The Phnom Penh Post Search

Search form

Logo of Phnom Penh Post newspaper Phnom Penh Post - រឿងអ្នក រឿង​ខ្ញុំ រំឭក​ប្រវត្ដិ​ឈឺចាប់​ជនជាតិ​ពីរក្នុង​របប​ប៉ុលពត




រឿងអ្នក រឿង​ខ្ញុំ រំឭក​ប្រវត្ដិ​ឈឺចាប់​ជនជាតិ​ពីរក្នុង​របប​ប៉ុលពត

Content image - Phnom Penh Post
សម្រង់សៀវភៅ «រឿងអ្នក រឿងខ្ញុំ» ពីការ​ធ្វើ​ទុក្ខបុកម្នេញ​។ រូប សហការី

រឿងអ្នក រឿង​ខ្ញុំ រំឭក​ប្រវត្ដិ​ឈឺចាប់​ជនជាតិ​ពីរក្នុង​របប​ប៉ុលពត

ភ្នំពេញ: សៀវភៅ​រឿង​អមដោយ​រូប​ភាពជា​ភាសាខ្មែរ​រៀបរាប់​ពីបទពិសោធ​ពីររវាង​ជនជាតិ​ភាគតិច​ចាម និង​វៀតណាម​រស់​រងទុក្ខវេទនា​ក្នុងរបប​ខ្មែរក្រហម ដែល​កំពុង​ក្លាយជា​ប្រធានបទ​សំខាន់​ក្នុង​សាលាក្ដី​ខ្មែរក្រហម។

«រឿង​អ្នក រឿងខ្ញុំ» ជា​សៀវភៅ ៩០ ទំព័រ​ដែល​អង្គការក្ដី​ករុណា​បានគូរ​រៀបរាប់​ដំណើររឿង និងបទ​សម្ភាស​ជាមួយ​ជនជាតិ​ចាម និង​វៀតណាម​រំឭក​រឿងរ៉ាវ​អាពាហ៍ពិពាហ៍​ឆ្លងជាតិ​សាសន៍​រវាង​ខ្មែរ និង​វៀតណាម និងការ​ធ្វើទុក្ខបុកម្នេញ​ជនជាតិ​ភាគតិច​ចាម។

ស្ថានទូត​ស្វ៊ីសនៅ​ប្រទេស​ថៃ​បានផ្ដល់​មូលនិធិ​សៀវភៅ​រឿងនេះ​ដែល​ផ្ដើម​ពីសម័យ​សង្គមរាស្ដ្រនិយម​បន្ដដល់​សម័យ​រដ្ឋប្រហារ​លន់ នល់ និងរបប​វាលពិឃាត​ខ្មែរក្រហម ព្រមទាំង​បញ្ចប់​ត្រឹម​សម័យ​បច្ចុប្បន្ន ដោយ​ដើមបណ្ដឹង​រដ្ឋប្បវេណី​បាន​ចូលខ្លួន​ធ្វើ​សក្ខីកម្ម​ក្នុងសាលាក្ដី​ខ្មែរក្រហម។

លោក លី រតនៈ ជាម​ន្ដ្រី​ផ្នែក​គម្រោង​នៅ​អង្គការ​ក្ដី​ករុណា បាន​និយាយថា៖ «យើងបាន​សម្ភាស​ប្រជាជន​ខ្មែរ ចាម និង​វៀតណាម​ដើម្បី​រំឭក​ពីបទ​ពិសោធ​ដ៏ឈឺចាប់ ដូចជា ការធ្វើ​ទារុណកម្ម​លើ​បងប្អូន​ប្រុស​ស្រី ឬ​សាច់ថ្លៃ​ដែល​បាន​រៀបការ​ឆ្លងជាតិ​សាសន៍។ វាជា​ផ្នែកមួយ​នៃ​រឿងរ៉ាវ​គ្រួសារ​ពួកគេ។ យើង​បានសម្រេច​ផលិត​សៀវភៅ​នេះជា​យុទ្ធសាស្ដ្រ​ថ្មីដើម្បី​បញ្ជ្រាប​ព័ត៌មាន​ទៅ​មហាជន»។

លោកបាន​បន្ដថា ស្នាដៃ​នេះនឹង​ក្លាយជា​ផ្នែក​មួយ​នៃ​ពិព័រណ៍​ចល័ត​ដែល​ធ្វើដំណើរ​ទៅតាម​សហគមន៍​នានា។

