.jpg)
អ្នកស្រី ផូ សុផា អាយុ ៣៥ ឆ្នាំ និងស្នាដៃច្នៃដបទឹកសុទ្ធធ្វើជាគ្រឿងតុបតែងលម្អដ៏ស្អាតប្លែក។ សហការី
ប៉ោយប៉ែត៖ ដូចគ្នានឹងបងប្អូនដទៃទៀតដែរក្នុងអំឡុងពេលកូវីដ មុខរបរលក់ឡេអនឡាញ និងឥវ៉ាន់ចាប់ហួយរបស់អ្នកស្រី ផូ សុផា គឺដំណើរការមិនសូវល្អ។ ប៉ុន្តែជាជាងយកពេលវេលាទៅគិតលើភាពអវិជ្ជមាននៃផលប៉ះពាល់ អ្នកស្រីបានយកពេលទៅកែច្នៃដបទឹកសុទ្ធធ្វើជាផើងផ្កា និងរបស់តាំងលម្អយ៉ាងប្លែកភ្នែកគួរឱ្យកោតសរសើរ។
ការតាំងចិត្តផ្ដើមចេញពីជាការកែអផ្សុក និងរំសាយភាពស្មុគស្មាញទៅជាមុខរបរផ្ដល់ប្រាក់ចំណូលមួយបន្ថែមទៀត ដែលអ្នកស្រីមិននឹកស្មានដល់។
អ្នកស្រី សុផា មានទីលំនៅបច្ចុប្បន្ននៅប៉ោយប៉ែតរូបនេះបានប្រាប់ភ្នំពេញប៉ុស្តិ៍ពីគំនិតផ្ដួចផ្ដើមនៃការកែច្នៃដបទឹកសុទ្ធថា៖ «ដំបូងខ្ញុំប្រទះឃើញវីដេអូមួយបង្ហាញពីរបៀបកែច្នៃដបទឹកសុទ្ធ។ ចៃដន្យខ្ញុំសម្បូរដបទឹកសុទ្ធដែលប្រើរួចច្រើនដែរហើយមិនបានយកទៅលក់។ ព្រោះធ្លាប់លក់យកឱ្យគេទាំងបាវៗតែបានកម្រៃមកវិញតិចតួចបំផុត»។
អ្នកស្រីបន្តថា៖ «ស្របពេលអាជីវកម្មមិនអំណោយផលល្អនៅផ្ទះក៏ស្មុគ ខ្ញុំក៏សម្រេចចិត្តយកដបទឹកសុទ្ធមកសាកល្បងធ្វើ ដោយរៀនមើលពីរបៀបគេតភ្ជាប់ខ្លះៗតែមិនបានយកម៉ូដដូចគេទេ ព្រោះគិតថាចង់ធ្វើអីដែលថ្មីជាងសម្រាប់យកមកដាក់តាំងផ្ទះ»។
រយាលពីរបរលក់ឡេ និងចាប់ហួយ អ្នកស្រី សុផា ច្នៃដបទឹកសុទ្ធតែងផ្ទះយ៉ាងស្អាត ។ សហការី
ការកែច្នៃនេះអ្នកស្រីចាប់ផ្ដើមបានជាង ១ ឆ្នាំហើយ។ ដំបូងៗដបទឹកសុទ្ធអ្នកស្រីយកតែរបស់ដែលខ្លួនប្រើរួចមកច្នៃ ប៉ុន្តែក្រោយមកអ្នកស្គាល់ៗគ្នាគេឃើញអ្នកស្រីធ្វើហើយស្អាតគួរឱ្យចាប់អារម្មណ៍។ ជំនួសឱ្យការបោះចោលជាង ១០ ផ្ទះពួកគេចាប់ផ្ដើមប្រមូលទុកឱ្យអ្នកស្រី និងមានមិត្តភក្តិផ្សេងៗទៀតតែក៏មានមួយៗដែរ ដែលអ្នកស្រីត្រូវទិញ។
