The Phnom Penh Post Search

Search form




Logo of Phnom Penh Post newspaper Phnom Penh Post - របាំ​សហ​សម័យ ​ប្រដាល់សេរី ស្ដែង​ពី​​ជីវ​ភាព​ដ៏​កម្សត់​របស់​កីឡាករ​ខ្មែរ




របាំ​សហ​សម័យ ​ប្រដាល់សេរី ស្ដែង​ពី​​ជីវ​ភាព​ដ៏​កម្សត់​របស់​កីឡាករ​ខ្មែរ

Content image - Phnom Penh Post
របាំ​សហសម័យ ប្រដាល់​សេរី ដែល​ជា​សំយោគ​រវាង​របាំ​ល្ខោន​​ និង​​ក្បាច់គុន​ខ្មែរ​។ Amrita

របាំ​សហ​សម័យ ​ប្រដាល់សេរី ស្ដែង​ពី​​ជីវ​ភាព​ដ៏​កម្សត់​របស់​កីឡាករ​ខ្មែរ

ភ្នំពេញៈ​ នាថ្ងៃ​សុក្រ​ទី ១៨ និង​ថ្ងៃសៅរ៍ទី ១៩​ ខែ​ធ្នូ​ឆ្នាំ ២០១៥ ខាង​មុខ​នេះ​ នឹង​មាន​ការ​បង្ហាញ​នូវ​របាំ​សហ​សម័យ​ដ៏​​ថ្មី​សន្លាង​មួយក្រោម​ចំណង​ជើង​ថា​ «ប្រដាល់​សេរី»​ ដែល​ត្រូវ​សម្តែង​នៅ​ឯ​នាយក​ដ្ឋាន​សិល្បៈ​​ទស្សនី​យ​ភាព​ រាជធានី​ភ្នំពេញ​វេលាម៉ោង ៧ យប់។

របាំ​សហ​សម័យ ​«ប្រដាល់​សេរី»​ នេះ ​គឺ​ជា​ការ​សំយោគ​រវាង​របាំ​ល្ខោន និង​ក្បាច់គុន​ខ្មែរ​ ដោយ​មាន​ការ​និទាន​រឿង​ចូល​គ្នា​លើក​​ឡើង​អំពី​ប្រវត្តិ​របស់​អ្នក​ប្រដាល់​ខ្មែរ​ ដែល​បង្ហាញ​នូវ​ជីវ​ភាព​ និង​ការ​តស៊ូ​ដ៏​ស្វិតស្វាញ​នៅ​លើ​សង្វៀន​ប្រដាល់​​នៅ​ប្រទេស​កម្ពុជា​នាពេល​បច្ចុប្បន្ន​។

អ្នក​នាង អាលីហ្សា ហាមេត ប្រធាន​គ្រប់​គ្រង​ផ្នែក​ទំនាក់ទំនង​នៃ​អង្គ​ការ​អម្រឹតា​សិល្បៈ​ ឲ្យ​ដឹង​​ថា៖ «ការសម្តែង​នេះ​មាន​​គោល​បំណង​​ជំរុញ​ទឹកចិត្ត​ឲ្យ​អ្នក​ដំឡើង​របាំ​ខ្មែរ​ជំនាន់​ក្រោយ​ធ្វើ​ការ​ស្វែង​យល់​ និង​ពិចារណា​លើ​កេរមរតក​វប្បធម៌​របស់​ខ្លួន​»។

អ្នកនាង​បាន​រៀបរាប់​ឲ្យ​ដឹង​ពី​កំណើត​នៃរបាំ​សហសម័យ​ឈ្មោះ​ ​ប្រដាល់សេរី ​នេះ​ថា ​គឺ​ជា​លទ្ធផល​នៃ​កិច្ច​សហ​ការ​សិល្បៈ​រវាង​សិល្បករ​សិល្បការិនី​របស់អង្គ​ការ​អម្រឹតា​សិល្បៈ​ ខណៈ​អ្នក​ដំឡើង​របាំ​នេះ​ជាកូន​កាត់​ខ្មែរបារាំង​ ភួន ម៉ានូ និង​អ្នក​​កទេស​ដំណើរ​រឿង​របាំ​ជន​ជាតិ​ម៉ាឡេស៊ី លីម ហោងេន។

