.jpg)
អ្នកស្រី លឹម សុភាព ជាគ្រួសារកសិករដំបូង នៅក្រុងប៉ៃលិន ដែលប្រកបរបរដាំទំពាំងបារាំង។ រូប សហការី
ក្រុងប៉ៃលិន៖ កាលពីពេលសាកល្បងដាំទំពាំងបារាំងលើកដំបូងនៅឆ្នាំ ២០១៦ គ្រួសារអ្នកស្រី លឹម សុភាព ត្រូវបានអ្នកជិតខាងនៅក្នុងភូមិ ពេបជ្រាយថា មិនដឹងដាំហើយ យកទៅលក់ឲ្យអ្នកណា ឬឲ្យអ្នកណាទទួលទាន ព្រោះវាជាប្រភេទដំណាំបន្លែបរទេស តែមិនឈ្នះសេចក្តីព្យាយាម និងការខំជម្នះដាំរហូតដល់បានផល និងមានទីផ្សារលក់ ដើម្បីជីវភាពគ្រួសារបានសមរម្យរហូតដល់បច្ចុប្បន្ន។
បច្ចុប្បន្នដំណាំទំពាំងបារាំងនេះ មានកសិករចំនួន ១១ ក្រុមគ្រួសារហើយបានកំពុងតែដាំ ខណៈទីផ្សារលក់វិញគឺខេត្តបាត់ដំបង ខេត្តកំពង់ឆ្នាំង និងរាជធានីភ្នំពេញ ក្រៅពីនៅក្រុងប៉ៃលិននោះ ហើយការលក់បោះដុំឲ្យម៉ូយជាប្រចាំនោះមានចន្លោះពី ៥០-៦០ គីឡូក្រាម ក្នុង ១ ថ្ងៃ សម្រាប់គ្រួសារអ្នកស្រី លឹម សុភាព។
ទំពាំងបារាំងអាចលក់បានប្រាក់ពី ១០-២០ម៉ឺនរៀលក្នុង១ថ្ងៃ។ រូប សហការី
អ្នកស្រី លឹម សុភាព បានរៀបរាប់ពីរយៈពេលដាំ និងការប្រមូលផលថា៖ «ដំណាំនេះ វានឹងឲ្យផលក្នុងពេលចន្លោះពី ៤-៦ ខែ តែប្រសិនបើមានការថែទាំល្អនោះ ត្រឹមពេល ៤ ខែ វានឹងឲ្យផលហើយ។ រីឯការប្រមូលផលវិញអាចមានរយៈពេល ៣-៦ ខែ ឯណោះ។ សម្រាប់គ្រួសារខ្ញុំ កាលពីដាំនៅលើដីមានទំហំ ២ ៤០០ ម៉ែត្រការ៉េ នោះវាអាចប្រមូលផលទំពាំងបារាំង ចន្លោះ ពី ១០-២០ គីឡូក្រាម ក្នុង ១ ថ្ងៃ ឬអាចលក់បានប្រាក់ចន្លោះពី ១០ ម៉ឺនរៀល ទៅ ២០ ម៉ឺនរៀល ក្នុង ១ ថ្ងៃ។ ចំពោះការដាំវិញ ដូចជាមិនលំបាកឡើយ គ្រាន់តែទាមទារការថែទាំឲ្យបានដិតដល់ដោយមានទឹកគ្រប់គ្រាន់ ប្រើជីសរីរាង្គ និងបច្ចេកទេសថែទាំវា នាពេលដាំដំបូងតែប៉ុណ្ណោះ»។
សព្វថ្ងៃនេះ អ្នកស្រី លឹម សុភាព ក្រៅពីដាំខ្លួនឯងលក់ឲ្យម៉ូយតាមខេត្តនានា ដូចជាខេត្តបាត់ដំបង ខេត្តកំពង់ឆ្នាំង និងរាជធានីភ្នំពេញប្រចាំហើយនោះ ក៏មានប្រមូលទិញបន្តពីគ្រួសារកសិករប៉ុន្មានគ្រួសារផ្សេងៗទៀតដែរ។ ចំពោះតម្លៃលក់ឲ្យម៉ូយជាប្រចាំ តាមផែនគឺផែនលេខ ១ លក់តម្លៃ ១២ ០០០ រៀល ក្នុង ១ គីឡូ ខណៈផែនលេខ ២ លក់តម្លៃ ១០ ០០០ រៀល ក្នុង ១ គីឡូ។
អត្ថប្រយោជន៍នៃទំពាំងបារាំងនេះវិញ ត្រូវអ្នកស្រី លឹម សុភាព បង្ហើបថា៖ «បើខាងបរទេស គេនិយមអាំង និងចំហុយ ហូបជាមួយម្ហូបដែលចូលចិត្ត។ តែសម្រាប់ប្រជាជនខ្មែរវិញ ឃើញមានគេប្រើច្រើនតម្រូវការ ក្នុងការទទួលទាន រួមមានដូចជាការរុំប្រហិតចៀន ឆាជាមួយសាច់គោ សាច់ជ្រូក ឬឆាប្រេងខ្យង ឬប្រើជាបន្លែផ្ទាប់មាន់ដុត មាន់អាំងក៏បាន ខណៈវាជាបន្លែមានរសជាតិផ្អែមស្រាល»។
កសិករចំនួន ១១ គ្រួសារ កំពុងដាំទំពាំងបារាំងនេះ ដើម្បីរកប្រាក់ដោះស្រាយជីវភាពគ្រួសារបានសមរម្យ ស្ថិតនៅភូមិក្រចាប់ សង្កាត់អូរតាវៅក្រុង និងខេត្តប៉ៃលិន ហើយបើចាប់អារម្មណ៍ចង់ទិញទំពាំងបារាំង បងស្រី លឹម សុភាព អាចទំនាក់ទំនងតាមទូរស័ព្ទលេខ 071 462 3312៕