លោក​បាន​បន្ថែមថា៖ «រឿងនេះ​គឺជា​យុទ្ធសាស្ដ្រ​ថ្មី​ក្នុងការ​បញ្ជ្រាប​ព័ត៌មាន​ទៅកាន់​ក្មេងជំនាន់​ក្រោយ ពីព្រោះ​ប្រជាជន​កម្ពុជា​មិន​ចូលចិត្ដ​អាន​ច្រើន​នោះទេ»។

សៀវភៅ​ដែល​ចំណាយ​ពេល​សម្ភាស និង​សរសេរ​រយៈពេល ៦ ខែ ត្រូវបាន​រចនា​ឡើង​ដោយ​កញ្ញា សៅ ស្រីម៉ៅ ដោយ​ផ្ដោត​សំខាន់​លើ​ជាតិពន្ធ និង​ការរើសអើង​ជាតិសាសន៍។

លោកបាន​និយាយថា៖ «ទោះបីជា​ពិបាក​ជជែក​ពីបញ្ហា​នៅតាម​សហគមន៍ នេះជា​ឱកាស​សម្រាប់​អ្នក​សល់ជីវិត​រស់​រៀបរាប់​លម្អិត​អំពី​ការចងចាំ​ឈឺចាប់ និង​ជាសារ​សម្រាប់​មនុស្ស​ជំនាន់​ក្រោយ ពីព្រោះ​យុវជន​កម្រ​ជជែក​ពី​ខ្មែរក្រហម និង​អ្វីដែល​បាន​កើតឡើង​ចំពោះ​ជនជាតិ​ភាគតិច»។

លោក រតនៈ បន្ដថា គោលបំណង​មួយទៀត គឺ​ផ្សព្វផ្សាយ​ចំណេះដឹង​អំពី​ការរើសអើង​ជាតិ​សាសន៍ និង​ប្រវត្ដិខ្មៅ​ងងឹត​ក្នុងសង្គម​ខ្មែរ ហើយ​បញ្ហានេះ​នៅតែ​បន្ដ​រហូតដល់​សម័យ​បច្ចុប្បន្ន។

លោក ម៉េត គឿ ជាដើម​បណ្ដឹង​រដ្ឋប្បវេណី អាយុ ៦៥ ឆ្នាំ បាន​ប្រាប់ថា៖ «កាលនោះ ខ្ញុំអាយុ ២២ ឆ្នាំ នៅពេល​ខ្ញុំ និង​អ្នកភូមិ​ប្រយុទ្ធ​ប្រឆាំង​កង​ទាហាន​ខ្មែរក្រហម​ដែល​បាញ់សម្លាប់​ប្រជាជន​យើង និង​បង្ខំ​យើង​ឲ្យក្បត់​សាសនា។ សមាជិក​គ្រួសារ​ខ្ញុំ​ជាច្រើន​ត្រូវបាន​សម្លាប់»។

ប្រធាន​សហគមន៍​ជនជាតិ​ភាគតិច​វៀតណាម លោក វិន យ៉ាងមិន ដែល​រត់​ភៀសខ្លួន​ជាមួយ​គ្រួសារ​ក្នុងឆ្នាំ ១៩៧៣ និង​ត្រឡប់​មកវិញ​ក្នុងឆ្នាំ ១៩៨០ និយាយថា សាច់ញាតិ​លោកជាច្រើន​គ្មាន​សំណាង​ដូច​លោកទេ ហើយ​អ្នកភូមិ​ជាច្រើន​ត្រូវបាន​ធ្វើទុក្ខ​បុកម្នេញ និង​ទារុណកម្ម​ព្រៃផ្សៃ។

បច្ចុប្បន្ន អង្គការក្ដី​ករុណា គ្រោង​បោះពុម្ព​សៀវភៅ ២០០០ ក្បាល​ជា​ភាសាខ្មែរ ហើយក្នុង​ខែមករា នឹង​បោះពុម្ព ១៨០ ក្បាល​ជាភាសា​អង់គ្លេស​ដើម្បី​ចែកចាយ​តាម​បណ្ដា​អង្គការ​ដៃគូ ម្ចាស់ជំនួយ និង​សហគមន៍​មួយចំនួន។

សៀវភៅ​រឿង «រឿង​អ្នក រឿង​ខ្ញុំ» បាន​សម្ពោធ​នៅផ្ទះ​មេត្ដា៕

អត្ថបទគួរចាប់អារម្មណ៍