The Phnom Penh Post Search

Search form

Logo of Phnom Penh Post newspaper Phnom Penh Post - រំដួលលិច​ទឹក លេងស្ទីល​ប្លែកៗ​ល្បី​តាំងពី​ហ្វេសប៊ុក ដល់ឆាក​អន្ដរជាតិ




រំដួលលិច​ទឹក លេងស្ទីល​ប្លែកៗ​ល្បី​តាំងពី​ហ្វេសប៊ុក ដល់ឆាក​អន្ដរជាតិ

រំដួល​លិច​ទឹក​ក្នុង​ស្ទីល ឧបករណ៍​នេសាទ និង​ឈុត​ទំពាំង​បាយជូរ​ព្រៃ​។
រំដួល​លិច​ទឹក​ក្នុង​ស្ទីល ឧបករណ៍​នេសាទ និង​ឈុត​ទំពាំង​បាយជូរ​ព្រៃ​។ ហុង មិនា

រំដួលលិច​ទឹក លេងស្ទីល​ប្លែកៗ​ល្បី​តាំងពី​ហ្វេសប៊ុក ដល់ឆាក​អន្ដរជាតិ

ភ្នំពេញ: ឈាន​ចេញពី​ការថតរូប​លេង​ដោយ​គ្រាន់តែ​ផាត់មុខ​តុបតែង​ខ្លួន​តាម​រូបភាព​លើ​កំប៉ុង​ម្សៅភេសាត់ ហើយ​បង្ហោះ​តាមទំព័រហ្វេ​សប៊ុក បុរស​ ម៉ិញ​ ចាន់​វ៉ាន់ដា ហៅ​ «រំដួល​លិចទឹក» បាន​ក្លាយជា​តារា​ម៉ូ​ដែល​ល្បី​ខាង​សិល្បៈ​តុបតែង​ខ្លួន​ប្លែកៗ​រហូត​មាន​អ្នកគាំទ្រ​តាម​ហ្វេសប៊ុក ដល់ទៅ​ជាង ៣ ម៉ឺននាក់។

បុរសសម្បុរ​ស្រអែមចរិតស្រី​វ័យ ២៨ ឆ្នាំ​បាន​រំលេច​ស្ទីល​តែង​ខ្លួន​ប្លែកៗ​ដោយយក​របស់របរ​ប្រើប្រាស់​ប្រចាំថ្ងៃ​ សត្វ ​និង​រុក្ខជាតិនានា​ ​មកតុបតែង​លើក្បាល និង​រាងកាយ រួច​ថត​រូប​បង្ហោះ​ក្នុង​ទំព័រហ្វេសប៊ុក​របស់​ខ្លួនដែល​បង្កឲ្យមាន​ការចាប់អារម្មណ៍​ខ្លាំងពី​ប្រិយមិត្ត​​ទាំង​ក្នុង និង​ក្រៅ ប្រទេសមាន​ ថៃ និង​ ម៉ាឡេស៊ី ឥណ្ឌូនេ​ស៊ី ជាដើម។ ​

សព្វថ្ងៃ រំដួល​លិច​ទឹក​ក៏​ត្រូវបានទំព័រ​កំពូល​តារា​បង្ហាញ​ម៉ូដអាស៊ី (Asia’s Next Top Model) ​យក​រូបខ្លួន​ទៅ​បង្ហោះ​ និង​មានការ​សម្ភាស​ពីសារព័ត៌មាន​វៀតណាម​ ផងដែរ។

រំដួល​លិច​ទឹក​គឺជា​កូន​ច្បង​នៅក្នុង​គ្រួសារ​ និង​មាន​ប្អូនស្រី​ម្នាក់​រស់នៅ​ជាមួយ។ សព្វថ្ងៃនេះ បុរស​មាន​ទេពកោសល្យ​ខាង​តុបតែង​ខ្លួន​ប្លែកៗ​រូបនេះ អាស្រ័យ​ក្រោម​ដំបូល​ផ្ទះ ជួល​នៅ​រាជធានី​ភ្នំពេញ ចាក​ឆ្ងាយ​ពី​ឪពុកម្តាយនៅ​ខេត្ត​ កំពង់​ស្ពឺ ដោយសារតែ​ខ្លួន​ចូលចិត្ត​ជំនាញ​ផាត់មុខ​ធ្វើ​សក់ហើយ​ត្រូវ​បម្រើការ​ក្នុង​ហាង​សាឡន​ និង​​ចេញ​ផាត់មុខ​ឲ្យ​តាម​កម្មវិធី​បង្ហាញម៉ូដ​នានា។

