ភ្នំពេញៈ ក្រុមនិស្សិតប្រុសស្រីមានចម្រុះវ័យ ដែលមកពីខេត្តក្រុងនានា និងមានជនជាតិបារាំងផងដែរសរុបចំនួន ២១ រូបបានបញ្ចប់ការសិក្សាជំនាញចុងភៅរបស់ខ្លួនកាលពីថ្ងៃទី ៣១ ខែឧសភា ឆ្នាំ ២០១៩ ចុងសប្តាហ៍កន្លងមក នៅវិទ្យាស្ថានម្ហូបអាហារកម្ពុជាក្រោយពីបង្កើតឡើងនៅឆ្នាំ ២០១៧ មកនោះ។
អ្នកស្រី ឆាយ សុភី ជាអ្នកគ្រប់គ្រងផ្នែកទំនាក់ទំនងសាធារណៈនៃវិទ្យាស្ថានម្ហូបអាហារកម្ពុជា ឬ Academy of Culinary Arts Cambodia (ACAC) បានឲ្យដឹងថា៖ «នេះគឺជានិស្សិតជំនាន់ទី ១ ដែលមានចំនួន ២១ រូប មកពីខេត្តក្រុងនានា និងមានជនជាតិបារាំងខ្លះផងដែរដោយមាននិស្សិតស្រី ៩ រូប និងប្រុសចំនួន ១២ រូបបានបញ្ចប់ការសិក្សាជំនាញចុងភៅរបស់ពួកគេ និងទទួលសញ្ញាបត្រផងដែរកាលពីល្ងាចថ្ងៃសុក្រទី ៣១ ខែឧសភា ឆ្នាំ ២០១៩ ខណៈវិទ្យាស្ថានយើងបានបង្កើត និងចាប់ផ្តើមទទួលសិស្ស និស្សិតដំបូងកាលពីឆ្នាំ ២០១៧ ដែលកម្មវិធីសិក្សាគឺមានរយៈពេល ២ ឆ្នាំទៅលើជំនាញចុងភៅសុទ្ធសាធតែម្តង»។
ការសិក្សាជំនាញចុងភៅរយៈពេល ២ ឆ្នាំនេះគឺទទួលស្គាល់លក្ខណៈអន្តរជាតិ ដោយសារនិស្សិតដែលបានរៀនចប់គឺសង្ឃឹមមានទីផ្សារការងារផ្នែកចុងភៅ ទាំងនៅក្នុងប្រទេស និងក្រៅប្រទេសបាន ខណៈការសិក្សាមានទាំងបង់ថ្លៃសិក្សា និងទទួលបានអាហារូបករណ៍ផងដែរ សម្រាប់និស្សិតក្រីក្រ ប្រសិនបើមានចំណាប់អារម្មណ៍ចង់ចាប់យកជំនាញជាចុងភៅនេះ។
អ្នកស្រី ឆាយ សុភី បង្ហើបឲ្យដឹងថា៖ «ជាក់ស្តែងដូចជាចំណោមនិស្សិតជំនាន់ទី ១ ចំនួន ២១ រូបនេះដែលទើបបានបញ្ចប់ការសិក្សា និងទទួលសញ្ញាបត្រនេះមាន ១០ ភាគរយគឺជានិស្សិតដែលទទួលបានអាហារូបករណ៍ពីវិទ្យាស្ថានយើង។ ខណៈពួកគាត់ត្រូវឆ្លងកាត់នូវអ្វីជាតម្រូវការតាមលក្ខខណ្ឌពីវិទ្យាស្ថានគឺត្រូវតែជានិស្សិតក្រីក្រ ពិតប្រាកដដោយមានលិខិតបញ្ជាក់ភាពត្រឹមត្រូវចេញពីអាជ្ញាធរភូមិឃុំរបស់ខ្លួនផ្ទាល់ និងពាក្យសុំអាហារូបករណ៍ពីវិទ្យាស្ថាន។ ម្យ៉ាងវិញទៀតការសិក្សានេះទទួលនិស្សិតគ្រប់ភេទ និងគ្រប់វ័យចន្លោះពី ១៨ ឆ្នាំ ដល់ ៤០ ឆ្នាំហើយចំពោះនិស្សិតក្មេងៗត្រូវមានការកំណត់ចាប់ពីការបញ្ចប់ការសិក្សាត្រឹមថ្នាក់ទី ១២ ឡើង ឬជានិស្សិតជាប់បាក់ឌុប ឬធ្លាក់បាក់ឌុប។
ចំណែកឯការបង់ថ្លៃវិញគឺប្រសិនបើជានិស្សិតខ្មែរត្រូវបង់ថ្លៃសិក្សាចំនួន ២ ឆ្នាំតម្លៃ ៤២៤៥ ដុល្លារ ខណៈជានិស្សិតបរទេសវិញចំនួន ២ ឆ្នាំត្រូវបង់ថ្លៃ ៦៩៤៥ ដុល្លារ»។
ការសិក្សាចាប់ពីថ្ងៃចន្ទដល់ថ្ងៃសុក្រ និងចូលរៀនចាប់ពីម៉ោង ៩ ព្រឹក រហូតដល់មោង ៥ ល្ងាច ខណៈក្រុមនិស្សិតដែលបានរៀនចប់ហើយគឺអាចមានឱកាសធ្វើការងារផ្នែកចុងភៅភ្លាមៗមិនព្រួយបារម្ភរឿងខ្វះទីផ្សារការងារនោះឡើយគឺពួកគាត់អាចធ្វើការទាំងនៅក្នុងប្រទេស និងតាមបណ្តាប្រទេសនានាជុំវិញពិភពលោកបានដោយសារសញ្ញាបត្រផ្នែកចុងភៅចេញពីវិទ្យាស្ថានយើងនេះទទួលស្គាល់ស្តង់ដាអន្តរជាតិ។
រាល់ព័ត៌មានលម្អិត ឬចង់សិក្សាជំនាញចុងភៅដែលមានកម្រិតសញ្ញាបត្រទទួលស្គាល់លក្ខណៈអន្តរជាតិដំបូងគេផ្នែកចុងភៅ ឬរៀននៅវិទ្យាស្ថានម្ហូបអាហារកម្ពុជា ឬ Academy of Culinary Arts Cambodia (ACAC) នេះអាចទំនាក់ទំនងតាមទូរស័ព្ទ ០១១ ២៣៤ ០៨៨ ឬតាមហ្វេសប៊ុក https://www.facebook.com/acacambodia/៕