The Phnom Penh Post Search

Search form




Logo of Phnom Penh Post newspaper Phnom Penh Post - រឿង «ឃ្លាត​ទៅ​សែន​ឆ្ងាយ» លេច​ធ្លោ ជាង​គេ​នៅ​ក្នុង​កម្ម​វិធី CIFF ឆ្នាំ ២០១៥




រឿង «ឃ្លាត​ទៅ​សែន​ឆ្ងាយ» លេច​ធ្លោ ជាង​គេ​នៅ​ក្នុង​កម្ម​វិធី CIFF ឆ្នាំ ២០១៥

Content image - Phnom Penh Post
ភាព​យន្ដរឿង «ឃ្លាត​ទៅ​សែនឆ្ងាយ» របស់លោក ឆាយ បូរ៉ា ដែលលេច​ធ្លោ​ក្នុង​កម្មវិធី CIFF ឆ្នាំ ២០១៥ ​។ ស្រេង ម៉េងស្រ៊ុន

រឿង «ឃ្លាត​ទៅ​សែន​ឆ្ងាយ» លេច​ធ្លោ ជាង​គេ​នៅ​ក្នុង​កម្ម​វិធី CIFF ឆ្នាំ ២០១៥

ភ្នំពេញៈ​ ភាព​យន្ដ​រឿង ​«ឃ្លាតទៅ សែន​ឆ្ងាយ» ​ជា​វណ្ណ​កម្ម​របស់​ផលិត​ករ​ខ្មែរ​​លោក ឆាយ បូរ៉ា​ បាន​ជាប់​ជា​ភាព​យន្ដ​ឆ្នើម​​ជាងគេ​ក្នុងកម្ម​វិធី​មហោ​ស្រព​​ភាព​យន្ដ​អន្ដរជាតិ​លើក​ទី ៦ នាឆ្នាំ ២០១៥​ ខណៈ​រឿង ​«គ្រាប់ពេជ្រ​» ដែល​ជា​វណ្ណកម្ម​​​ដឹក​នាំ​​ដោយ​​សហផលិត​​ករ​ខ្មែរ​លោក សុខ វិសាល​ និង​បរទេស​​លោក គ្វេនទីន ក្លូស៊ីន ​បានជាប់​ជាភាព​យន្ដ​ឆ្នើម​ផ្នែក​តួ​សម្តែង​។​

នេះ​​បើ​តាម​សេចក្តី​ប្រកាស​​ព័ត៌មាន​សរុប​​ព្រឹត្តិ​ការណ៍​របស់​មជ្ឈ​មណ្ឌលបុប្ផាណា​ នាចុង​​សប្តាហ៍​កន្លង​មក។កម្ម​វិធី​​មហោ​ស្រព​ភាព​យន្ដ​អន្ដរជាតិលើក​ទី ៦ (CIFF) ឆ្នាំ ២០១៥ ​ដែលបាន​​ចាប់​ផ្តើម​តាំង​ពី​ថ្ងៃទី ៤ ខែ​ធ្នូ​ដល់​ថ្ងៃ​ទី ១០​ ខែធ្នូ​នោះ​ មាន​ខ្សែ​ភាព​យន្ដ​បរទេ​ស​ចំនួន ១៣០ រឿង​ មក​ពី ៣៤ ប្រទេសមក​ពី​ជុំ​វិញពិភព​លោក​បាន​​បញ្ចូន​មក​ចូល​រួម​ និង​ភាព​យន្ដ​ជា​វណ្ណកម្មរបស់​​​ផលិត​ករ​ខ្មែរ​វិញ​ មាន​ចំនួន ៣០ រឿង​ ខណៈខ្សែ​​ភាព​យន្ដ​ទាំងអស់​​នោះ​មាន​ច្រើន​ប្រភេទដូចជា​ ​រឿង​ភាព​យន្ដ​ខ្នាតខ្លី ភាពយន្ដ​ប្រភេទ​ Feature Films ភាព​យន្ដ​​ឯក​សារ​ និង​ភាព​យន្ដ​គំនូរជីវចល។

