.jpg)
លោកស្រី អាស្តា គូនីយ៉ូសិ និងកាក់តម្លៃ ៥ អឺរ៉ូ នៅប្រទេសលីទុយអានី។ រូបថត AFP
ក្រុងវីលនីញូស៖ លីទុយអានី ពីថ្ងៃពុធបានដាក់ឲ្យប្រើប្រាស់កាក់លុយថ្មី ដើម្បីរំឭកដល់វិបតិ្ដកូរ៉ូណា ដោយបានរំលេចសំណេរថា «ក្រោយពីងងឹត ខ្ញុំនឹងមើលឃើញពន្លឺ»។
កាក់លុយថ្មីនេះបង្ហាញពីពន្លឺកាំរស្មីបញ្ចាំងលើលេខឆ្នាំ ២០២០ និងជះស្រមោលនូវកាលបរិច្ឆេទរំលេចនូវពាក្យ SOS។
លោកស្រី អាស្ដា គូនីយ៉ូស៊ិ អនុប្រធានធនាគារកណ្ដាលលីទុយអានី បាននិយាយថា ធនាគារបាននឹកឃើញគំនិតនេះ កាលពីខែមីនា នៅពេលសមាជិកប្រទេសនៅអឺរ៉ុបមួយនេះបានដាក់បម្រាមបិទប្រទេស ដើម្បីទប់ស្កាត់ការរីករាលដាលនៃវីរុសកូរ៉ូណា។
លោកស្រីបាននិយាយទៀតថា៖ «ចំពោះកាក់នេះ យើងក៏បានឧទ្ទិសដល់ក្រុមគ្រូពេទ្យ និងអ្នកដែលបានជួយអំឡុងពេលកូវីដ ចាប់ពីអ្នកស្ម័គ្រចិត្ដដែលជួយមនុស្សចាស់ រហូតដល់គ្រូបង្រៀនដែលបង្រៀនក្មេងតាមអនឡាញ»។
រូបិយប័ណ្ណ ៥ អឺរ៉ូរាប់ពាន់កាក់ រួមទាំងកាក់ផលិតពីស្ពាន់ និងនីកែលតម្លៃ ១,៥ អឺរ៉ូ ពេលនេះ អាចប្រើប្រាស់បានតាមអនឡាញ និងហាងមួយចំនួននៅទូទាំងប្រទេស។
ធនាគារបានផលិតកាក់ ៥ អឺរ៉ូ ចំនួន ២ ៥០០ កាក់ និងកាក់ ១,៥ អឺរ៉ូ ចំនួន ៣ ម៉ឺនកាក់។ ប្រទេសដែលមានប្រជាជនសរុបចំនួន ២,៨ លាននាក់នេះ បច្ចុប្បន្នបានបន្ធូរបន្ថយបម្រាមរឹតត្បិតដែលបានដាក់ចេញតាំងពីពាក់កណ្ដាលខែមីនា។
លីទុយអានី បានរាយការណ៍ពីការឆ្លងវីរុសថ្មីតែ ១ នាក់កាលពីថ្ងៃពុធ ដោយនាំឲ្យមានតួលេខសរុប ១ ៨១៨ នាក់ និងអ្នកស្លាប់ ៧៨ នាក់ ដែលមានអត្រាទាបជាងបណ្ដាប្រទេសភាគច្រើននៅអឺរ៉ុប៕ AFP/HR
