The Phnom Penh Post Search

Search form




Logo of Phnom Penh Post newspaper Phnom Penh Post - រស់​ដោយសារ​ខ្មោច ឯកសារ​ស្ដីពី​ជីវិត​ក្រោម​ដំបូល​ចេតិយ




រស់​ដោយសារ​ខ្មោច ឯកសារ​ស្ដីពី​ជីវិត​ក្រោម​ដំបូល​ចេតិយ

Content image - Phnom Penh Post
ឈុត​​ស្រ្តីមេម៉ាយ និង​កូនប្រុស​ យក​ចេតិយខ្មោចជា​ជម្រក​​។ Youtube

រស់​ដោយសារ​ខ្មោច ឯកសារ​ស្ដីពី​ជីវិត​ក្រោម​ដំបូល​ចេតិយ

ភ្នំពេញៈ ភាពយន្ត​ឯកសារ​រឿង «រស់​ដោយសារ​ខ្មោច»រយៈពេល ៧ នាទី ​ស្តី​ពី​​ជីវិត​ដ៏​សែន​​លំបាក​នៃ​ស្រ្តី​មេម៉ាយ​វ័យ ៥៤ ឆ្នាំ​ និង​កូន​ប្រុស​ដែល​គ្មាន​ទី​ជម្រក​ រស់​នៅ​អាស្រ័យ​ជាមួយ​​នឹង​មុខ​​របរ​ដើរ​រើស​កំប៉ុង ដប ​អេត​ចាយ​លក់ ហើយ​បាន​យក​ចេតិយ​ជា​ទី​កន្លែង​បញ្ចុះ​សព​មក​ធ្វើជា​​លំនៅឋាន​​នោះ​ បាន​ចាក់​បញ្ចាំង​ហើយ​​នៅ​ឯ​មជ្ឈមណ្ឌល​បុប្ផាណា កាល​ពី​ថ្ងៃទី​១១ ខែ​មេសា​កន្លងមក។

រឿង «រស់​ដោយសារ​ខ្មោច ឬ Home Cemetery»​ គឺ​ជា​វណ្ណកម្ម​របស់​ កញ្ញា ងឿម ផល្លី ផលិត​ឡើង​ក្រោម​គម្រោង​ពហុ​ប្រព័ន្ធ​ផ្សព្វ​ផ្សាយ​ និង​ជា​សមិទ្ធផល​ភាពយន្ត​ឯកសារ​ទី ១៥ ​​របស់​ផលិតកម្ម បុប្ផាណា ផង​ដែរ នៅ​ឆ្នាំ ២០១៦ នេះ។

Content image - Phnom Penh Post
​ទស្សនា​ភាពយន្ដ​ឯកសារ​រឿង​ «រស់ដោយសារខ្មោច» បាន​តាម​ប្រព័ន្ធ YouTube។ ផា លីណា

កញ្ញា កាស៊ូមិ អារ៉ាយ គឺជា​បុគ្គ​លិក​​ផ្នែក​ទំនាក់ទំនង​​​របស់​មជ្ឈម​ណ្ឌល​បុប្ផាណា​ឲ្យ​ដឹង​ពី​គម្រោង​ថា៖ «មជ្ឈ​មណ្ឌល​បុប្ផាណា បើក​ទូលាយ​សម្រាប់​បច្ចេក​វិទ្យា​ថ្មីៗ។ គំនិត​ផ្ដួច​​ផ្ដើម​ដំបូង​របស់​យើង​គឺ​គម្រោងនៃ​​ភាពយន្ត​ឯកសារ​ឈ្មោះ «មួយ​ដុល្លារ» ហើយ​បច្ចុប្បន្ន​នេះ​យើង​ក៏​មាន​គម្រោង​ផ្សេងៗ​ជា​ច្រើន​ទៀត​ក្នុង​ការ​​រៀប​ចំ​​នូវ​វគ្គ​​បណ្ដុះ​បណ្ដាល​ក្នុង​​ឆ្នាំ​២០១៤ និង​ឆ្នាំ​២០១៥។ យើង​ចង់​គាំទ្រ​ផង​ដែរ​​នូវ​ការ​ផលិត​ខ្លឹមសារ​ជា​​ប្រព័ន្ធ​​ឌីជីថល​នៅ​ជុំវិញ​​បញ្ហា ​​ដែល​គ្រប់​ដេប៉ាតឺមង់​​របស់​យើង​ជួប​ប្រទះរួម​មាន​ប្រវតិ្តសាស្ត្រ ​បេតិក​ភណ្ឌ​​សិល្បៈ​ បរិស្ថាន និង​ការ​​កែ​ប្រែ​​សង្គម។ បេសកកម្ម​របស់​​យើង គឺ​​ចង់​ឲ្យ​កម្ពុជា​​ ក៏​ដូចជា ប្រទេស​​កំពុង​​អភិវឌ្ឍន៍​ដទៃ​​ទៀត ដែល​​អាច​​គ្រប់​​គ្រង​​នូវ​ឧបករណ៍​​ ដូចជា​ប្រទេស​​អភិវឌ្ឍន៍ដែរ និង​​បោះ​​ជំហាន​​នៅ​ក្នុង​​ពិភព​​ប្រព័ន្ធ​​ផ្សព្វ​​ផ្សាយ»​។

