The Phnom Penh Post Search

Search form

Logo of Phnom Penh Post newspaper Phnom Penh Post - រឿង​រាម​កេរ្តិ៍​នឹងត្រូវ​សម្តែង​ដោយ​ក្រុម​ល្ខោន​ស្បែក​ពី​ដើម​ដល់​ចប់​




រឿង​រាម​កេរ្តិ៍​នឹងត្រូវ​សម្តែង​ដោយ​ក្រុម​ល្ខោន​ស្បែក​ពី​ដើម​ដល់​ចប់​

Content image - Phnom Penh Post
ការ​សម្ដែង​ល្ខោន​ស្បែក​ធំ​ជា​ផ្នែក​នៃ​សាច់​រឿង​រាមកេរ្តិ៍​ទាំងមូល​ដែល​មាន​រយៈពេល​និទាន ២០ ម៉ោង​។ ហុង មិនា

រឿង​រាម​កេរ្តិ៍​នឹងត្រូវ​សម្តែង​ដោយ​ក្រុម​ល្ខោន​ស្បែក​ពី​ដើម​ដល់​ចប់​

ភ្នំពេញ: ​ក្រុម​សិល្បករ​ល្ខោនស្បែក​ធំ​មកពី​សមាគម​គោក​ធ្លក សមាគម​សុវណ្ណ​ភូមិ និង​សមាគម​ក្នុងប្រទេស​កម្ពុជា បាន​សាក​ល្បង​សម្តែង​ល្ខោន ស្បែកធំ​ក្នុង​ឈុត​មួយនៃ​រឿង​រាមកេរ្តិ៍​ដែលមាន​រយៈពេល​ច្រើន​ជាង ២០ ម៉ោង​នៃការ​សម្តែង​និទាន​ពីដើម​ដល់ចប់​ កាលពី​ថ្ងៃ​ព្រហស្បតិ៍​កន្លង​ទៅ។

ប្រធាន​សមា​គម​សិល្បៈ​ល្ខោន​គោក​ធ្លក​លោក ភឿង កុម្ភៈ​ បាន​ឲ្យដឹង​ថា៖ «​យើងដំ​ឡើង​រឿង​រាមកេរ្តិ៍​ក្នុង​ទម្រង់​ល្ខោន​ស្រមោល​ស្បែក​ធំតាំង​ពីដើម​រហូតដល់​ចប់ ដូច្នេះ​យើង​ត្រូវការ​ពេលវេលា​ច្រើន​ដើម្បី​ហឹ្វកហាត់​ក្រុម​សិល្បករ​ជំនាញ​ពី​សមាគម​ផ្សេងៗ។​ ការសម្តែង​នេះ​តម្រូវ​ឲ្យមាន​ការហាត់​សម​រយៈពេល ៧ ខែក្នុង​សាច់រឿង​រាមកេរ្តិ៍​ទាំង​មូល»។

ថ្លែង​ក្រោយ​ឱកាស​បង្ហាញ​លើក​ដំបូង​បង្អស់​បន្ទាប់ពី​បញ្ចប់​ការ​និពន្ធ​សាច់​រឿង​ក្នុងល្ខោន​ស្បែក លោក កុម្ភៈ បាន​បន្ថែមថា៖ «កម្មវិធី​នេះ ពួក​យើង​មានការ​ចូលរួម​ពីក្រុម​សិល្បករ​​ដែលមាន​ជំនាញ​ខាង​ល្ខោនស្បែក​ធំ សាស្ត្រ​ចារ្យ អ្នក​ស្រឡា​ញ់​អភិរក្ស​សិល្បៈ អង្គការ​មួយចំនួន​ដូចជា​អង្គការ​យូ​ណេស្កូ ជាដើម ហើយ​ការ​ចូលរួម​របស់​ពួកគាត់​ពិតជា​មាន​តម្លៃ​ណាស់​ក្នុង​កម្មវិធី​សម្តែង​របស់​ពួកយើង​ថ្ងៃនេះ និង​ថ្ងៃ​អនាគត»។

យោង​តាម​ប្រធាន​សមាគម​សិល្បៈ​ល្ខោន​គោកធ្លក ហេតុផល​ពីរសំខាន់​ដែល​​ត្រូវ​ដំឡើង​សាច់​រឿងនេះ​ក្នុង​ទម្រង់​ល្ខោនស្បែក​ធំគឺ៖ ទី ១ ល្ខោន​ស្បែក​ធំនេះ​ត្រូវ​បានដាក់​បញ្ចូល​ក្នុង​បេតិក​ភណ្ឌ​សិល្បៈអ​រូបី​ពិភពលោក​ដោយ​អង្គការ​យូ​ណេស្កូ ហើយ​ជាទម្រង់​សក្ការៈ​ដែលលេង​បានតែ​រឿង​រាមកេរ្តិ៍។ទី ២ បើទោះ​បីជា​រឿងនេះ​មាន​ក្នុងកម្មវិធី​សិក្សា ប៉ុន្តែ​មនុស្ស​ភាគតិច​បំផុត​បាន​មើល ឬអាន​សាច់​រឿងនេះ​ឲ្យ​បាន​ស៊ីជម្រៅ​ខណៈ​រឿង​រាមកេរ្តិ៍​ជាអក្សរ​សិល្បិ៍​គោល​នៅក្នុង​អាស៊ី។​

