រូបថតអាពាហ៍ពិពាហ៍របស់លោក Dela Cruz និងអ្នកស្រី Maica Nicerio-Dela Cruz ដែលត្រូវបានប្រដូចនឹងគំនូររឿងព្រេងនិទាន។
ក្រុងម៉ានីល: ភ្នំភ្លើងបានផ្ទុះឡើងក្រហមឆ្អៅនិងផ្សែងខ្មួលខ្មៅហុយចេញពីភ្នំនៅហ្វីលីពីន កាលពីសប្ដាហ៍កន្លងទៅថ្មីៗនេះ បានក្លាយជាទិដ្ឋភាពដ៏អស្ចារ្យក្នុងរូបថតអាពាហ៍ពិពាហ៍របស់លោក Dela Cruz និងអ្នកស្រី Maica Nicerio-Dela Cruz ដែលគ្រងឈុតកូនកំលោះក្រមុំស្បថស្បែថែគ្នាជារៀងរហូត។
អ្វីដែលរឹតតែរ៉ូមេនទិកពីលើរូបភាពអាពាហ៍ពិពាហ៍នេះ គឺភ្នំភ្លើង Mayon ស្ថិតនៅខេត្តអាល់ប៊េរ ត្រូវបានគេផ្សារភ្ជាប់នឹងរឿងព្រេងនិទានស្នេហាប្ដូរផ្ដាច់តាំងពីបរមបុរាណមកម្ល៉េះ ហើយវារឹតតែបន្ថែមអត្ថន័យដល់មង្គលការអ្នកទាំង ២។
ក្រោយពីបានឃើញរូបថតរៀបការស្នាដៃជាងថត Bro. Jun Santiago នេះ មនុស្សជាច្រើនបានទាញសេចក្ដីតំណាលពីអ្នកស្រុកថា ទិដ្ឋភាពក្នុងរូបអាពាហ៍ពិពាហ៍ខាងលើ ពិតជាដូចទៅនឹងរឿងព្រេងនិទានរបស់ហ្វីលីពីនទាក់ទងនឹងភ្នំ Mayon។
ភ្នំនេះយកឈ្មោះថា នារីដ៏ស្រស់ស្អាតម្នាក់ ដែលរត់តាមបុរសអ្នកចម្បាំងជាម្ចាស់បេះដូងនាង ព្រោះតែនាងត្រូវបានបង្ខំឲ្យរៀបការជាមួយអ្នកផ្សេង។ នៅពេលដែលសេនាម្ចាស់ស្នេហ៍ត្រូវបានគេបាញ់សម្លាប់ដោយព្រួញ នាងក៏ទាញកាំបិតចាក់ខ្លួនឯងឲ្យ ស្លាប់ដែរ គូស្នេហ៍ដ៏អភ័ព្វនេះត្រូវបានកប់នៅភ្នំ Mayon៕
