ភ្នំពេញៈ បង្កការភ្ញាក់ផ្អើលពីមហាជន និងប្រិយមិត្តគាំទ្រដោយតារាសម្តែងស្រីអភិវឌ្ឍខ្លួនពីតារាម៉ូដែល និងជាកញ្ញាឯកចក្កវាឡកម្ពុជាឆ្នាំ ២០១៨ កញ្ញា រឿន ណាត ស្រាប់តែហ៊ានបង្ហាញមុខមាត់ពិតគូស្នេហ៍ ពេលកំពុងបណ្តើរគ្នានៅតំបន់កម្សាន្តនៅខេត្តសៀមរាបនាពេលថ្មីៗនេះ។
អ្វីកាន់តែឲ្យមហាជនកោតសរសើរបន្ថែមនោះគឺភាពក្លាហានរបស់កញ្ញាឯកចក្កវាឡតំណាងកម្ពុជា សម្រាប់កម្មវិធីប្រកួតបវរកញ្ញាចក្កវាឡពិភពលោកនាឆ្នាំ ២០១៨ (Miss-Universe 2018) កញ្ញា រឿន ណាត បានទម្លាយរូបថតច្រើនសន្លឹកបង្ហាញមុខមាត់ពិតរបស់គូស្នេហ៍ខ្លួនតាមបណ្តាញសង្គមដោយការបើកចំហ និងហាក់ដូចជាមិនបានព្រួយបារម្ភពីផលប៉ះពាល់ទៅដល់ទីផ្សារសិល្បៈរបស់ខ្លួននោះឡើយ។
គ្រាន់តែចូលដើមឆ្នាំ ២០១៩ មកនោះ អតីតកញ្ញាឯកចក្កវាឡតំណាងកម្ពុជា ដែលស្រូបបានប្រជាប្រិយភាពខ្លាំងពីមហាជនខ្មែរនៅក្នុងការប្រកួតបវរកញ្ញាចក្កវាឡពិភពលោកឆ្នាំ ២០១៨ កញ្ញា រឿន ណាត ក៏ផុសផុលនឹងទីផ្សារថតកុន ថតស្ប៉ត និងថត MV បទចម្រៀងជាហូរហែតែម្តង ដែលជាការបោះជំហានទៅភាពជោគជ័យលើវិថីសិល្បៈ ក្រៅពីអាជីពដើរម៉ូដ និងក្រោយអស់ភារកិច្ចជាកញ្ញាឯកចក្កវាឡតំណាងឲ្យកម្ពុជា។
ចំពោះសម្ព័ន្ធស្នេហ៍រវាងខ្លួន និងគូស្នេហ៍ដែលមានអាជីពតារាបង្ហាញម៉ូដដូចគ្នាគឺលោក ឃាង ឆែជា នោះក៏ត្រូវ កញ្ញា រឿន ណាត បានបង្ហើបប្រាប់ភ្នំពេញ-ប៉ុស្តិ៍តាមឆាត Voice- Messenger ឲ្យដឹងថា៖ «សម្រាប់ពួកយើងបើនិយាយពីស្គាល់គ្នាវិញគឺស្គាល់យូរយារណាស់មកហើយក្នុងអាជីពដើរម៉ូដដូចគ្នា។ តែទំនាក់ទំនងជាគូស្នេហ៍ដែលពួកយើងបានសម្រេចចិត្តថាស្រឡាញ់គ្នានោះគឺទើបតែថ្មីៗដែរទេ។ ខណៈពេលនេះពួកយើងក៏មានឱកាសដើរតួសម្តែងនៅកុនមួយជាមួយគ្នាដែលសុំលាក់ចំណងជើងសិនគឺជាកុនរបស់ផលិតកម្មក្នុងស្រុកមួយ។ ហើយតាមរយៈរូបភាពបណ្តើរគ្នានៅសៀមរាបនោះគឺជាពេលវេលាដែលពួកយើងកំពុងតែចាប់ផ្តើមថតកុននោះជាមួយគ្នាផងដែរ»។
បើតាមស្តាប់ពីការរៀបរាប់ពីចំណងស្នេហ៍ដោយបើកចំហ និងហ៊ានបង្ហាញរូបថតមុខមាត់ និងឈ្មោះពិតរបស់គូស្នេហ៍បែបនេះគឺថាកញ្ញា រឿន ណាត ពិតជាក្លាហាន ហើយក៏មិនបានបង្ហាញពីក្តីបារម្ភនូវផលប៉ះពាល់ដល់ទីផ្សារសិល្បៈខ្លួននោះឡើយ ក្រោយពីទម្លាយការពិតនៃសម្ព័ន្ធភាពស្នេហា និងមិនទាន់បានប្រាប់ពីគម្រោងរៀបការនៅឡើយដែរទេ។
កញ្ញា រឿន ណាត នាពេលបច្ចុប្បន្នមានវ័យ ២៤ ឆ្នាំមានស្រុកកំណើតនៅខេត្តកំពង់ចាមកាន់តែមានសម្រស់ស្អាតរូបនេះបញ្ជាក់ថា៖ «នៅពេលនេះយើងសុំប្រើពេលដើម្បីមើលចិត្តថ្លើមគ្នាបន្ថែមមួយរយៈសិន ហើយក៏មិនទាន់មានគម្រោងគិតទៅដល់រឿងរៀបការភ្លាមៗនោះទេ។ ម្យ៉ាងទៀតក៏ចង់ប្រើពេលសម្រាប់ផ្តោតលើការងារសិល្បៈឲ្យបានច្រើនសិនផងដែរ»៕