ក្រុងបាងកក៖ ពីផ្លូវដើរលិចទឹកដ៏តូចចង្អៀតបំភ្លឺដោយអំពូលចន្លុះពិលផ្លុងៗ រហូតដល់សំឡេងដង្ហោយហៅខំប្រកូកទម្លាយជញ្ជាំងថ្មភ្នំ ផលិតកររឿង «ល្អាង» ជាដំណើររឿងរ៉ាវនៃការជួយសង្គ្រោះក្រុមបាល់ទាត់វ័យក្មេងថៃ ត្រៀមអង្រួនអារម្មណ៍ទស្សនិកជនពេលដាក់បញ្ចាំងដំបូងនៅមហោស្រពភាពយន្ដអន្ដរជាតិក្រុងប៊ូសាន។
ផលិតករកូនកាត់ថៃ-អ៊ីរ៉ង់ ថូម វ៉លឃើរ បានថ្លែងមុនការដាក់បញ្ចាំងនៅថ្ងៃសៅរ៍ក្នុងមហោស្រពភាពយន្ដដ៏ធំបំផុតនៅអាស៊ី នៃប្រទេស កូរ៉េខាងត្បូង ថា៖ «គ្មាននរណាហ៊ាននិយាយថា អូ! វាគ្រាន់តែជាឈុតឆាកសម្ដែងនោះទេ»។
លោកបាននិយាយបែបលេងសើចថា៖ «អ្នកដែលខ្លាចទីចង្អៀត គួរមើលរឿងនេះដោយការប្រុងប្រយ័ត្ន ពីព្រោះលោកអ្នកអាចមានអារម្មណ៍មិនស្រណុកចិត្ដ»។
បេសកកម្មឆ្នាំ ២០១៨ ក្នុងការរំដោះក្មេងក្រុមបាល់ទាត់ ១២ នាក់ និងគ្រូបង្វឹករបស់ពួកគេ ឈ្មោះក្រុមជ្រូកព្រៃ ពីល្អាងថាមលួង ភាគខាងជើងប្រទេស ថៃ បានទាក់ទាញចំណាប់អារម្មណ៍មនុស្សទូទាំងពិភពលោក។
ក្រោយពីរត់គេចពីកម្ពស់ទឹកឡើងពេលភ្លៀង ក្រុមនេះបានជាប់គាំងក្នុងរូងភ្នំ ១៨ ថ្ងៃ មុនពេលពួកគេត្រូវបានប្រទះឃើញ និងបំពាក់ឧបករណ៍នាំចេញពីរូងជាច្រើនគីឡូម៉ែត្រ។
ឧបសគ្គរបស់លោក វ៉លឃើរ នោះគឺការបង្កើតស្ថានភាពសើមនៃល្អាង ភាពងងឹតនៃទិដ្ឋភាពក្នុងល្អាង ដែលឈានដល់ការសង្គ្រោះក្រុមជ្រូកព្រៃ កំពុងជួបប្រទះនូវហេតុការណ៍ដ៏អកុសលនេះ។
ដើម្បីរៀបចំឈុតឆាកទាំងនេះ លោកថតទិដ្ឋភាពល្អាងនានាក្នុងប្រទេស ថៃ និងជួលក្រុមសង្គ្រោះមុជទឹក ៤ នាក់ ដើម្បីសម្ដែង។ លោក វ៉លឃើរ បានប្រាប់ថា៖ «យើងត្រូវដោះស្រាយបញ្ហាសត្វអាសិរពិស និងពីងពាងធំៗ»។
ភាពយន្ដនេះនឹងដាក់បញ្ចាំងតាមរោងភាពយន្ដនានាមុនគម្រោងភាពយន្ដចំណាយប្រាក់ខ្ពស់ និងខ្នាតធំជាងនេះទៅទៀត ហើយលោករំពឹងថា មហោស្រពលើកនេះនឹងផ្ដល់ឱកាសឲ្យភាពយន្ដឯករាជ្យអាចឈានដល់ឆាកអន្ដរជាតិទូទាំងពិភពលោក។
លោក វ៉លឃើរ បានបន្ដថា៖ «យើងមានឱកាសបានបញ្ចាំងភាពយន្ដនៅមហោស្រពភាពយន្ដក្រុងប៊ូសាន ជាវេទិកាពិភពលោកមួយ»។ លោកបានបន្ថែមថា រឿង ល្អាង នឹងដាក់បញ្ចាំងនៅប្រទេស ថៃ ក្នុងខែវិច្ឆិកាក្រោយបញ្ចប់ដំណើរវិលជុំទៅតាមមហោស្រពភាពយន្ដនានា៕ AFP/HR