រំដួលលិច​ទឹក​​បាន​និយាយ​ទាំង​ទឹកមុខ​បែប​រំភើបថា៖ «សព្វថ្ងៃ នេះ​ខ្ញុំ​ជាជាង​ផាត់មុខ​ឲ្យស្សនាវ​ដ្តីធំៗ និង​តាម​បណ្តាក្រុមហ៊ុន​នានា​ក្នុងស្រុក​ខ្មែរ​យើង ហើយក៏​ជា​អ្នក​ផាត់មុខ​ផ្ទាល់​ឲ្យ​ កញ្ញា​ មាស ​សុខ​សោភា ​ជាប្រចាំ​ផងដែរ»។

តារា​ហ្វេសប៊ុក​រូបនេះ​បាន​ក្រេប​ជញ្ជក់​ជំនាញ​ផាត់មុខ​តាមរយៈ​វេបសាយ​វីដេអូឃ្លីប Youtube គួបផ្សំ​នឹង​បទពិសោធ​ជាមួយ​​មេជាង​ដែល​ខ្លួន​ធ្វើការជាមួយ។

Content image - Phnom Penh Post

យុវជនសម្ដី​ម្ញិកម្ញ៉ក់រូបនេះ​បាន​រៀប​រាប់ទៀត​ថា៖ «ខ្ញុំ​ក៏ចេះតែ​យក​តិច​និ​កខ្លះៗពី​គេ​មក​ពង្រឹង​បន្ថែម ហើយ​នៅក្នុង​ឆ្នាំ ២០០៦ ខ្ញុំ​ក៏បាន​ដាក់ពាក្យ​ប្រកួត​ផ្នែកធ្វើ​សក់​នៅ​មហោស្រព​ចេនឡា ដែលមាន​អ្នក​ចូល​ប្រកួត​រហូត ៣០០ នាក់​ជាង ហើយ​ខ្ញុំ​ក៏​ធ្វើបាន​សម្រេច​ជយលាភី​លេខ ១។ បន្ទាប់មក​ក្នុង​ឆ្នាំ ២០១០ ខ្ញុំ​ក៏បាន​ដាក់​ពាក្យ​ប្រលងក្នុង​កម្មវិធី​តាំង​ពិ​ព័រណ៍​បង្ហាញ​ម៉ូដ​ថៃ​នៅ​ផ្សារផារ៉ាហ្គន ហើយក៏​ទទួលបាន​ជយលាភី​ផ្នែក​ផាត់មុខ​លេខ ១ និង​ធ្វើ​ក្រចក​លេខ ២ និង​នៅ​ក្នុង​ឆ្នាំ ២០១៤ ​ខ្ញុំ​ក៏​ជាប់​ជា​អ្នកឯកទេស​ធ្វើ​សក់​ជាមួយ ​Top 10 Asean គឺ​ខ្ញុំ​ជាប់​បាន​លេខ ៦។ កត្តា​ទាំងអស់​នេះហើយ​គឺ​ធ្វើ​ឲ្យ​ខ្ញុំ​បានក្លាយ​ជាជាង​ផាត់មុខ​ដ៏​ល្បី​មួយរូប​ផងដែរ»។

ដោយឡែក​អំពី​ការ​បង្ហោះ​រូបប្លែកៗនៅលើ​ទំព័រ​ហ្វេសប៊ុកក្រៅពី​មាន​អ្នកគាំទ្រ​រំដួល​លិច​ទឹក ក៏​មាន​អ្នក​ខ្លះ​រិះគន់​បុរស​​រូបនេះ​ថា ​ធ្វើអ្វី​ឆ្កួតៗ និង​អ្នក​ខ្លះទៀត​ពេបជ្រាយ​ថា មាន​កូន​ធ្វើ​អ៊ីចឹង​មិន​ដឹង​ជា​ឪពុកម្តាយ​យក​មុខ​ទៅ​ទុក​ឯណា​ទេ ជាដើម។