លោក ជា សុភាព នាយក​រង​នៃ​មជ្ឈមណ្ឌល​បុប្ផាណា​ បាន​ឲ្យ​ដឹង​ពី​ទិន្ន​ន័យ​សរុប​ព្រឹត្តិ​ការណ៍​នៃ​កម្ម​វិធី​មហោស្រព​ភាព​យន្ដ​អន្ដរជាតិ​ទី ៦ នេះ​ថា៖ «សម្រាប់​ CIFF ឆ្នាំ ២០១៥ នេះ យើង​ទទួល​បាន​ទស្សនិក​ជន​ដែលមក​ទិញ​សំបុត្រទៅ​ទស្សនា​មាន​ចំនួន ១៥ ០០០ នាក់​។ ចំពោះ​ស្ថិតិជា​ទិន្នន័យ​នៅ​តាម​ហ្វេសប៊ុក​វិញ​នោះ​ ឃើញ​​មាន​អ្នក​ចាប់​អារម្មណ៍​មើល​ចំនួន ​១០ ម៉ឺន ​ ហើយ​​មាន​ចំនួន​ជិត ​២​ ម៉ឺន​ បាន​ចុច​ Likes​។ បើតាមទិន្ន​ន័យ​ក្នុង​គេហ​ទំព័រផ្លូវ​ការណ៍​របស់​ CIFF វិញមាន​អ្នក​ចូល​ទស្សនា​ចំនួន​កើន​ពី ២​ លាន​ ទៅ ៣,៦​ លាន ខណៈ​មាន​អ្នក​ចូល​ទៅ​ទាញ​យក​​ឯកសារ ឬ​ព័ត៌មាន​នានាពី​​កម្មវិធីនេះ​មាន​ចំនួន ១១០ នាក់»។

Content image - Phnom Penh Post
ជោលី និង​ស្វាមី នា​ពេល​ជួបសំ​ណេះ​សំណាល​ជាមួយនឹង​លោក ប៉ាន់ រិទ្ធី​។ បុប្ផាណា

លោក​​បន្ដ​ថា៖ «ដោយ​ឡែក​ភាព​យន្ដ​របស់​ផលិត​ករខ្មែរ​ ឃើញ​ថា​រឿង ​«ឃ្លាត​ទៅ សែន​ឆ្ងាយ» ​របស់លោក ឆាយ បូរ៉ា ក្លាយ​ជា​ភាព​យន្ដ​ឆ្នើម​ជាងគេ​សម្រាប់​អ្នក​ទស្សនា​ ដោយ​ភាព​យន្ដ​នេះ​មាន​លក្ខណៈ​ល្អ​លើ​ផ្នែក​ Script, Image, Editing។

ចំណែក​ឯភាពយន្ដ​រឿង​ «គ្រាប់ពេជ្រ»​ របស់​សហ​ផលិត​ករ​ខ្មែរ​លោក សុខ វិសាល​ និងបរទេស​លោក គ្វេនទីន ក្លូស៊ីន ​បាន​ជាប់​ជាខ្សែ​​ភាព​យន្ដឆ្នើម​​ផ្នែក​តួ​សម្តែង​នៅ​ក្នុង​កម្ម​វិធី​មហោស្រព​ភាព​យន្ដ​អន្ដរជាតិ​ឆ្នាំ ២០១៥ នេះដែរ​។​

អ្វី​ដែល​កាន់​តែ​ពិសេស​​ទៅ​ទៀត​នោះ ​​គឺ​ប្រធាន​គណៈកម្មការ​កិត្តិយស​នៃកម្ម​វិធី CIFF ឆ្នាំ ២០១៥ នេះ ​គឺ​ជា​វត្តមាន​របស់​តារា​ភា​ព​យន្ដ​ហូលីវូដ​ស្រីដ៏​ល្បី​និង​អ្នក​ដឹកនាំ​ជាតិ​អាមេរិក​អ្នក​ស្រី អេនជេលីណា ជោលី ​និង​ស្វាមី​លោក ប្រេដ ភីត។

ជោលី ក៏​ធ្លាប់​បាន​ឆ្លើយ​តប​ទៅ​នឹង​សំណួរ​​ថា ​តើការផលិត​ភាព​យន្ដអាច​​ផ្លាស់​​ប្តូរ​ពិភព​លោកដែរ​ឬទេ?នា​អំឡុង​ពេលជួប​សំណេះ​សំណាល​ជា​មួយ​នឹង​ផលិ​ត​ករ​ខ្មែរឆ្នើមលោក ប៉ាន់ រិទ្ធី និង​ផលិត​ករខ្មែរ​វ័យក្មេងៗ​រួម​មាន​លោក លី ប៉ូឡែន និង​កញ្ញា ងឿម ផល្លី​ នៅ​ឯ​សាលមហោស្រព​ចតុ​មុខ​ថា៖ «​យើងនឹកស្រមៃ​ដល់​​វិធី​ដែល​យើង​រីក​រាយ​នឹង​ជីវិត វិធីដែល​​យើង​រៀប​រាប់​​អំពី​ដំណើរ​នៃ​រឿង​ទាំង​ឡាយ​ និងជា​វិធី​ដែល​យើងបាន​ប្រាស្រ័យ​ទាក់​​ទង​​គ្នា​។ ទាំងនេះហើយ​​គឺ​ជា​ការ​ភ្ជាប់​​ខ្លួនជាមួយ​នឹង​សង្គម​»៕​

អត្ថបទគួរចាប់អារម្មណ៍