ផលិតផលច្នៃរួចដំបូងអ្នកស្រីដាក់តែក្នុងផ្ទះ និងកន្លៀតក្រោយផ្ទះ ប៉ុន្តែធ្វើកាន់តែយូរទៅកាន់តែច្រើនឡើងអ្នកស្រីក៏យកវាមកដាក់តែងមុខផ្ទះ ពេលនោះមានបងប្អូនជិតៗសួរនាំច្រើនដោយការចាប់អារម្មណ៍។
ពេលរៀបតាំងមើលឃើញថាស្អាត អ្នកស្រីក៏យករូបទៅបង្ហោះលេង ដែលនាំឱ្យមានបងប្អូនក្នុងបណ្ដាញសង្គមចែករំលែកតៗគ្នាច្រើនហើយប្រាប់ថាស្អាតប្លែក និងជាការជួយដល់បរិស្ថានទៀតផង។
អ្នកស្រី សុផា បានរៀបរាប់ថា៖ «ខ្ញុំគិតទៅម្យ៉ាងដែរ។ វាជារឿងនឹកស្មានមិនដល់មិនរំពឹងទុកថាគេឱ្យតម្លៃដបទឹកសុទ្ធដែលធម្មតាគ្រាន់តែជាសំរាមមួយសោះអ្នកខ្លះក៏ប្រាប់ថាពួកគេក៏ចង់ធ្វើតាមដែរ»។
ការដាក់តាំងនោះទៀតសោតអ្នកស្រីថាវាគ្រាន់តែជាក្ដីសុបិនមួយចង់មានសួនច្បារ ទើបចេះតែរៀបលម្អ។ ដបទឹកសុទ្ធត្រូវបានច្នៃស្រោបចេញជារូបផ្កាផ្សេងៗជុំវិញផើង ដែលមានដាំផ្កាម៉ោង ១០ មានពណ៌ចម្រុះ ដើម្បីជាការលម្អផ្ទះ និងកម្សាន្តភ្នែក។
ផ្ដើមចេញពីជាការកែអផ្សុក ការច្នៃដបទឹកសុទ្ធក្លាយជាមុខរបរផ្ដល់ប្រាក់ចំណូលមួយបន្ថែម។ សហការី
អ្នកដំណើរដែលជិះកាត់តែងតែនាំគ្នាក្រឡេកមើល និងកោតសរសើរស្នាដៃអ្នកស្រី។
ដោយមានការជំរុញលើកទឹកចិត្តពីបងប្អូនណែនាំប្រាប់ឱ្យអ្នកស្រីសាកបើកលក់ការកែច្នៃ អ្នកស្រីក៏ចាប់ផ្ដើមដាក់លក់ដបទឹកសុទ្ធកែច្នៃលម្អ ដោយមានអតិថិជនសួរនាំ និងមកទិញជាហូរហែ។
អ្នកស្រី ផូ សុផា បានប្រាប់ថា៖ «នៅប៉ោយប៉ែតក៏មានខាងផ្ទះបុរាណគេទិញយកទៅថតហើយ និងប្រាប់ថានេះជាសមិទ្ធផលស្នាដៃខ្មែរពិតៗ ដូចជាមានខាងហាងកាហ្វេ គេទិញយកទៅលម្អហាងគេផងដែរ»។
សម្រាប់អតិថិជនឆ្លងខេត្តដែលចង់បានផលិតផលស្នាដៃអ្នកស្រីក៏មានសេវាដឹកជូនដែរ។
តម្លៃផើងតូចគឺ ១ តម្លៃ ១៥ ០០០ រៀល កណ្ដាល ២០ ០០០ រៀល និងផើង ៣ ជាន់ ៣៥ ០០០ រៀល ដែលអតិថិជននឹងទទួលបានទាំងផើងទាំងផ្កា និងការច្នៃម៉ូដតែម្ដង។ ចំណែកឯដំបងភ្លើងគឺ ១០ ម៉ឺនរៀល។
