.jpg)
បន្ទប់គេងរបស់លោក សុភ័ក្ត្រ បានធ្វើឲ្យមិត្តភក្ដិភ្ញាក់ផ្អើល ដោយសារមានការតាំងលម្អរុក្ខជាតិតូចធំ ជាច្រើនប្រភេទ។ រូបថត សហការី
ភ្នំពេញ៖ ការរស់នៅផ្ទះបិទជិតគ្មានបង្អួច ឬធ្វើការនៅក្នុងការិយាល័យ សម្បូរឧបករណ៍អេឡិចត្រូនិក និងមានម៉ាស៊ីនត្រជាក់តែខ្វះខ្យល់បរិសុទ្ធចេញចូល ហាក់ពុំសូវល្អដល់សុខភាពប៉ុន្មានទេ។
មើលឃើញពីតម្រូវការរុក្ខជាតិធម្មជាតិមកជំនួយបរិយាកាសរស់នៅ និស្សិតត្រៀមបញ្ចប់ថា្នក់អនុបណ្ឌិត មុខវិជ្ជាសិក្សាអភិវឌ្ឍន៍នាសាកលវិទ្យាល័យភូមិន្ទភ្នំពេញ លោក ហែម ច័ន្ទសុភ័ក្ត្រ បានណែនាំការដាំរុក្ខជាតិលម្អ ដើម្បីជួយបន្សុទ្ធខ្យល់ បន្ថែមពណ៌បៃតងក្នុងការិយាល័យ បន្ធូរបន្ថយអារម្មណ៍ស្មុគស្មាញ ក៏ដូចជាជួយកាត់បន្ថយពាក្យ «អផ្សុក» ចេញពីអារម្មណ៍របស់អ្នកមិនចេញក្រៅផ្ទះ។
ដោយសារតែមានទំនោរចិត្តស្រលាញ់បរិស្ថានធម្មជាតិតាំងពីកុមារភាព សុភ័ក្ត្រ បានធ្វើការសិក្សារៀនសូត្របន្ថែមអំពីការដាំដុះរុក្ខជាតិ ដោយខ្លួនឯង និងពីសាលារៀនរហូតបានបញ្ចប់ការសិក្សាថ្នាក់បរិញ្ញាបត្រជំនាញក្សេត្រសាស្ត្រ នាសាកលវិទ្យាល័យភូមិន្ទកសិកម្ម និងអភិវឌ្ឍខ្លួនក្លាយជាម្ចាស់ហាងរុក្ខជាតិលម្អ។
លោក សុភ័ក្ត្រ បានប្រាប់ឲ្យដឹងថា៖ «នាដើមឆ្នាំ ២០១៨ ខ្ញុំចាប់ផ្ដើមបង្កើតទម្លាប់ដាំដើមរុក្ខជាតិលម្អផ្សេងៗនៅក្នុងផ្ទះរបស់ខ្ញុំ។ ខ្ញុំបានព្យាយាមសិក្សាស្វែងយល់បន្ថែមអំពីរុក្ខជាតិលម្អដោយខ្លួនឯងតាមរយៈសៀវភៅ ឬវីដេអូនានា តាមគេហទំព័រអ៊ីនធឺណិត និងតាម Youtube»។
ហាង «ព្រៃ» លក់រុក្ខជាតិលម្អតម្លៃចាប់ពី ៤ ពាន់រៀល។ រូបថត សហការី
មុននឹងក្លាយជាម្ចាស់ហាងរុក្ខជាតិលម្អ សុភ័ក្ត្រ បានអនុវត្តដាំរុក្ខជាតិលម្អក្នុងបន្ទប់ទទួលភ្ញៀវ ផ្ទះបាយ ដំបូលផ្ទះ និងតាមបន្ទប់គេង រហូតមានការកោតសរសើរពីមិត្តភក្តិ និងបងប្អូន។