លោក​ពន្យល់​ថា៖ «តាំងពី​ដើម​មក​យើង​មិនដែល​មាន​សិល្បករ​សម្តែង​រឿងនេះ​តាំងពីដើម​ដល់ចប់​ទេពី​ព្រោះវា​ជា​ប្រភេទ​រឿងវែង​អន្លាយ​គ្រាន់តែ​តួអង្គ​មាន​ជាង ១២០ នាក់។ នេះ​ជា​តម្រូវការ​សិស្សា​នុសិស្ស សាស្ត្រាចារ្យ គ្រូបង្រៀន​ដើម្បីជា​ជំនួយ​សា្មរតី​ដល់​ពួកគាត់​ងាយ​ស្រួល​យល់​ហើយ​បាន​សប្បាយ​រីករាយ​ ដោយ​មិនបាច់​អាន​សៀវភៅ​ច្រើន​ជាង ១ ពាន់​ទំព័រ​បន្ទាប់​ពី​បាត់បង់​ក្នុង​ពេល​សង្គ្រាម»។​

Content image - Phnom Penh Post
តាំងពី​ដើម​មិន​ដែល​មាន​សិល្បករ​សម្ដែង​រឿង​រាមកេរ្តិ៍​មួយ​ចប់​ទេ​​។ ហុង មិនា

គម្រោង​នេះ​នឹងត្រូវ​សម្តែង​តាមទី​វត្ត​អារាម សាលារៀន សាកល​វិទ្យាល័យ​ដើម្បីឲ្យ​ព្រះសង្ឃ ​ប្រជាជន សិស្ស និស្សិត​ចូលរួម​ទស្សនា និង​ជា​ជំនួយ​ស្មារតី​យល់ឲ្យ​ច្បាស់​ពី​សាច់​រឿង​រាមកេរ្តិ៍​នៅ​ខែមីនា ឆ្នាំ ២០១៧។

ប៉ុន្តែ​គម្រោង​ដែល​ទាមទារ​ថវិកា ១០ ម៉ឺន​ដុល្លារ​នេះត្រូវ​បាន​លោក​ទម្លាយ​ទាំង​ទឹកមុខ​បារម្ភ​ថា៖ «ឥឡូវ​ហ្នឹង​សូម្បីតែ​ថវិកា​ដើម្បី​ធ្វើការ​ផ្សព្វផ្សាយ​ពីសាច់រឿង​ពីដើម​រហូតដល់​ចប់ហ្នឹង​មិនទាន់​មាន​គ្រប់​គ្រាន់ផង ជំនួយ​របស់យើង​ទើបតែ​បាន​ពាក់​កណ្តាល​នៅឡើយ​​ទេ។ ​ឥឡូវ​នេះ ពួកយើង​បានធ្វើ​ស្បែក​អស់​ហើយ ប៉ុន្តែ​មិនទាន់​មាន​ថវិកា​គ្រប់គ្រាន់​ចេញ​ទៅ​ដើរ​សម្តែងដូច​ក្នុង​គម្រោង​ដែល​ពួកយើង​បាន​ព្រាងទុក»។

យ៉ាងណា លោកថ្លែង​​បែប​​ជឿជាក់​ថា៖ «​យើង​សង្ឃឹមថា​មានតែ​បងប្អូន​ជនជាតិខ្មែរ​យើងទេ​ដែល​អាច​ជួយ​ឲ្យគម្រោង​យើង​ដំណើរ​ការបាន​ទៅមុខ​ដើម្បី​បញ្ជ្រាប​ការ​យល់​ដឹង និង​ពង្រឹង​ការ​អភិវឌ្ឍ​ល្ខោន​ស្បែក​ធំខ្មែរ»។​

គួររំឭក​ផង​ដែរ​ថា ខែមុន​ប្រធាន​សមាគម​សិល្បៈ​ស្បែក​ធំ​លោក ម៉ាន កុសល​ បម្រុង​នឹងបិទ​សមាគ​ម​របស់​លោកទៅ​ធ្វើជា​អ្នករត់​ម៉ូតូឌុប​ដោយសារ​ការ​ខិតខំ​លើក​ស្ទួយ​វិស័យ​នេះអស់ ២ ទសវត្សរ៍​ហើយ​លោក​នៅតែ​ប្រឈម​បញ្ហា​ជីវភាព និងកង្វះ​ទឹកចិត្ត​គាំទ្រ​។ ប៉ុន្តែ​ថ្មីៗ​នេះ សំណើ​ជាច្រើន​ពីសំណាក់​មិត្ត​សិល្បករ សិស្ស និង​អ្នក​ស្រឡាញ់​សិល្បៈ​ល្ខោន​ស្បែក​ធំ​ បាន​​ធ្វើឲ្យ​លោក​វិលត្រឡប់​មកបន្ត​ការងារ​នេះវិញ៕

អត្ថបទគួរចាប់អារម្មណ៍