.jpg)
ម៉ាស៊ីនក្នុងចង្វាក់ផលិតកម្មមានអាយុជាង ៩ ទសវត្សរ៍។ រូបថត AFP
ក្រុងគូឡាឡាំពួ៖ បុគ្គលិកម៉ាឡេស៊ីម្នាក់បានចាក់គ្រាប់កាហ្វេលីងចូលក្នុងឆ្នាំងទឹកពុះ បន្ថែមស្ករ ពេលម៉ាស៊ីនកូរគ្រឿងផ្សំទៅជាល្បាយខ្មៅលើរងើកភ្លើងដុតអុស។
ម៉ាស៊ីនកិនគ្រាប់កាហ្វេ Antong ដែលជឿថា ជារោងចក្រវ័យចំណាស់បំផុតមួយនៅប្រទេសម៉ាឡេស៊ី ត្រូវបានប្រើវិធីដូចគ្នាក្នុងការផលិតកាហ្វេដ៏ពេញនិយមអស់រយៈជិត ៩ ទសវត្សរ៍មកហើយ។
លោក ធៀន ប៊ុនឈុង ម្ចាស់រោងចក្រគ្រាប់កាហ្វេធុនតូចក្នុងទីក្រុងតៃពីង ប្រទេសម៉ាឡេស៊ី បានប្រាប់ទីភ្នាក់ងារ AFP ថា៖ «ខ្ញុំចង់ឲ្យក្មេងជំនាន់ក្រោយដឹងពីរូបរាងម៉ាស៊ីនផលិតកាហ្វេកាលពី ៥០ ឬ ១០០ ឆ្នាំមុន។ ខ្ញុំចង់ឲ្យពួកគេកោតស្ញប់ស្ញែងពីវិធីផលិតកាហ្វេបុរាណ»។
ម៉ាស៊ីនកិនគ្រាប់កាហ្វេនេះត្រូវបានផលិតឡើងដោយជីតារបស់លោក ធៀន និងមនុស្ស ២ នាក់ទៀត ក្នុងឆ្នាំ ១៩៣៣ គឺជាឧបករណ៍ឈើតូចដែលប្រក់ដំបូងសង្កសី។
វាផ្ទុកម៉ាស៊ីនសម្រាប់លីងគ្រាប់កាហ្វេ ឧបករណ៍ចម្រោះសម្បកគ្រាប់កាហ្វេ និងលាយជាមួយស្ករស។
សកម្មភាពផលិតកាហ្វេស្ករ នៅរោងចក្របុរាណដ៏ចំណាស់មួយក្នុងប្រទេសម៉ាឡេស៊ី។ រូបថត AFP
បរិក្ខារម៉ាស៊ីនដ៏ហួសសម័យបន្សល់នូវសភាពដើម ដែលមានប្រវត្ដិតាំងពីរោងចក្រចាប់ផ្ដើមប្រតិបត្ដិការដំបូង ថ្វីដ្បិតតែម៉ូទ័ររបស់វាត្រូវបានដាក់ជំនួសថ្មីក៏ដោយ។
កម្មករនៅរោងចក្រនេះប្រើអុសប្រមូលពីការដ្ឋានសំណង់ និងផ្ទះបាក់បែក ដើម្បីដុតកម្លោចគ្រាប់កាហ្វេ ដែលជះក្លិនឈ្ងុយភាយពេញភូមិ។
លោក ធៀន បាននិយាយថា កាហ្វេរំលីងអុសមានរសជាតិឆ្ងាញ់ជាងកាហ្វេផ្សេងៗទៀត។ លោកបានអះអាងថា៖ «វាមានរសជាតិពិសេសអ្វីម្យ៉ាងដែលពិបាកនឹងរៀបរាប់ប្រាប់»។
ក្លិនលីងកម្លោចកាហ្វេបុរាណសាយភាយពេញភូមិ។ រូបថត AFP
ក្រោយពីគ្រាប់កាហ្វេត្រូវបានលាយជាមួយស្ករ ល្បាយទាំងនេះក៏ត្រូវសម្ងួត និងកិនទៅជាម្សៅ មុនពេលច្រកដាក់កញ្ចប់ និងដាក់លក់នៅតាមភោជនីយដ្ឋាន និងអតិថិជនផ្សេងៗទៀត។
រោងចក្រផលិតកាហ្វេបែបបុរាណនេះអាចផលិតកាហ្វេបានរហូតដល់ ២ ពាន់គីឡូក្រាមក្នុង ១ ថ្ងៃ ដោយប្រើប្រាស់វត្ថុធាតុដើមគ្រាប់កាហ្វេពាក់កណ្ដាលជាធនធានក្នុងប្រទេស និងពាក់កណ្ដាលទៀតនាំចូលពីបរទេស។
ផលិតផលកាហ្វេផ្អែមដែលផលិតនៅរោងចក្រនេះមានប្រជាប្រិយភាពតាំងពីយូរយារនៅក្នុងប្រទេសម៉ាឡេស៊ី ជាទីដែលមនុស្សម្នាចូលចិត្ដទទួលទានកាហ្វេស្ករ និងរមែងលក់នៅតាមបណ្ដាភោជនីយដ្ឋាននានា៕ AFP/HR
