The Phnom Penh Post Search

Search form

Logo of Phnom Penh Post newspaper Phnom Penh Post - រោងសិប្បកម្មនៅ​ព្រៃវែង​ប្រើ​កម្ទេចឈើ​ធ្វើ​ខ្សែ​ក្រវាត់​បុរស​




រោងសិប្បកម្មនៅ​ព្រៃវែង​ប្រើ​កម្ទេចឈើ​ធ្វើ​ខ្សែ​ក្រវាត់​បុរស​

Content image - Phnom Penh Post
រោង​សិប្បកម្ម​ធ្វើ​ខ្សែ​ក្រវាត់​ឈើ​ឆ្លាក់ក្បាច់​នៅ​ខេត្ត​ព្រៃ​វែង​មាន​កូនជាង ១១ នាក់​កំពុង​បម្រើការ​។ រូប សហការី

រោងសិប្បកម្មនៅ​ព្រៃវែង​ប្រើ​កម្ទេចឈើ​ធ្វើ​ខ្សែ​ក្រវាត់​បុរស​

ព្រៃវែង: អតីតជាង​កាត់សក់​នៅ​ក្នុង​ភូមិពានា ឃុំ​អំពិលក្រៅ ស្រុក​ស៊ីធរ​កណ្តាល ខេត្ត​ព្រៃវែង​ បាន​ប្តូរមុខ​របរ​ជា​សិប្បករ​ច្នៃ​ខ្សែ​ក្រវាត់​ឈើ​សម្រាប់​បុរស​​ដើម្បី​ទ្រទ្រង់​ជីវភាពរស់​នៅ​ឲ្យ​ធូរធា​រជាង​មុន​។

លោក ម៉ៅ ជីមន វ័យ ៤១ ឆ្នាំ ដែល​ជា​ស្ថាបនិក​នៃ​ក្រុម​សិប្បកម្ម​ខ្សែ​ក្រវាត់​កូនខ្មែរ (Wooden Belt Handicraft)។

លោក​បាន​សារភាព​ថា នេះ​ពុំមែន​គំនិត​កើត​ចេញ​ពី​រូបខ្លួន​ឡើយ ដោយសារ​របរបែប​នេះ​មាន​តិចតួច​ណាស់​នៅ​ស្រុក​ខ្មែរ។​

លោក ម៉ៅ ជីមន ថា៖«កាល​ពីមុន​ខ្ញុំ​បាន​ឃើញ​គេ​ធ្វើ​ខ្សែ​ក្រវាត់​ឈើ​ពាក់លេង​ប៉ុណ្ណោះ​ តែ​គិតថា​វា​ស្អាត​ម្យ៉ាង​ដែរ។​ ក្រោយ​មក​ទៀត​ខ្ញុំ​ក៏​សាក​ធ្វើមួយ​សម្រាប់​ពាក់​ខ្លួន​ឯង​ ហើយ​អ្នកស្រុក​អ្នកភូមិ​ចាប់​ផ្តើម​ស្នើ​ខ្ញុំ​ឲ្យ​ធ្វើ​ឲ្យ​ច្រើន​ដើម្បី​លក់​ឲ្យ​ពួក​គេ»។

លោក​បន្ដ​ថា៖«វា​ពិបាកធ្វើ​ណាស់​ព្រោះ​វា​ជា​ចំណេះ​គ្មាន​សាលាណា​បង្រៀន​ឡើយ។ គឺ​ខ្ញុំ​ចេះរៀន​ដោយ​ខ្លួន​ឯង​ ដូច្នេះ​ខ្ញុំ​ក៏​ច្នៃដោយ​ខ្លួន​ឯង​តែម្ដងទៅ។ ខ្ញុំ​បាន​ច្នៃ​ក្បាល​ខ្សែ​ក្រវាត់​ឈើ​មាន​ច្រើន​ម៉ូដម៉ាក​ដូច​ជា​រូប​អង្គរ​វត្ត ក្បាល​ក្រពើ ក្បាល​នាគ និង​ក្បាល​សិង្ហ​ជាដើម​ ដែល​មើល​ទៅ​គេចាប់​អារម្មណ៍​ខ្លាំងណាស់»។​

​ខ្សែ​ក្រវាត់​ឈើ​ទាំងនេះ​អាច​មាន​តម្លៃ​ចាប់​ពី ៣០ ដុល្លារទៅ​ដល់​តម្លៃ ៧០ ដុល្លារ ខណៈ​ក្បាល​ខ្សែក្រវាត់​រូប​អង្គរវត្ត​មាន​ការ​ពេញ​និយម​ជាងគេ។

Content image - Phnom Penh Post
ភ្ញៀវ​អាច​កុម្ម៉ង់​ម៉ូដ ក្បាច់ និង​ប្រភេទ​ឈើ​ក្នុង​ការ​ធ្វើ​ខ្សែក្រវាត់​។ រូប សហការី

ខ្សែ​ក្រវាត់​ឈើ​ទាំង​នេះ​សុទ្ធ​តែ​ប្រើ​កម្លាំងដៃ​ដូច​ជា​ការ​ឆ្លាក់​ក្បាច់ ការ​ច្រៀក​ជា​បន្ទះ​ឈើតូច​ៗ ​ការ​ចោះ​ខ្សែត​បន្ទះឈើ​ឲ្យ​​វែងបង្កើត​ជា​ខ្សែ​ក្រវាត់​ និង​ការ​យក​ប្លាស្ទិកមក​អ៊ុត​ឲ្យ​ភ្លឺ​រលោង​ដើម្បី​ទាក់ទាញ​អតិថិជន។​

