ក្រុងសៀមរាប៖ ដោយសារតែមានក្តីស្រឡាញ់ចូលចិត្ត និងចង់រក្សានូវមរតកវប្បធម៌ពីបរមបុរាណខ្មែរមកនោះ ក្រោយពីទទួលចំណេះដែលរៀនចេះកាលពេលនៅបួសជាសង្ឃតាំងពីមានវ័យ ១៥ ឆ្នាំមក ចន្លោះពីឆ្នាំ ២០០០-២០០៧ នៅឯវត្តព្រះឥន្រ្ទទេព ស្ថិតនៅក្នុងសង្កាត់ គោកចក ក្រុងសៀមរាប ទើបនាំឲ្យលោក ឡោត ឡឹង វ័យ ៣៦ ឆ្នាំ បានសម្រេចចិត្តចាប់យករបរចារស្លឹករឹត តាំងពីឆ្នាំ ២០០១ មករហូតដល់ពេលបច្ចុប្បន្ន បើទោះបីជាមិនអាចជួយទ្រទ្រង់ជីវភាពចិញ្ចឹមគ្រួសារបានល្អយ៉ាងណាក្តី។
លោក ឡោត ឡឹង អតីតធ្លាប់បួសចំនួន ២ លើក នៅចន្លោះឆ្នាំ ២០០០ ដល់ឆ្នាំ ២០០៧ និងបានប្រកបរបរចារស្លឹករឹតតាំងពីឆ្នាំ ២០០១ មកដល់សព្វថ្ងៃ ដើម្បីចិញ្ចឹមប្រពន្ធកូន ខណៈប្រពន្ធក៏ប្រកបរបរលក់អំបោស មានកូនស្រី ៣ នាក់ បានប្រកាន់ជាប់នូវមុខរបរអ្នកចារស្លឹករឹត តរៀងមកក៏ព្រោះតែមានក្តីស្រឡាញ់ចូលចិត្ត និងចង់ថែរក្សាកេរមតកវប្បធម៌អក្សរសាស្រ្តខ្មែរនេះ កុំឲ្យបាត់បង់ នៅក្នុងតំបន់របស់ខ្លួន គឺភូមិសំរោង ឃុំលាងដៃ ស្រុកអង្គរធំ ខេត្តសៀមរាប ដោយសព្វថ្ងៃនៅសេសសល់ប្រមាណ ៣-៤ នាក់តែប៉ុណ្ណោះ ដែលចេះចារស្លឹករឹតនេះ។
ទោះបីពុំសម្បូរអ្នកគាំទ្រស្នាដៃចារស្លឹករឹតមែនក្តី តែអ្នកជាវមានលក្ខណៈបែបចម្រុះវ័យ និងសណ្ឋាន គឺមានព្រះសង្ឃ លោកតាលោកយាយ និងអតីតជាអ្នកបួសរៀនមានវ័យចន្លោះ ២៥-៣០ ឆ្នាំ មកជាវទៅតាមតម្រូវការ ដើម្បីប្រគេនព្រះសង្ឃ តាមទីអារាមនានា ឬរក្សាទុកជាសំណៅឯកសារផ្ទាល់ខ្លួន ខណៈមាន ៣ ខ្នាតសម្រាប់ជាវ។
លោក ឡោត ឡឹង ឲ្យដឹងថា៖ «១ ថ្ងៃខ្ញុំអាចចារបាន ៥ ទៅ៦ សន្លឹក ដែលជាការចារអក្សរមាន ៥ជួរ។ ខ្នាតនៃសន្លឹកនោះ មាន ៣ ខ្នាត គឺខ្នាតធំមានទំហំ ៦ ហ៊ុនx ៥,៥ តឹក ខ្នាតមធ្យម ៥ ហ៊ុន x ៥,៥ តឹក និងខ្នាតតូច ៤,៥ ហ៊ុនx ៥,៥ តឹក។ ចំពោះតម្លៃវិញ គឺគិតតម្លៃ ១ សន្លឹក ១៥ ០០០ រៀល ឬអាចមានតម្លៃចន្លោះ ១៣ ០០០ រៀល ឬ ១៤ ០០០ រៀល ក្នុង ១ សន្លឹកដែរ ដោយសារភាគច្រើន អ្នកជាវពួកគាត់ក៏សុទ្ធតែជាអ្នកមានជីវភាពលំបាកដែរ តែដោយសារចិត្តស្រឡាញ់សិល្បៈវប្បធម៌មួយនេះ ទើបមកជួយជាវខ្ញុំ»។
លោកបានបន្តថា៖ «ភាគច្រើន ខ្ញុំទទួលកុម្ម៉ង់ជាដុំតែប៉ុណ្ណោះ ដែលប្រើពេលវេលា ២-៣ ខែ ទើបអាចចារចប់នូវសាច់រឿងទៅតាមការកុម្ម៉ង់របស់ភ្ញៀវ ហើយរយៈពេលនេះ ខ្ញុំក៏អាចចារបានចំនួនប្រមាណ ៤០០ សន្លឹកតែប៉ុណ្ណោះ»។