ដោយ​ឡែក​អង្គ​ការ​អម្រឹតា​សិល្បៈ​ និង​ ភួន ម៉ានូ បានសហ​ការ​គ្នា​​ជា​យូរ​មក​ហើយ​ ខណៈ​កាលពី​ឆ្នាំ ២០០៩ បាន​ទទួល​ថវិកា​គាំទ្រមក​ពី​ក្រុម​ប្រឹក្សា​វប្បធម៌​អាស៊ី​ ក្នុង​ការ​ដំឡើង​​ Khmeropedies (ការ​សម្តែងរបាំ​បីវគ្គ)​។ ​

ភួន ម៉ានូ និង​សិល្បករ​អង្គ​ការ​អម្រឹតា​សិល្បៈ ផុន សុភាព​ ដែល​បាន​ប្រើ​ពេល​វេលា​ជិត​ពីរ​ឆ្នាំ​ក្នុង​ការ​ហ្វឹកហាត់ ស្រាវ​ជ្រាវ​ ក៏​ដូច​ជា​ហាត់​សម​ នឹង​អ្នកនាំ​ហាត់​សម​ជា​មួយ​នឹង​សិល្បករ​បី​រូប​ដូច​ជា​ ខុន ច័ន្ទសិទ្ធិការ្យ ង៉ែត រ៉ាឌី និង នួន​ សុវិទូ​ឍ រួម​ជា​មួយ​តន្ត្រី​ករ​ពីរ​រូប​គឺ កែវ ដូរីវណ្ណ និង​ ខុន ច័ន្ទស៊ីណា។

នាង អាលីហ្សា ហាមេត បាន​ឲ្យ​ដឹង​ទៀត​ថា៖ «របាំសហ​សម័យ​ប្រដាល់​សេរី​នេះ នឹង​ឆ្លុះ​បញ្ចាំង​ពី​មុខ​មាត់​ ភាព​ជោគជ័យ និង​ឧប​សគ្គ​នៃ​ទម្រង់​សិល្បៈ​គុនខ្មែរ​មួយ​នេះ​ដែល​ជា​ចំណុច​ប្រសព្វ​ចាក់​ស្រែះ​រវាង​ជីវិតសេដ្ឋកិច្ច និង​កីឡា​។ ស្នាដៃ​នេះ​នឹង​បរិយាយ​ពីស្ថាន​ភាព​រស់​នៅ​ជាក់​ស្តែង​របស់​កីឡាករ​ប្រដាល់​ដោយ​ជា​ទូ​ទៅ​ពុំ​សូវ​ត្រូវ​បាន​គេ​ចាក់​ផ្សាយ​តាម​ទូរទស្សន៍​ ឬ​ដឹង​ឮដល់​ទស្សនិកជន​ឡើយ ក្រៅ​ពី​បាន​ជ្រាប​ត្រឹម​តែ​ជីវិត​លើ​សង្វៀន​ប្រដាល់»។ ​

សំបុត្រ​ទស្សនា​តម្លៃ $៥ សម្រាប់​មនុស្ស​ធំ និង​សិស្ស និស្សិត​តម្លៃ $ ២,៥ ដែល​អាច​រក​ជាវ​បាន​​នៅទី​ស្នាក់​ការ​អង្គ​ការ​អម្រឹតា​សិល្បៈ និង​នៅ​អាហារដ្ឋាន ​Java Cafe ចាប់​ពីពេល​នេះ​តទៅ៕​

អត្ថបទគួរចាប់អារម្មណ៍