The Phnom Penh Post Search

Search form




Logo of Phnom Penh Post newspaper Phnom Penh Post - លូ ម៉េង យក​ជយលាភី​មេចុងភៅ​ឆ្នើម​ប្រចាំ​អាស៊ី ជា​ការ​លើកស្ទួយ​ម្អូប​ខ្មែរ

លូ ម៉េង យក​ជយលាភី​មេចុងភៅ​ឆ្នើម​ប្រចាំ​អាស៊ី ជា​ការ​លើកស្ទួយ​ម្អូប​ខ្មែរ

លោក ដាតូ ប្រគល់​វិញ្ញាបនបត្រ​មេចុងភៅ​ឆ្នើម​ប្រចាំ​តំបន់​អាស៊ី​ដល់​លោក លូ ម៉េង នៅ​ប្រទេស​ម៉ាឡេស៊ី។
លោក ដាតូ ប្រគល់​វិញ្ញាបនបត្រ​មេចុងភៅ​ឆ្នើម​ប្រចាំ​តំបន់​អាស៊ី​ដល់​លោក លូ ម៉េង នៅ​ប្រទេស​ម៉ាឡេស៊ី។ ឈឹម ស្រីនាង

លូ ម៉េង យក​ជយលាភី​មេចុងភៅ​ឆ្នើម​ប្រចាំ​អាស៊ី ជា​ការ​លើកស្ទួយ​ម្អូប​ខ្មែរ

ក្រុងគូឡាឡាំពួ: កម្ពុជា​បាន​ទទួល​ជោគជ័យ​ផ្ទួន​គ្នា​កាលពី​សប្តាហ៍​មុន សម្រាប់​ការ​ប្រកួត​ជ្រើសរើស​ចុងភៅ​អាស៊ី​ឆ្នើម​ជាង​គេ ឬ Top10 of Asia ដែល​ប្រារព្ធ​ធ្វើ​នៅឯ​ទីក្រុង​គូឡាឡាំពួ​ប្រទេស​ម៉ាឡេស៊ី ដោយ​មេចុងភៅ​ឈ្មោះ លូ ម៉េង ជា​អ្នក​ឈ្នះ កាលពី​ថ្ងៃ​សុក្រ បន្ទាប់ពី​កម្ពុជា​ទើបតែ​ឈ្នះ​ការ​ប្រកួតប្រជែង​អង្ករ​ល្អ​បំផុត​ក្នុង​ពិភពលោក​។

លោក លូ ម៉េង ត្រូវ​បាន​ក្រុម​ទស្សនាវដ្តី​ពាណិជ្ជកម្ម​ម៉ាឡេស៊ី Top10 of Malaysia និង Top10 of Asia ចុះ​ផ្សាយ និង​ផ្តល់​ជ័យលាភី​ចុងភៅ​ឆ្នើម​សម្រាប់​ការ​ប្រកួត​ប្រចាំ​ឆ្នាំ ដែល​បាន​ប្រារព្ធ​ធ្វើ​លើក​ទី​២​។

លោក ដាតូ អ័រ រ៉ាជិន ដ្រាន ប្រធាន​ប្រតិបត្តិ​នៃ​កម្មវិធី Top10 និង​ក្រុមហ៊ុន RHA Media ដែល​បាន​ផ្ដល់​វិញ្ញាបនបត្រ​ចុងភៅ​ឆ្នើម​ប្រចាំ​អាស៊ី​ដល់​លោក លូ ម៉េង នោះ​បាន​និយាយ​ថា៖ «​យើង​បាន​ស្រាវជ្រាវ និង​សិក្សា​ថែម​ទាំង​បាន​ប្រៀបធៀប​ផង​ដែរ​ទើប​អាច​ចម្រាញ់​រក​បាន​អ្នក​ឈ្នះ​កំពូល​ទាំង​ដប់​នាក់ សម្រាប់​កម្មវិធី Top10 of Asia នេះ»។