លោក​ចាត់ទុក​ខ្សែ​ក្រវាត់​ឈើ​នេះ​ជា​ផលិត​ផល​សិប្បកម្ម​​របស់​ខ្មែរ​ដ៏​គួរ​ឲ្យ​មាន​មោទនភាព​មួយ​ផងដែរ។

លោក​ថា៖ «ខ្ញុំ​ក៏​ចង់​ផ្ដល់​ការងារ​ដល់​អ្នក​ភូមិខ្ញុំ​ដែល​ក្រីក្រ និង​ពិការ​ធ្វើ​ដែរ។ ឥឡូវ​នេះ​ខ្ញុំមាន​កូន​ជាង ១១ នាក់​ដើម្បី​ច្នៃ​ខ្សែ​ក្រវាត់​ឈើ​នេះ​»។​​

អតិថិជនជាវ​ខ្សែ​ក្រវាត់​ឈើ​របស់​លោក​ភាគ​ច្រើន​គឺ​ជា​មន្ត្រី​រាជការ។

លោក ស៊ុន រ៉ែម វ័យ ៣៦ ឆ្នាំ ជា​ម្ចាស់​យានដ្ឋាន​នៅ​ខេត្ត​​ព្រៃវែង​ បាន​ប្រាប់​ថា៖ «ខ្ញុំ​ពាក់​ខ្សែក្រវាត់​ឈើ​នេះ​រាល់​ថ្ងៃ​ព្រោះ​វា​មើល​ទៅ​ស្អាត ហើយ​គេ​ចាប់​អារម្មណ៍ច្រើន​ទៀត»​។ លោក​បន្ដ​ថា៖ «ខ្ញុំគិត​ខ្សែ​ក្រវាត់​ឈើ​ស្អាតជាង​ខ្សែ​ក្រវាត់​ស្បែក ឬជ័រ​។ វា​ធន់​នឹងទឹក​ ហើយ​ក៏​នៅ​ល្អពេល​ប្រើ​បាន​យូរ​ទៀត​ផងព្រោះ​ជាងមួយ​ឆ្នាំ​ហើយ​នៅ​មិនទាន់​អី»។

ចំណែក​អ្នក​បើក​ឡាន​លោក​ សួន​ ណាត វ័យ ៣១ ឆ្នាំ ក៏​និយាយ​ដែរ​ថា ខ្សែ​ក្រវាត់​ឈើ​មើល​ទៅ​ស្អាត​ជាង​ខ្សែ​ក្រវាត់ស្បែក និងជ័រ​។

​លោក​បន្ត​ថា៖ «ខ្ញុំ​ចូលចិត្ត​ពាក់​ខ្សែ​ក្រវាត់ឈើ​នេះ​ពេល​ទៅណាមក​ណា គេ​ដឹង​ថា​វា​ខ្សែ​ក្រវាត់​មាន​គុណ​ភាពល្អ​។ មនុស្ស​ភាគ​ច្រើន​សួរ​ខ្ញុំ​ថា ខ្សែ​ក្រវាត់​នេះ​បាន​មក​ពី​ណា»។

លោក ម៉ៅ ជីមន​ បាន​បង្ហើប​ពី​ការ​ធ្វើ​ពាណិជ្ជកម្ម​នៃ​របរសិប្បកម្ម​ខ្សែ​ក្រវាត់​ឈើ​នេះ​ដែរ​ថា៖ «ខ្ញុំ​ចង់​ជួយ​សម្រួល​ការលំបាក​ខ្លះ​ដល់​ប្រជាជន​ក្រីក្រ​ និង​ប្រែក្លាយ​វា​ឲ្យ​ទៅ​ជា​ផលិតផល​ខ្មែរតែ​ម្តង។ ដូច្នេះ​ហើយ​បាន​ជា​ខ្ញុំបង្កើត​អង្គ​ការ​សប្បុរសធម៌​មួយ​ឈ្មោះ សិប្បកម្ម​ខ្សែក្រវាត់​កូន​ខ្មែរ​ ដែល​មាន​គោល​ដៅ​ជួយ​អ្នក​ក្រីក្រ។ ខ្ញូំ​តែង​ដក​យកប្រាក់​ចំនួន​មួយពាន់រៀល​ពី​ការ​លក់​ខ្សែ​ក្រវាត់​មួយ​គ្រឿង​ដើម្បី​តម្កល់​មូលនិធិ​សប្បុរសធម៌​នេះ​ទុក​យក​ទៅ​ជួយ​ដល់​អ្នកក្រ»។​

ស្ថាបនិក​រោង​ជាង​ខ្សែ​ក្រវាត់​ឈើ​រូបនេះ​បាន​បន្ថែមថា៖ «ប្រសិន​បើ​មាន​មនុស្ស​ច្រើន​គាំទ្រ​ផលិត​ផល​សិប្បកម្ម​នេះ​ ខ្ញុំ​ក៏​មាន​គម្រោង​ពង្រីក​មុខ​របរ​ឲ្យ​ធំ​ជាងមុន និងជួល​មនុស្ស​ជា​អ្នកក្រីក្រ​មក​ធ្វើ​ការ​កន្លែង​ខ្ញុំ​ឲ្យ​កាន់តែ​ច្រើន​ផង​ដែរ»៕​

អត្ថបទគួរចាប់អារម្មណ៍