ភ្នំពេញ៖ ក្រោយពីក្លាហានដោយហ៊ានបង្ហាញមុខមាត់ពិតគូស្នេហ៍ កាលពីខែមុននោះ ឥឡូវនេះស្រាប់តែស្រីស្រស់ តារាសម្តែងស្រីអភិវឌ្ឍខ្លួនពីតារាម៉ូដែល និងកញ្ញាឯកចក្កវាឡកម្ពុជាឆ្នាំ ២០១៨ កញ្ញា រឿន ណាត និងម្ចាស់ចិត្តលេចមុខសម្តែងកុនជាមួយគ្នា ដើម្បីរឹតបន្តឹងនូវចំណងស្នេហ៍ឲ្យកាន់តែរឹងមាំ បន្តដំណើរទៅមុខរួមគ្នានៅលើវិថីសិល្បៈ។
ពេលកន្លងមកថ្មីៗនេះ ប្រិយមិត្តជាច្រើន ដែលមានភាពភ្ញាក់ផ្អើលយ៉ាងខ្លាំង ខណៈដែលអតីតកញ្ញាចក្កវាឡកម្ពុជាឆ្នាំ ២០១៨ កញ្ញា រឿន ណាត បានប្រកាសទម្លាយមុខមាត់ពិត ប្រាប់ទៅកាន់មហាជន ភ្ជាប់ភាពផ្អែមល្ហែមជាមួយគូស្នេហ៍នាងគឺបុរសសង្ហា ឃាង ឆែជា ហៅ ជូអ៊ី កាលពេលទៅកម្សាន្តនៅខេត្តសៀមរាប។
មហាជនជាអ្នកគាំទ្រក៏មានការត្រេកអរដែរ ជាមួយនឹងវត្តមានរបស់កញ្ញា រឿន ណាត និងលោក ជូអ៊ី ពេលបង្ហាញវត្តមាននៅក្នុងកុនភាគរឿង «មនុស្សពិត» ដែលកំពុងត្រៀមចាក់ផ្សាយនៅកញ្ចក់ទូរទស្សន៍បាយ័នឆាប់ៗនេះ ហើយគេក៏ឃើញចេញ Trailer រួចមកហើយដែរ សម្រាប់ខ្សែភាពយន្តមានជាង ៥០ ភាគនេះ។
កញ្ញា រឿន ណាត តារាស្រីវ័យ ២៤ ឆ្នាំ មានស្រុកកំណើតនៅខេត្តកំពង់ចាម កាន់តែមានសម្រស់ស្អាតរូបនេះ បញ្ជាក់ពីបទពិសោធទទួលបានហាក់ជាការរឹតបន្តឹងនូវចំណងស្នេហ៍បន្ថែម ខណៈពេលការថតកុនប្រើពេលយូរគឺ ៣ខែ នោះថា៖ «បើនិយាយពីដំបូងនោះ ចាប់ផ្តើមថតកុនជាមួយគ្នា ខ្ញុំ និងគាត់គឺពិតជាមានអារម្មណថា វាពិបាកខ្លាំង ដោយសារតែនៅអៀននឹងគ្នាច្រើនព្រោះតែយើងជាគូស្នេហ៍នឹងគ្នា តែដល់់ពេលគេឲ្យសម្តែងហាក់ដូចជានៅតែមានការអៀនគ្នា។
តែក្រោយមកយើងទាំង ២ បានតាំងចិត្ត និងខិតខំប្រមូលអារម្មណ៍ឲ្យបានល្អ និងចាត់ទុកថា នេះជាកិច្ចការត្រូវតែបំពេញឲ្យបាន ទើបអាចឲ្យពួកយើងសម្តែងបានល្អរលូនពីដើមរហូតដល់ចប់»។
តារាសម្តែងស្រីអភិវឌ្ឍខ្លួនពីតារាម៉ូដែល និងជាកញ្ញាឯកចក្កវាឡកម្ពុជាឆ្នាំ ២០១៨ កញ្ញា រឿន ណាត ក៏បានបន្តថា៖ «ការថតកុនដំបូងជាមួយគ្នានេះ អាចជួយឲ្យយើងទាំង ២ បានស្គាល់ចិត្តគ្នាបន្ថែមមួយកម្រិតទៀត ហើយនាងខ្ញុំក៏អាចនិយាយបានថា ប្រសិនបើប្រៀបធៀបពីការសម្តែងកុន ជាមួយនឹងតួសម្តែងប្រុសផ្សេង ដែលធ្លាប់ថតកុនពីមុនមកនោះគឺការថតសម្តែងជាមួយគាត់ [គូស្នេហ៍នាងលោក ជូអ៊ី] គឺថាហាក់មានភាពងាយស្រួលសម្តែង និងអាចឆាប់ចូលអារម្មណ៍សម្តែងជាង»។
តើវត្តមានកំលោះរូបសង្ហាលោក ជូអ៊ី អាចព្យាបាលបេះដូងកញ្ញា រឿន ណាត បានដែរទេក្នុងសាច់រឿង ឬយ៉ាងណា? ដូច្នេះសូមកុំភ្លេចតាមដានការសម្តែងរបស់តារាស្រីជា Idol ក្នុងចិត្តលោកអ្នកទាំងអស់គ្នា ដែលចាក់បញ្ចាំងនាពេលឆាប់ៗនេះហើយ!៕