ភ្នំពេញ៖ ដោយសារវត្តមានគួរឲ្យភ័យខ្លាចនៃការរាលដាលរបស់ជំងឺឆ្លងកូវីដ ១៩ ពាសពេញពិភពលោក ឈុតសម្លៀកបំពាក់ប្រពៃណីខ្មែរច្នៃពីក្រមាគ្រងដោយតារាសម្តែងស្រីអភិវឌ្ឍខ្លួនពីតារាម៉ូដែល និងអតីតកញ្ញាឯកចក្កវាឡកម្ពុជាឆ្នាំ ២០១៨ កញ្ញា រឿន ណាត ខកខានចេញមុខបង្ហាញនៅក្នុងកម្មវិធីស្តីពីផ្នែកវប្បធម៌នៃតំបន់អាស៊ីមួយ។
រូបគ្រងឈុតសម្លៀកបំពាក់ប្រពៃណីច្នៃដោយក្រមាខ្មែរ ពីសំណាក់អតីតកញ្ញាឯកចក្កវាឡកម្ពុជា ឆ្នាំ ២០១៨ កញ្ញា រឿន ណាត លេចចេញតាមអ៊ីស្តាក្រាម មិនត្រឹមតែទទួលបានការកើតសរសើរថា ស្អាតទាំងមនុស្ស និងការរចនាម៉ូដប៉ុណ្ណោះទេ ថែមទាំងកើតចេញជាចម្ងល់ផងដែរថា តើស្រីស្រស់វ័យ ២៥ ឆ្នាំ ជាបុប្ផាដុះនៅលើទឹកដីកំណើតខេត្តកំពង់ចាម រូបនេះ បែបទំនងជាមានឱកាសជាតំណាងកញ្ញាឯកអ្វីផ្សេងទៀតហើយមើលទៅ?
អតីតកញ្ញាឯកចក្កវាឡកម្ពុជាដែលស្រូបបាននូវប្រជាប្រិយភាពខ្លាំងពីមហាជនពេលប្រកួតបវរកញ្ញាចក្កវាឡពិភពលោកឆ្នាំ ២០១៨ រឿន ណាត ក៏ផុសផុលនឹងទីផ្សារថតកុន ថតស្ប៉តនានា និងថត MV បទចម្រៀងជាហូរហែបោះជំហានទៅរកភាពជោគជ័យលើវិថីសិល្បៈ។
កញ្ញា ក៏បានបញ្ជាក់ប្រាប់ភ្នំពេញប៉ុស្តិ៍ថា៖ «អូ! ចាសបង! តាមពិតទៅ ឈុតគ្រងម៉ូដក្រមានេះ មិនមែនជាការប្រកួតកញ្ញាឯកអ្វីដូចមុននោះទេ តែវាតម្រូវឲ្យមានការបង្ហាញឈុតសម្លៀកបំពាក់តំណាងជាតិនីមួយៗនៅក្នុងតំបន់អាស៊ី ដែលប្រារព្ធធ្វើជារៀងរាល់ឆ្នាំ ដោយតម្រូវឲ្យប្រទេសជាសមាជិក រៀបចំឆ្លាស់គ្នា។ តែដោយសារកូវីដ ១៩ ទើបនាងខ្ញុំខកខានចូលរួមកម្មវិធីនេះ»៕