ក្រុងហូជីមិញ: ដើម្បីរំឭកដល់មនុស្សថា សូម្បីតែរបស់ប្លាស្ទិកតូចមួយក៏អាចធ្វើឲ្យប៉ះពាល់បរិស្ថាន សិល្បករកាណាដា បេនចាមីន វ៉ុន វ៉ុង បានរំលេចស្នាដៃសិល្បៈរបស់ខ្លួនជាការដំឡើងនូវរលកសិប្បនិម្មិតធ្វើពីបំពង់បឺតប្លាស្ទិក ១៦៨០០០ ដើមនៅ Estella Place ឯទីក្រុងហូជីមិញ ប្រទេសវៀតណាម។
បំភ្លឺដោយអំពូល LED ស្នាដៃសិល្បៈរលកពណ៌ខៀវលាយ ស បោកបក់យ៉ាងរស់រវើកកម្ពស់ ៣,៣ ម៉ែត្រដែលអាចបង្កើតកំណត់ត្រាហ្គីនណេសពិភពលោក ជាស្នាដៃសិល្បៈដែលធ្វើពីទុយោប្លាស្ទិកដ៏ធំបំផុតក្នុងលោក។
សិល្បករលោក បេនចាមីន បានលើកឡើងថា៖ «មនុស្សជាង ៨ ពាន់លាននាក់សុទ្ធតែគិតថាគ្រាន់តែទុយោប្លាស្ទិកមួយមានទៅស្អី?»។
ដោយមិនបានប្រើប្រាស់លុយកាក់ទិញទុយោថ្មីមកបង្កើតស្នាដៃសិល្បៈឡើយ។ ដោយសហការជាមួយ Zero Waste Saigon ហាងកាហ្វេ Starbucks Vietnam និងអ្នកស្ម័គ្រចិត្តជាច្រើននាក់ទៀត លោកអាចប្រមូលបាន ១៦៨ ០០០ ដើមដោយប្រើរយៈពេលប្រមាណ ៦ ខែ។
លោក បេនចាមីន បានសរសេរថា៖ «បញ្ហាប្លាស្ទិកជារឿងដែលភ្នែកមើលមិនឃើញហើយខួរក្បាលមិនបានគិតដល់ ខណៈវាជាបញ្ហាប៉ះពាល់បរិស្ថានដែលកើតឡើងគ្រប់ទីកន្លែង»។
ទោះបីជាការបំពុលបរិស្ថានដោយសារទុយោប្លាស្ទិកត្រូវបានគេចាត់ទុកថាជាទឹកមួយតំណក់ក្នុងធុង ប៉ុន្តែតាមការពិត វាជាប្លាស្ទិកដែលស្ទើរតែពុំអាចកែច្នៃប្រើប្រាស់ឡើងវិញ។ យោងតាមការ Plastic Pollution Coalition សហរដ្ឋអាមេរិកប្រើទុយោជាង ៥០០ លានដើមឯណោះក្នុង ១ ថ្ងៃ៕