បើ​តាម​សាច់​រឿង​​ផលិតករ​បង្ហាញ​បាន​ឲ្យ​ឃើញ​ថា តួ​អង្គ​ស្រ្តី​វ័យ​ ៥៤ ឆ្នាំ​ឈ្មោះ សារ៉ាន់ គឺ​ជា​ស្រ្តី​មេម៉ាយ បន្ទាប់​ពី​ប្តី​ស្លាប់​ចោល​គាត់ និង​កូន​ប្រុស​ម្នាក់​មាន​ជំងឺ​ប្រចាំ​កាយ​ ខណៈ​ដែល​គ្រួសារ​គាត់​ គឺជា គ្រួសារ​មួយ​ក្នុង​ចំណោម​ ៥៩ ​គ្រួសារ​នៃ​ពលរដ្ឋ​ក្រីក្រ ដែល​ត្រូវ​បាន​គេ​បណ្តេញ​ចេញ​ពី​លំនៅ​ឋាន​ខ្លួន​ដោយ​គ្មានឲ្យ​ប្រាក់​​សំណង។

Content image - Phnom Penh Post
ស្រ្តីមេម៉ាយ សារ៉ាន់ ដើររើសកំប៉ុង និងដប ក្នុងគំនរ​សំរាម។ Youtube

គ្មាន​ជម្រើស​ ស្រ្តី​មេ​ម៉ាយ និង​កូន​ប្រុស ក៏​បាន​សម្រេច​ទៅ​រស់​នៅ​ជ្រក​​កោន​ក្រោម​ដំបូល​ចេតិយ​ខ្មោចនៅ​​ក្នុង​បរិវេណ​វត្ត​​មួយ​ និង​មាន​មុខ​របរ​ដើរ​រើស​អេតចាយ​តាម​គំនរ​សំរាម​​តាម​ផ្លូវ​នានា​ ដោយ​មួយ​ថ្ងៃ​គាត់​អាច​រក​ប្រាក់​បាន​ពីការ​លក់​ កំប៉ុងភេសជ្ជៈ​ និង​ដបទឹក​សុទ្ធ​ មិន​ដល់​ ១ ដុល្លារ​ ឬស្មើ​ ៤០០០ រៀល​ផង។

ផលិត​ករ​ស្រី​វ័យ​ ២៦ ​ឆ្នាំ​ កញ្ញា ងឿម ផល្លី បាន​ចាប់​ផ្តើម​ការ​ងារមួយ​​នៅ​ឯ​មជ្ឈមណ្ឌល​បុប្ផាណា ​ជា​អ្នក​សរសេរ​រឿង និង​ជា​ជំនួយ​ការ​របស់​ផលិតករ​ដែល​ផលិត​រឿង «The Storm Makers» នៅ​​ឆ្នាំ ២០១១ ។

ឆ្នាំ​២០១៤​ កញ្ញា បាន​ទទួល​នូវ​​ការ​បណ្តុះ​បណ្តាល​មួយ​​ឆ្នាំ​​ក្នុង​កម្មវិធី Future Filmmakers របស់​បុប្ផាណា៕

អត្ថបទគួរចាប់អារម្មណ៍