ម្ចាស់ហាងសំឡេងទន់រូបនេះបានបង្ហើបថា៖ «រាល់លើកនៅពេលដែលមានមិត្តភកិ្ដ ឬបងប្អូនមកលេងផ្ទះខ្ញុំ គេតែងភ្ញាក់ផ្អើល និងលាន់មាត់គ្រប់ៗគ្នាថា បន្ទប់គេងខ្ញុំដូចនៅក្នុងព្រៃ ហា៎ហា៎... ព្រោះមានរុក្ខជាតិលម្អតូចធំមិនក្រោម ២០ ប្រភេទនោះទេ ហើយនេះជាមូលហេតុដែលខ្ញុំដាក់ឈ្មោះហាងរបស់ខ្ញុំ ថា «ព្រៃ» ឬ (Jungle à Domicile)»។
«ព្រៃ» ជាកន្លែងបង្កើនការយល់ដឹងដល់ប្រជាជនខ្មែរ និងជនបរទេស អំពីរុក្ខជាតិលម្អទាំងលក្ខណៈជីវសាស្រ្ត រូបសាស្រ្ត ការថែទាំ និងអត្ថប្រយោជន៍របស់រុក្ខជាតិលម្អនីមួយៗ។
បុរសវ័យ ២៧ ឆ្នាំរូបនេះ បានបន្តទៀតថា៖ «ខ្ញុំបង្កើត Jungle ជាមួយគោលបំណងចង់ឲ្យទីនេះក្លាយជាទីកន្លែងដែលអ្នកស្រឡាញ់ធម្មជាតិ និងចង់ស្វែងយល់ពីរុក្ខជាតិលម្អ ជួបជុំគ្នាដើម្បីសិក្សាពិភាក្សា និងចែករំលែកបទពិសោធ និងចំណេះដឹងពីគ្នាទៅវិញទៅមក»។
ការដាំរុក្ខជាតិលម្អអាចជាវិធីសាស្ត្រមួយ ក្នុងចំណោមវិធីសាស្ត្រផ្សេងទៀតដែលជួយបន្ថយអារម្មណ៍តប់ប្រមល់ក្នុងអំឡុងពេលមនុស្សសំងំនៅផ្ទះ។
លោកបានណែនាំវិធីសាស្ត្រជ្រើសរើសរុក្ខជាតិលម្អដូចជា ដើមត្រចៀកដំរី ដើមលុយ ដើមកៅស៊ូ ឈ្មោះដើមឆត្រជប៉ុន ឬឆត្រអាមេរិក ដើមលំពែងព្រះរាម និងដើមបក្សីសួគ៌។
ម្ចាស់ហាង ព្រៃ លើកឡើងថា៖ «រុក្ខជាតិទាំងនេះសុទ្ធសឹងតែជាប្រភេទរុក្ខជាតិលម្អដែលពេញនិយមសម្រាប់ដាក់តាំងលម្អនៅតាមទីធ្លានានា និងមិនពិបាកថែទាំឡើយ»។
យ៉ាងណាមិញ លោកបញ្ជាក់ថា ដើមលំពែងព្រះរាមជាប្រភេទរុក្ខជាតិដែលធន់ មានតម្រូវការពន្លឺថ្ងៃ និងទឹកតិចតួច ជួយបន្សុទ្ធខ្យល់បានល្អ និងជារុក្ខជាតិស័ក្តិសមបំផុតសម្រាប់ដាំលម្អក្នុងបន្ទប់គេង។
លោកបន្ថែមថា ចំណុចសំខាន់ដំបូងគឺ ការជ្រើសរើសទីតាំង ប្រសិនបើអ្នកចង់ដាំក្នុងបន្ទប់គេងដែលមានបង្អួចបែរទៅទិសខាងកើត និងមានពន្លឺថ្ងៃចាំងចំផ្ទាល់រៀងរាល់ពេលព្រឹក អ្នកអាចដាំរុក្ខជាតិលម្អបានច្រើនប្រភេទ ដូចជាដើមបក្សីសួគ៌ ដើមឆត្រជប៉ុន ដើមកៅស៊ូ ដើមត្រចៀកដំរីជាដើម។
លោកបន្តពន្យល់ថា បើទីតាំងនោះមានពន្លឺថ្ងៃតិចតួចយើងគួរដាំដើមលំពែងព្រះរាម ព្រោះវាមានតម្រូវការពន្លឺតិចតួចប៉ុណ្ណោះ។
