.jpg)
ផលិតករ និងតួសម្ដែងចម្រុះជាតិសាសន៍ក្នុងថ្ងៃធ្វើសន្និសីទកាសែតរឿង The Prey កាលពីឆ្នាំមុន។ ស្រេង ម៉េងស្រ៊ុន
ភ្នំពេញ: បន្ទាប់ពីឱកាសសាងភាពល្បីល្បាញនៅលើឆាកអន្តរជាតិតាមរយៈវត្តមាននៅមហោស្រពភាពយន្ត ក្រុងប៊ូសាន ប្រទេសកូរ៉េខាងត្បូង ក្រុងឡុងដ៍ ប្រទេសអង់គ្លេស និងរដ្ឋហាវ៉ៃ សហរដ្ឋអាមេរិក ខ្សែភាពយន្តបែបវាយប្រហារ ដែលផលិតនៅកម្ពុជារឿង The Prey នឹងត្រូវបាននាំយកមកចាក់បញ្ចាំងនៅប្រទេសកំណើតវិញក្នុងអំឡុងចុងឆ្នាំនេះដោយពុំទាន់កំណត់កាលបរិច្ឆេទច្បាស់លាស់នៅឡើយ។
វណ្ណកម្មដឹកនាំថតដោយផលិតករជនជាតិអ៊ីតាលីលោក ជីមមី ហេនដឺសិន (Jimmy Henderson) ដែលត្រូវបានគេស្គាល់ខ្សែភាពយន្តវាយតប់រឿង ហែកគុក (Jailbreak) រឿង The Prey នេះត្រូវបានទិញសិទ្ធិចែកចាយដោយក្រុមហ៊ុន Lightbulb Film Distribution សម្រាប់ការចាក់បញ្ចាំងនៅចក្រភពអង់គ្លេស និងក្រុមហ៊ុន XYZ Films តំណាងឲ្យសិទ្ធិចែកចាយនៅអាមេរិកខាងជើងព្រមទាំងក្រុមហ៊ុនអនឡាន Netflix ផងដែរ។ ប៉ុន្តែកាលបរិច្ឆេទសម្ពោធបញ្ចាំងភាពយន្តថតនៅកម្ពុជាមួយនេះនៅពុំទាន់កំណត់ទេសម្រាប់ប្រទេសធំៗទាំង ២ ខាងលើ។
ឈុតឆាកវាយប្រហារដកស្រង់ពីភាពយន្តរឿង The Prey។ រូបថត Youtube
ដោយចំណាយថវិកាខ្ទង់ ១ លានដុល្លារអាមេរិករឿង The Prey ដែលបានចាប់ផ្ដើមថតតាំងពីខែមីនា ឆ្នាំ ២០១៨ នៅរាជធានីភ្នំពេញ និងតំបន់ព្រៃ ឯខេត្តកោះកុងមានការចូលរួមសម្ដែងដោយមានតួឯកជាតារាវាយតប់ជនជាតិចិនលោក ហ្គូ សាងវ៉ៃ (Gu Shangwe) តារាខ្មែរលោក អ៊ូ តារា កញ្ញា ឌី សូនីតា លោក រស់ មុនី លោក វណ្ណឌី ពិសិដ្ឋ លោក ហ៊ុន សុភី រួមទាំងតារាជនជាតិថៃមួយចំនួនផងដែរ។
អ្នកច្នៃម៉ូដល្បីនៅកម្ពុជាលោក រ៉េមី ហ៊ូ ទទួលបន្ទុករចនាសម្លៀកបំពាក់តួសម្រាប់ការថតភាពយន្តមួយនេះ។
ផលិតករ និងអ្នកដឹកនាំរឿងលោក ជីមមី ហេនដឺសិន បាននិយាយពេលប្រកាសពីដំណើរការផលិតភាពយន្តកន្លងមកថា៖ «ខ្ញុំតែងតែចាប់អារម្មណ៍សិក្សាអំពីធម្មជាតិរបស់មនុស្ស។ ការរុករកបែបជាសភាវគតិដំបូងនៃមនុស្សក្នុងការរស់រានមានជីវិត។ ដូចជាភាពយន្តរឿង Quest for Fire រឿង Deliverance និងរឿងថ្មីបំផុតគឺរឿង Revenant។ ទាំងនេះសុទ្ធតែឆ្លុះបញ្ចាំងនូវរបកគំហើញនៃឫសគល់របស់វា ហើយរឿង «THE PREY» មានភាពវឹកវរដែលបានរៀបចំមានភាពសុខដុមរមនាតាមរយៈផ្ទាំងគំនូរ Euonymus Bosch ប៉ុន្តែភាពសុខដុមរមនានេះត្រូវបានរំខានដោយការមកដល់នៃបុរសម្នាក់ដែលរុញច្រានស្ថានការណ៍មួយនេះឲ្យកាន់តែខ្លាំងជាងមុន ហើយនិងធ្វើអ្វីៗគ្រប់យ៉ាងដើម្បីរស់ និងនាំយកយុត្តិធម៌ដែលប្រឆាំងនឹងអ្នកបង្កើតល្បែង ប្រមាញ់ នឹងអំពើដ៏កំណាច»។
ភាពយន្តវាយប្រហារប្រមាញ់មនុស្សមួយនេះមានរយៈពេលបញ្ចាំង ៩៣ នាទី និង ៣ ភាសាគឺខ្មែរ ចិន និងអង់គ្លេស។ សម្រាប់ការចាក់បញ្ចាំងនៅកម្ពុជា យោងតាមទំព័រហ្វេសប៊ុក The Prey បានបង្ហើបថាទំនងជាចុងឆ្នាំ ២០១៩ នេះហើយ៕
