ភ្នំពេញ៖ ភាពយន្តភាគអប់រំខ្នាតខ្លី បែបអប់រំផ្លូវចិត្ត ដែលមានប្រភពដកស្រង់ចេញពីព្រះត្រៃបិដកនៃព្រះពុទ្ធសាសនារឿង «ព្រះភិក្ខុពនេចរ» ដែលមានអត្ថន័យខ្លឹមសារល្អ ឆ្លុះបញ្ចាំងតថភាពសង្គមស្ទើរតែគ្រប់រសជាតិនៃឆាកជីវិតទាំងមនុស្ស និងសត្វ ត្រូវបានអង្គការសកម្មភាពសិល្បៈខ្មែរបានថតជាបណ្តើរៗហើយ ក្រោយពីបានរើសតួសម្តែង និងមានដៃគូសហការឧបត្ថម្ភមក។
លោក សួង សុភ័ក្រ ដែលជាស្ថាបនិកនៃអង្គការសកម្មភាពសិល្បៈខ្មែរ (KAA) និងជាផលិតករកុនឯករាជ្យបានឱ្យដឹងថា៖ «ក្រោមគំនិតផ្តួចផ្តើមព្រះតេជព្រះគុណ គូ សុភាព ទើបរឿងនេះ ត្រូវបានរៀបចំផលិតជាភាពយន្តឡើង ដើម្បីបង្កើតគំនិតប្រាជ្ញាបានយ៉ាងទូលាយ ជាឱសថរម្ងាប់រោគចិត្តយ៉ាងស័ក្តិសិទិ្ធ ផ្តល់ការយល់ពីតម្លៃពុទ្ធសាសនាយ៉ាងងាយ ចោទ និងដោះស្រាយបញ្ហាជីវិតប្រចាំថ្ងៃ។ ម្យ៉ាងទៀត ដើម្បីចូលរួមចំណែកលើកតម្កើង ផ្សព្វផ្សាយអំពីព្រះធម៌ ជាពិសេសបង្ហាញពីសារៈសំខាន់នៃព្រះសង្ឃនៅក្នុងសន្តិភាពសង្គម ព្រះសង្ឃជាទីពឹងផ្លូវចិត្ត និងដាស់សតិ ព្រះសង្ឃចូលរួមយ៉ាងសំខាន់ សម្រាប់សុខដុមនីយកម្ម ការអភិវឌ្ឍសហគមន៍បង្ហាញវប្បធម៌ខ្មែរ និងទំនៀមទម្លាប់របស់់ខ្មែរ នៅក្នុងព្រះពុទ្ធសាសនា»។
គួរបញ្ជាក់ដែរថា ភាពយន្តភាគរឿង «ព្រះពនេចរ» ជាប្រភេទរឿងភាពយន្តបែបអប់រំតាមព្រះពុទ្ធធម៌ មានឥទ្ធិពលអំពីព្រះពុទ្ធសាសនានៃសង្គមបរិយាកាសក្នុងសម័យកាលលង្វែក កាលកំណត់តែងឆ្នាំ ១៩៦៥ នៃសៀវភៅរឿង «ព្រះពនេចរ» របស់អ្នកនិពន្ធលោកសាស្ត្រាចារ្យ ឱម ណាគ្រី ផលិតករប្រតិបត្តិ ព្រះភិក្ខុវជិរប្បញ្ញោ គូ សុភាព អ្នកនិពន្ធអត្ថបទភាពយន្ត បូ សុគន្ធា ដឹកនាំសម្តែងដោយលោក សួង សុភ័ក្រ ជំនួយការដឹកនាំដោយ Preeka ប្រធានផ្នែករូបភាពដោយលោក វន បូរិន្ទ ខណៈតួអង្គឯកលោក សន ពិសិដ្ឋដែលជាវណ្ណកម្មផលិតដោយអង្គការសកម្មភាពសិល្បៈខ្មែរ (KAA)។
លោក សួង សុភ័ក្រ ក៏ធ្លាប់បានបញ្ជាក់រំឭកដែរថា កាលពីមុនធ្លាប់ជួបពិភាក្សាជាមួយព្រះតេជព្រះគុណ គូ សុភាព កាលពីប្រមាណ ២-៣ ឆ្នាំមុន ព្រះអង្គចង់ថតកុនអប់រំភាគខ្លី ដែលមានប្រភពដកស្រង់ចេញពីព្រះត្រៃបិដក នៃព្រះពុទ្ធសាសនាដើម ពីប្រទេសឥណ្ឌា ដោយយើងបកប្រែជាភាសាខ្មែរ និងយកមកចងក្រងផលិតជាកុនមានប្រមាណ ២០ ភាគ (២០ cases)។
នាពេលបច្ចុប្បន្ន អង្គការសកម្មភាពសិល្បៈខ្មែរក៏បានរើសតួសម្តែងប្រុសស្រីជាច្រើនរូប ដោយមានតួសម្តែងសំខាន់ និងតួបន្ទាប់បន្សំទៅតាមភាគនីមួយៗចំនួន ៣៨ នាក់ ដើម្បីសម្តែង ខណៈការថតនេះមានសហការផលិតពីផលិតកម្មរាម និងមូលនិធិធម្មឱសថ និងឧបត្ថម្ភដោយក្រុមហ៊ុនសម្រស់ធម្មជាតិ៕