សុភ័ក្ត្រ បានលើកឡើងថា បើតាមលក្ខណៈជីវសាស្ត្រ ការដាំរុក្ខជាតិលម្អក្នុងទីតាំងផ្សេងៗគ្នាបង្កការលូតលាស់ផ្សេងៗគ្នាផងដែរ។ ចំពោះលក្ខណៈរូបសាស្ត្រវិញ ការដឹងអំពីលក្ខណៈរូបសាស្រ្តរបស់រុក្ខជាតិ ជួយឲ្យយើងធ្វើការសម្រេចចិត្តត្រឹមត្រូវក្នុងការកំណត់ទីតាំងដាំរុក្ខជាតិលម្អទាំងនេះ។
រុក្ខជាតិដូចជា ដើមឆត្រជប៉ុន ដើមលំពែងព្រះរាម ដើមត្រចៀកដំរី ស័ក្ដិសមនឹងដាំលម្អផ្ទះ។ រូបថត សហការី
ស្ថាបនិករូបនេះ លើកហេតុផលថា៖ «ជាក់ស្ដែងរុក្ខជាតិត្រចៀកដំរីដូចដែលបានរៀបរាប់ខាងលើ ជាប្រភេទរុក្ខជាតិមិនធន់ទ្រាំនឹងអាកាសធាតុក្ដៅខ្លាំង ដូច្នេះអ្នកដាំត្រូវរក្សាសំណើមដីជានិច្ច និងដាំដោយល្បាយដីដែលមានជីវជាតិ។ ស្រដៀងគ្នានឹងនេះដែរ រុក្ខជាតិត្រចៀកដំរី ជាប្រភេទរុក្ខជាតិលម្អមានស្លឹកធំពណ៌បៃតងចាស់ និងអាចលូតលាស់កម្ពស់ប្រមាណ ៥០ សង់ទីម៉ែត្រ ដូច្នេះ រុក្ខជាតិនេះអាចដាំបានច្រើនទីតំាងមិនថាបន្ទប់ទទួលភ្ញៀវបន្ទប់គេង ឬផ្ទះបាយនោះទេ»។
ជាចុងក្រោយ សុភ័ក្ត្រ បង្ហាញឆន្ទៈរបស់ខ្លួនថា៖ «ខ្ញុំសង្ឃឹម និងជឿជាក់យ៉ាងមុតមាំថានឹងមានអ្នកចូលរួមដំណើរជាមួយខ្ញុំក្នុងការសិក្សាស្វែងយល់ពីអត្ថប្រយោជន៍នៃបរិស្ថាន និងស្រលាញ់ រុក្ខជាតិបៃតងឲ្យកាន់តែច្រើន ដើម្បីប្រែក្លាយរាជធានីភ្នំពេញ និងបណ្ដាខេត្តនានាក្នុងប្រទេស កម្ពុជា យើង ឲ្យក្លាយជាទីសោមនស្សពោរពេញដោយខ្យល់អាកាសបរិសុទ្ធ សោភណភាពស្រស់បំព្រងសុខភាពល្អ និងសុខុមាលភាពសង្គម»។
ហាងរុក្ខជាតិ «ព្រៃ» របស់លោកមានលក់រុក្ខជាតិលម្អ ផើងកាដូ និងសម្ភារថែសួននានា ដែលបង្កភាពងាយស្រួលដល់អតិថិជន។ តម្លៃមានច្រើនជម្រើស ចាប់ពី ៤ ០០០ រៀល អាស្រ័យទៅលើប្រភេទ ទំហំ និងលក្ខណៈរបស់រុក្ខជាតិ។
«ព្រៃ» មានអាសយដ្ឋាន ផ្ទះលេខ ៩១E0 ផ្លូវព្រះអង្គឌួង ក្បែរ AMK ផ្សារចាស់។
ព័ត៌មានបន្ថែម សូមចូលទៅកាន់ហ្វេសប៊ុកផេច https://www.facebook.com/jungledomicile/ ឬទូរស័ព្ទលេខ ០១៦ ៣៣៣ ២៨៧៕
