម័គ្រចិត្ដ គឺជាការបាត់បង់ជីវិតដោយសារកូវីដនេះឯង»។
អ្នកឈ្នះដំបូងនឹងត្រូវបានប្រកាសនៅថ្ងៃទី ២៦ ខែឧសភា។ ក្រោយមក អ្នកឈ្នះថ្មីម្នាក់ទៀតនឹងត្រូវចាប់ឆ្នោតនៅរៀងរាល់ថ្ងៃពុធសម្រាប់រយៈពេល ៥ សប្ដាហ៍ ក្នុងទឹកប្រាក់ដូចៗគ្នា»។
រដ្ឋអូហាយូ ក៏នឹងផ្ដោតប្រាក់សំណាងសម្រាប់ពលរដ្ឋក្រោមអាយុ ១៧ ឆ្នាំដែលបានចាក់វ៉ាក់សាំង ដែលមិនមែនជាប្រាក់ ១ លានដុល្លារនោះទេ តែពួកគេអាចទទួលបានអាហារូបករណ៍ ៤ ឆ្នាំពេញក្នុងការសិក្សានៅសាកលវិទ្យាល័យណាមួយនៅរដ្ឋអូហាយូនេះ ជារង្វាន់ដ៏មានតម្លៃក្នុងប្រទេស ដែលការអប់រំខ្ពស់ត្រូវចំណាយប្រាក់ច្រើន។
រដ្ឋបាលចំណីអាហារ និងឱសថអាមេរិក (FDA) កាលពីថ្ងៃចន្ទបានផ្ដល់ការអនុម័តលើការប្រើប្រាស់វ៉ាក់សាំង Pfizer/BioNTech ចំពោះក្មេងជំទង់អាយុចន្លោះពី ១២ ទៅ ១៥ ឆ្នាំ។ ប្រាក់ផ្សងសំណាងនឹងបានមកពីមូលនិធិសហព័ន្ធមានស្រាប់ ដើម្បីដោះស្រាយវិបត្ដិកូវីដ។
សហរដ្ឋអាមេរិកមើលឃើញពីការកើនឡើងចំនួនពលរដ្ឋមកទទួលការចាក់វ៉ាក់សាំង ដោយពលរដ្ឋពេញវ័យប្រមាណ ៥៨,៧ ភាគរយបានទទួលវ៉ាក់សាំងយ៉ាងតិច ១ ដូស។
យ៉ាងណាមិញចំនួនអ្នកមកទទួលការចាក់វ៉ាក់សាំងមានការថយចុះ ដោយមនុស្សជាច្រើនដែលមិនទាន់ចាក់ នៅមានចិត្ដស្ទាក់ស្ទើរ។
ការផ្ដល់កាដូលើកទឹកចិត្ដជាច្រើនប្រភេទកំពុងត្រូវបានធ្វើឡើងនៅទូទាំងប្រទេស ដើម្បីបញ្ចុះបញ្ចូលពលរដ្ឋមកទទួលវ៉ាក់សាំង រួមទាំងការផ្ដល់ស្រាបៀរ នំដូណាត់ ឬសំបុត្រចូលរួមព្រឹត្ដិការណ៍ផ្សេងៗជាដើម។
ខែនេះរដ្ឋម៉ារីលែនបានប្រកាសថាបុគ្គលិករដ្ឋនឹងទទួលបានប្រាក់ ១០០ ដុល្លារបើពួកគេចាក់វ៉ាក់សាំង។ នៅវីជីនៀខាងលិចប្រាក់ចំនួនដូចគ្នានេះនឹងត្រូវបានផ្ដល់តាមរយៈគណនេយ្យសន្សំបន្ថែមដល់ពលរដ្ឋអាយុចន្លោះ ១៦ ទៅ ៣៥ ឆ្នាំជាក្រុមវ័យមិនចង់ចាក់វ៉ាក់សាំង៕ HR