ប៉ុន្តែ​ រំដួល​លិច​ទឹក​បាន​ប្រាប់​វិញ​ថា៖ «សម្រាប់​ខ្ញុំ ខ្ញុំមាន​អារម្មណ៍ថា​ មិន​ខឹង​នឹង​សម្ដី​របស់​ពួក​គាត់​ទេ គឺ​ទីមួយ​ហ្នឹង​យើង​​ធ្វើទៅ​ គឺ​វា​ឆ្កួត​មែន ក៏​ប៉ុន្តែ​ទន្ទឹម​នឹង​ការ​ឆ្កួត​របស់ខ្ញុំ​ គឺ​ធ្វើ​ជា​លក្ខណៈ​ម៉ូដ​ទាន់​សម័យ កំប្លែង និង​បង្កប់​នូវ​អត្ថន័យ​អំពី​របស់​របរ​មួយចំនួន​ដែលខ្ញុំ​យកមក​ធ្វើ»។

Content image - Phnom Penh Post

រាល់​ស្ទីល​តុបតែង​ចម្លែកៗ​​ពី​មួយថ្ងៃ​ទៅ​មួយ​ថ្ងៃ​របស់​រំដួល​លិច​ទឹក គឺ​តែងតែ​ខុសៗ​គ្នា​ជា​និច្ច ហើយបុរស​រូបនេះ​មិនដែលមាន​គម្រោង​ទុកជាមុន​ឡើយ។

​រំដួល​លិច​ទឹក​បាន​ប្រាប់ថា៖ «ពេល​ខ្លះទៅ នៅពេលដែល​ខ្ញុំ​ទៅដល់​កន្លែង​ណាមួយ ហើយក៏​ក្រឡេកឃើញ​របស់​នេះ​របស់​នោះ ​ក៏​បែកគំនិត​ធ្វើភ្លាមៗតែម្តង ហើយ​ខ្ញុំ​ចំណាយពេល ១ ម៉ោង​សម្រាប់​​ក្នុងការ​ផាត់មុខ ​និង​ពាក់​របស់របរ​នៅលើ​ក្បាល​បន្ទាប់មក​ក៏​ប្រើ​ទូរស័ព្ទ​ថតខ្លួនឯង​តែម្តង»។

ថ្វី​ដ្បិតតែ​រំដួលលិច​ទឹក​ទទួល​ស្គាល់ថា នៅ​កម្ពុជា​មិនមែន​មានតែ​ខ្លួន​ឯង​ទេ​ដែល​ចេះ​តែង​ខ្លួន​ប្លែកៗ ក៏ប៉ុន្តែ​បុរស​​រូបនេះ​ប្ដេជ្ញា​ថា នឹង​បន្ត​ក្ដីសុបិន​របស់​ខ្លួនជា​ដរាប។

រំដួល​លិច​ទឹក​បាន​និយាយ​ថា៖ «មិនដឹងថា​ខ្ញុំ​គឺជា​អ្នក​ដំបូង​ដែល​ធ្វើ​វា ឬក៏​ក្រោយ​គេ​ទេ ប៉ុន្តែ​នេះ​គឺជា​ការ​ស្រឡាញ់​​របស់ខ្ញុំ និង​តាំងចិត្ត​ធ្វើ​វា​ឲ្យ​អស់ពី​សមត្ថភាព​មិន​ឲ្យ​ប៉ះពាល់​ដល់​គេ និង​ចង់​លើកស្ទួយ​វិស័យ​ម៉ូដ​របស់​ខ្មែរ​យើង​ឲ្យ​គេ​បានដឹង​ដែរ តាមរយៈ​ខ្ញុំប្រើប្រាស់នូវ​របស់របរ​ទាំងអស់​នៅក្នុង​ស្រុក​ខ្មែរ​​យើង​តែម្តង ហើយ​ខ្ញុំ​សង្ឃឹមថា​បងប្អូន​ខ្មែរ​យើង​នឹង​ជួយ​គាំទ្រវិស័យម៉ូដ​របស់​ខ្មែរ​ឲ្យ​បាន​ច្រើន»៕

អត្ថបទគួរចាប់អារម្មណ៍