ស្ត្រីវ័យ ៣៥ ឆ្នាំរូបនេះបានចែកចាយពីអារម្មណ៍របស់អ្នកស្រីពេលទទួលបានការគាំទ្រពីបងប្អូនថា៖ «ខ្ញុំមានអារម្មណ៍ថាសប្បាយចិត្ត និងរំភើបយ៉ាងខ្លាំងចំពោះទឹកចិត្តគាំទ្រពីបងប្អូនខ្មែរ។ ពីមនុស្សដែលមិនមានគេចាប់អារម្មណ៍អ្វីសោះខ្ញុំអាចបានចេញតាមកាសែត តាមប៉ុស្តិ៍ខ្ញុំរីករាយណាស់ដែលអាចចែករំលែកនូវអ្វីដែលខ្ញុំបានធ្វើ»។
ផើងផ្ការចនាបន្ថែមដោយដបទឹកសុទ្ធមានតម្លៃចាប់ពី ១៥ ០០០ រៀល ។ សហការី
អ្នកស្រីបន្តទាំងរំភើបទៀតថា៖ «លើសពីនេះអ្នកខ្លះក៏ប្រាប់ថានឹងជួយជាថវិកាដល់អាជីវកម្មច្នៃដបទឹកសុទ្ធខ្ញុំបើខ្ញុំខ្វះខាតអ្វី ហើយប្រាប់ឱ្យខ្ញុំខំប្រឹងនឹងមានអនាគតល្អ សម្រាប់មុខរបរនេះតស៊ូឡើង។ សម្តីទាំងអស់នេះហើយដែលជាកម្លាំងចិត្តឱ្យខ្ញុំបន្តធ្វើទៅមុខទៀត»។
អ្នកស្រីប្រាប់ថាពេលចប់វិបត្តិកូរ៉ូណា អ្នកស្រីនឹងពង្រីកអាជីវកម្មដោយនឹងរើទៅកន្លែងដែលធំជាងទីកន្លែងបច្ចុប្បន្នដោយសង្ឃឹមថាអាជីវកម្មនេះនឹងរឹតតែល្អប្រសើរឡើង។
យ៉ាងណាមិញ អ្នកស្រីបានលើកពីផលវិបាកផងដែរថា៖ «ប៉ុន្តែខ្ញុំធ្វើតែម្នាក់ឯង។ ខ្ញុំគិតថាបើច្នៃលក់អ៊ីចឹងវាហត់ហើយមិនងាយទេ។ ថ្ងៃមុខខ្ញុំមានគំនិតរៀបចំជាសួនដាំផ្កា និងច្នៃរូបរាងផ្សេងប្លែកៗឱ្យស្អាតថែមទៀតដោយគេអាចចូលមកអង្គុយកម្សាន្ត ថតលេងបានដោយគិតសេវាខ្លះ។ ធ្វើដូចនេះយើងបានលុយហើយរបស់យើងនៅតែជារបស់យើង»។
អ្នកស្រីបានផ្ដែផ្ដាំទៀតថា៖ «ខ្ញុំចង់ឱ្យបងប្អូនកុំចោលប្លាស្ទិក ដបទឹកសុទ្ធពាសវាលពាសកាល។ បើយើងអផ្សុកយើងអាចកែច្នៃធ្វើជាអ្វីមួយដែលមានប្រយោជន៍។ បើចង់ធ្វើខ្ញុំលើកទឹកចិត្តឱ្យធ្វើមិនបាច់ថាដូច ឬមិនដូចគេទេ ដើម្បីរួមគ្នាជួយបរិស្ថានយើង និងជុំវិញផ្ទះរៀងៗខ្លួន»។
សម្រាប់ព័ត៌មានបន្ថែមពីស្នាដៃច្នៃដបទឹកសុទ្ធរបស់អ្នកស្រី ផូ សុផា សូមទំនាក់ទំនងទៅកាន់ទូរស័ព្ទលេខ ០៨៨ ៩៩៩ ១២៨ ៩៕
តម្លៃផើងចាប់ពី ១៥ ០០០ រៀល ហើយអតិថិជននឹងទទួលបានទាំងផើង និងផ្កា។ សហការី
អ្នកស្រីយករូបដបទឹកសុទ្ធច្នៃទៅបង្ហោះលេងនាំឱ្យមានការចែករំលែកតៗគ្នា។ សហការី