យ៉ាងណា ការចារស្លឹករឹតនេះ មិនត្រឹមតែពិបាកក្នុងការរកប្រាក់ ដើម្បីទ្រទ្រង់ជីវភាពគ្រួសារនោះទេ ថែមទាំងលំបាកខ្លាំង និងឆ្លងកាត់ដំណាក់កាលច្រើនទើបអាចបានស្លឹករឹតស្ងួតល្អអាចចារអក្សរបានដោយត្រូវបើពេលប្រមាណ ១ ខែឯណោះ។
លោក ឡោត ឡឹក ក៏បានឲ្យដឹងពីដំណើរពេលដំបូងនៃការចារសឹ្លករឹតដែរថា៖ «ក្រោយពីកាប់យកស្លឹករឹតស្រស់ៗ ដែលសម្បូរនៅឆ្ងាយ គឺតំបន់ស្រុកឆែប ខេត្តព្រះវិហារឯណោះមកនោះ គឹយើងត្រូវកាប់ច្រៀក ឬសៀតសិន មុនយកទៅហាលថ្ងៃ ប្រើពេល ១ ខែ។ យើងក៏ត្រូវការឆ្អើរបាន ១-២ ថ្ងៃដែរ ទើបធ្វើឲ្យស្លឹករឹតស្ងួតល្អ និងអាចយកមកចារអក្សរបាន»។
ព្រោះតែទឹកចិត្តស្រឡាញ់ និងចង់ថែរក្សាមរតកវប្បធម៌ខ្មែរមួយនេះ កុំឲ្យបាត់បង់ដោយសារខ្វះអ្នករៀនសូត្របន្ត និងខ្វះការគាំទ្រនោះ ទើបលោក ឡោត ឡឹង សំណូមពរឲ្យមានការជួយគិតគូរពីថ្នាក់ក្រសួង ឬមន្ទីរពាក់ព័ន្ធផងដែរ។
លោក ឡោត ឡឹង បង្ហើបជាសំណូមពរថា៖ «ទៅថ្ងៃមុខ ចង់ឃើញមានការគាំទ្រពីថ្នាក់ក្រសួង ឬមន្ទីរដែលពាក់ព័ន្ធ សូមឲ្យមានការជួយរកវិធីជួយរក្សានូវមរតកវប្បធម៌អក្សរសាស្រ្តមួយនេះ កុំឲ្យបាត់ ព្រោះថា សព្វថ្ងៃបើនៅតំបន់ខ្ញុំ គឺកាន់តែខ្សត់អ្នកចេះ។
បច្ចុប្បន្ន អ្នកចេះចារស្លឹករឹត នៅក្នុងស្រុកអង្គរធំ មានសល់ត្រឹមតែ ៣-៤ នាក់តែប៉ុណ្ណោះ ដែលចេះចារ ដោយក្នុងនោះរាប់ទាំងខ្ញុំដែរ។ សម្រាប់នៅក្នុងឃុំលាងដៃវិញ មានតែរូបខ្ញុំទេ ហើយខ្ញុំក៏បានឆ្លៀតបង្រៀនក្មេងៗ ដែលស្រឡាញ់ និងចង់ចេះចារស្លឹករឹតនេះបានចំនួន ១០ នាក់ ហើយមកដែរ។ ក្នុង ១០ នាក់ នោះមានក្មេងប្រុស ៩ នាក់ និងក្មេងស្រី ១ នាក់ ដែលជាកូនស្រីច្បងរបស់ខ្ញុំមានវ័យ ១១ ឆ្នាំហើយ»។
ការចារអក្សរលើស្លឹករឹតនេះ ភាគច្រើនជាកម្រងសំណេរនៃសាច់រឿងរបស់ព្រះពុទ្ធប្រវត្តិ ដែលមានក្នុងគម្ពីរព្រះត្រៃបិដក មានដូចជាតំណាលរឿងព្រះវេសន្តរជាតក និងក្បួនច្បាប់នានា ដែលនិយាយពីព្រះពុទ្ធឱវាទ។
តែទៅថ្ងៃមុខលោកក៏មានជម្រើសសម្រាប់ភ្ញៀវ ដែលចង់ចារអក្សរជាសារជូនពរ នាថ្ងៃឱកាសពិសេសៗនានា ក្នុងសម័យទំនើបនេះដែរ ដូចជាខួបកំណើត ជាដើមបានផងដែរ ប្រសិនមានបំណងចង់បាន ហើយអាចទំនាក់ទំនងបានតាមរយៈលេខទូរស័ព្ទ 069 909 107 និងហ្វេសប៊ុកឈ្មោះថា អ្នកចារស្លឹករឹតស្រុកអង្គរធំ៕