ភ្នំពេញ៖ ក្រោយពីហ៊ានទម្លាយរឿងបើកហាងម៉ាស្សា និងស្ប៉ា ជាមុខរបរថ្មីក្រៅពីអាជីពសិល្បៈមានម្ចាស់ចិត្តជួយទំនុកបម្រុងភាគច្រើន ស្របពេលដែលខ្លួនក៏ទើបតែចូលទៅជ្រកនៅទ្រនំផលិតកម្មថោនថ្មោងថ្មីនោះ តារាចម្រៀងស្រីសិចស៊ី កញ្ញា រតនៈ ពិសី ក៏ស្រាប់តែបង្ហើបរឿងនាងកំពុងមានគម្រោងនាំគូស្នេហ៍មានឋានៈជាមន្រ្តីការទូត ទៅចុះអេតាស៊ីវិល ដោយមិនប្រាថ្នាគិតទៅដល់រឿងរៀបការនោះឡើយ។
កញ្ញា រតនៈ ពិសី តារាចម្រៀងស្រីមានភាពទាក់ទាញមហាជនឲ្យចាប់អារម្មណ៍ខ្លាំងត្រង់ចូលចិត្តបង្ហាញភាពសិចស៊ី និងដើមទ្រូងទ្រលុកទ្រលន់ បច្ចុប្បន្នជ្រកនៅផលិតកម្មថោនរូបនេះ បានបង្ហើបឲ្យមហាជនដឹង ដោយបើកចំហរឿងសម្ព័ន្ធស្នេហ៍ខ្លួន ដែលបានអះអាងថា បច្ចុប្បន្ន នាងពិតជាមានទំនាក់ទំនងស្នេហាជាមួយនឹងមន្ត្រីការទូតម្នាក់ពិតមែន តែសុំមិនបញ្ចេញអត្តសញ្ញាណពិតនៅឡើយនោះទេ។
ពាក់ព័ន្ធនឹងអាថ៌កំបាំងផ្ទាល់ខ្លួនដែរនេះ ម្ចាស់បទ «អស់កំណើត» រតនៈ ពិសី បានឲ្យដឹងថា៖ «នាងខ្ញុំពិតជាមានទំនាក់ទំនង ជាមួយមន្ត្រីការទូត ជាជនជាតិខ្មែរ ដែលធ្វើការក្រៅប្រទេសអស់រយៈពេល ៣ ឆ្នាំមកហើយ ប៉ុន្តែយើងទើបយល់ចិត្តគ្នាទៅវិញទៅមក ពេល ១ ឆ្នាំចុងក្រោយនេះ។ សម្ព័ន្ធស្នេហ៍ពួកយើង នឹងអាចឈានដល់ទៅជាប្តីប្រពន្ធនាពេលឆាប់នេះ ប៉ុន្តែតាមចិត្តខ្ញុំគឺមិនចង់រៀបការនោះឡើយ គឺចង់ត្រឹមចុះអេតាស៊ីវិលរួច គឺជាការស្រេច»។
កញ្ញា រតនៈ ពិសី តារាចម្រៀង និងតារាសម្តែងស្រីមួយរូប ដែលមានប្រជាប្រិយភាព និងមានទីផ្សារខ្លាំងក្នុងវិស័យសិល្បៈ ក៏បានព្រលយបន្ថែមឲ្យបានដឹងទៀតថា គូស្នេហ៍របស់នាងក៏បានសំណូមពរឲ្យនាងផ្អាកពីសិល្បៈ ព្រោះតែបារម្ភពីសុខភាពរបស់នាង ដោយសារនាងមានជំងឺសន្លាក់ ណាមួយក៏ឃើញនាងហត់ផង ព្រោះរវល់នឹងមុខជំនួញផ្ទាល់ខ្លួន បើកហាងម៉ាស្សា និងស្ប៉ានោះឡើយ។ ប៉ុន្តែកញ្ញា រតនៈ ពិសី បានបង្ហើបថា ដោយសារតែសិល្បៈជាអ្វីដែលនាងស្រឡាញ់ ទើបមិនអាចផ្អាកបាន។
ការបើកហាងថ្មីឈ្មោះ «រតនៈពិសី ម៉ាស្សា និងស្ប៉ា» នោះតារាចម្រៀងស្រីរូបនេះ ក៏បញ្ជាក់ថា ត្រូវបានចំណាយទុន ៤ ម៉ឺន ដុល្លារ ក្នុងការជួលទីតាំង និងការរៀបចំការតុបតែងឲ្យមានភាពទាក់ទាញមានទីតាំងស្ថិតនៅសង្កាត់ទួលស្វាយព្រៃ ១ ខណ្ឌចំការមន នៅផ្លូវលេខ ៣២៨។ តារាស្រីល្បីដោយភាពសិចស៊ី ហ៊ានសម្ញែងដើមទ្រូងកញ្ញា រតនៈ ពិសី បានប្រាប់ភ្នំពេញប៉ុស្តិ៍ថា៖ «របរបើកហាងម៉ាស្សា និងស្ប៉ានេះ ខ្ញុំធ្លាប់បើកម្តងរួចមកហើយ មានភាគហ៊ុនជាមួយបងស្រី ប៉ុន្តែក៏ត្រូវសេងហាងទៅវិញ។ ដោយសារខ្ញុំមានគម្រោងរស់នៅប្រទេស កាណាដា ប៉ុន្តែអត់ចេះនៅក៏ត្រឡប់មកខ្មែរយើងវិញ ហើយក៏ចាប់ផ្តើមប្រកបមុខរបរចាស់វិញដែរ ព្រោះចិត្តនៅស្រឡាញ់អាជីពនេះ»៕