ភ្នំពេញ៖ ដោយសារតែធ្លាប់ទទួលបាននូវប្រជាប្រិយភាព និងកសាងកេរ្តិ៍ឈ្មោះល្បីលើវិថីសិល្បៈចម្រៀង ដែលមហាជនភាគច្រើនជក់ចិត្តដិតអារម្មណ៍នឹងសំនៀងបទមរតកដើម មានចំណងជើងថា «មេម៉ាយសប្បាយចិត្ត» ពីសំណាក់តារាចម្រៀងស្រីសម្បូរសាច់ ស្រស់សោភា កញ្ញា រ័ត្ន រចនា ខណៈថ្មីៗនេះ ក៏ស្រាប់តែលេចចេញបទមរតកដើមជាបន្តបន្ទាប់ក្នុងផលិតកម្ម Galaxy Navatra បង្កើតការចាប់អារម្មណ៍សាជាថ្មី។
ក្រោយពីឃើញចេញបទជាទម្រង់មរតកដើម ដែលច្រៀងឡើងវិញ តាមគេហទំព័រផ្លូវការរបស់ផលិតកម្មខាងលើ មានដូចជាបទ «តាវៅ» និងបទ «ជិះទូកលេងតាមមាត់ទន្លេ» មកនោះ ប្រិយមិត្តគាំទ្រ តារាចម្រៀងស្រីសាច់ដ៏ទ្រលុកទ្រលន់កញ្ញា រ័ត្ន រចនា ដែលត្រូវគេដាក់រហស្សនាមថា អ្នកមេម៉ាយសប្បាយចិត្ត នោះធ្វើឲ្យមានការភ្ញាក់ផ្អើលខ្លាំង ក៏លើកឡើងថា៖ «បទចម្រៀងបែបមរតកដើម នៅផលិតកម្ម Galaxy Navatra ទំនងជាត្រូវម៉ៅដាច់ឲ្យកញ្ញា រ័ត្ន រចនា ហើយមើល៍ទៅ បានឃើញពេលចេញចម្រៀងមកច្រើនជាបទបែបមរតកដើម!»។
អតីតជាតារាចម្រៀងស្រីគ្មានផលិតកម្មដោយមកជ្រកក្រោមទ្រនំប៉ុស្តិ៍ហ្វេសប៊ុក សំឡេងមានទឹកដមពីរោះទៅលើការបកស្រាយបទចម្រៀងជាមរតកដើម រ័ត្ន រចនា ដែលប្រឡូកនៅក្នុងវិថីសិល្បៈចម្រៀងជាង ២០ ឆ្នាំហើយនោះ បានបង្ហើបពីអារម្មណ៍ផ្ទាល់ ដោយការដាក់ខ្លួនថាជាតារាវ័យចាស់ហើយនោះថា៖ «ខ្លួនជាតារាចាស់ស្រាប់ផងនោះ ប្រសិនបើគេឲ្យច្រៀងជាបទចម្រៀងបែបមរតកដើម មែននោះ នាងខ្ញុំពិតជាសប្បាយចិត្តខ្លាំងណាស់ ក៏ព្រោះតែខ្ញុំចូលចិត្តប្រភេទបទពីដើមស្រាប់ផង។ តែយ៉ាងណា ទោះបីជាបទចម្រៀងពីដើមក្តី ឬបទថ្មីសម័យឥឡូវនេះក្តី ក៏នាងខ្ញុំនឹងខិតខំតាមជំនាញខ្លួន និងតាមការសម្រេចរបស់ផលិតកម្មផងដែរ»។
ដោយឡែកបើតាមការបញ្ជាក់ពីលោក យឹម តាស្រង់ ដែលជាអ្នកគ្រប់គ្រងទូទៅផលិតកម្ម Galaxy Navatra ក៏បានបញ្ជាក់ពីភាពសមសួនរបស់តារាចម្រៀងស្រី រ័ត្ន រចនា ទៅនឹងការបកស្រាយនូវបទចម្រៀងមរតកដើមដែរថា៖ «ជាការពិត យើងនៅសល់បទមិនទាន់ចេញច្រើនរបស់ រ័ត្ន រចនា។ ទើបតែថ្មីៗនេះ យើងបានចេញបទទាំងនោះ។ និយាយឲ្យចំនោះ សំឡេង រ័ត្ន រចនា ស៊ីគ្នាច្រើនទៅនឹងបទមរតកដើម»។
គួរបញ្ជាក់ដែរថា តារាចម្រៀងស្រីដែលផ្ទុះភាពល្បីខ្លាំងពេញហ្វេសប៊ុក ដោយសារលើកយកបទពីដើមរបស់លោកស្រី ប៉ែន រ៉ន ដែលមានចំណងជើងថា «មេម៉ាយសប្បាយចិត្ត» មកបកស្រាយនៅតាមកម្មវិធីជប់លៀងនានា គួបផ្សំទឹកដមពីរោះ និងកាយវិការក្រមិចក្រមើម ខណៈកញ្ញា រ័ត្ន រចនា ក៏មានទ្រនំជ្រកកោនហើយ គឺផលិតកម្ម Galaxy Navatra៕