ទាក់ទិន​នឹង​មោទនភាព​នៃ​វិស័យ​ម្ហូប​នៅ​កម្ពុជា​នេះ​កញ្ញា ហាក់ លីណា ប្រធាន​សមាគម​ភោជនីយដ្ឋាន​ប្រទេស​កម្ពុជា និង​ជា​អ្នក​គ្រប់គ្រង​ទូទៅ​នៃ​ភោជនីយដ្ឋាន Topaz បាន​និយាយ​ថា ជ័យជម្នះ​របស់​លោក លូ ម៉េង នៅឯ​ទីក្រុង​គូឡាឡាំពួ​នោះ ជា​ជំហាន​មួយ​សម្រាប់​ការ​នាំ​កេរ្តិ៍ឈ្មោះ​មុខម្ហូប​ខ្មែរ​ឲ្យ​គេ​បាន​ស្គាល់​មួយ​កម្រិត​ទៀត។

កញ្ញា​បន្ត​ថា៖ «នេះ​ជា​មោទនភាព​មួយ​របស់​ខ្មែរ​ដែល​យើង​អាច​ណែនាំ​មនុស្ស​នៅ​ក្រុង​គូឡាឡាំពួ​បាន​ស្គាល់​ម្ហូប​ខ្មែរ​។ ជ័យជម្នះ​របស់​លោក លូ ម៉េង នឹង​រួមចំណែក​ផង​ដែរ​ក្នុង​ការ​ធ្វើ​ឲ្យ​វិស័យ​បដិសណ្ឋារកិច្ច​ខ្មែរ​ល្បីល្បាញ​នៅ​តំបន់​អាស៊ីអាគ្នេយ៍»។

ការ​ប្រកួត​នេះ​មាន​បេក្ខជន​ចូលរួម​ប្រកួត​ចំនួន​៤៣​រូប មកពី​តំបន់​អាស៊ី រហូត​ដល់​ប្រទេស​ស៊ូដង់​ចូលរួម​ដែរ ខណៈ​ស្ថានីយទូរទស្សន៍​ម៉ាឡេស៊ី​មួយ​ក៏​បាន​ផ្សាយ​ផ្ទាល់​នូវ​កម្មវិធី​នេះ​ទៀត​ផង​។ កម្មវិធី​ប្រព្រឹត្ត​ទៅ​នៅឯ​សណ្ឋាគារ​លំដាប់​ផ្កាយប្រាំ Palace of the Golden Horses នៅ​ក្រុង​គូឡាឡាំពួ ប្រទេស​ម៉ាឡេស៊ី។

លោក លូ ម៉េង បាន​លើក​ឡើង​ថា៖ «គេ​បាន​ផ្ញើ​សំបុត្រ និង​លិខិត​អញ្ជើញ​មួយ​ច្បាប់​ឲ្យ​ពួកយើង​។ ខ្ញុំ​ដូច​មិន​ចាប់​អារម្មណ៍ រហូត​ដល់​គេ​ផ្ញើ​លិខិត​ទាក់ទង​ជា​លើក​ទី​ពីរ​។ ដូច្នេះ​ហើយ​បាន​ខ្ញុំ​ដឹង​ថា​ខ្លួនឯង​ជា​អ្នក​ឈ្នះ​រង្វាន់​ឆ្នើម​ជាង​គេ​នៅក្នុង​កម្មវិធី​នេះ»។

គួរ​បញ្ជាក់​ថា លោក លូ ម៉េង ជា​ប្រធាន​ចុងភៅ​នៅ​ភោជនីយដ្ឋាន​ម្លិះ​ក្នុង​រាជធានី​ភ្នំពេញ ជា​ម្ចាស់​ក្រុមហ៊ុន Almond Group និង​ជា​នាយក​ក្រុមហ៊ុន Thalias Group ដែល​មាន​កម្មសិទ្ធិ​នៅក្នុង​ភោជនីយដ្ឋាន​ម្លិះ Topaz និង Khema ទៀត​ផង​។

ដោយឡែក ការ​ឈ្នះ​ជ័យលាភី​ផ្នែក​ចុងភៅ​នេះ​មិនមែន​ជា​លើក​ដំបូង​ឡើយ ខណៈ​កាលពី​មុន​លោក ក៏​ធ្លាប់​មាន​វត្តមាន​លើ​ឆាក​អន្តរជាតិ​មុនៗ​ផង​ដែរ​ជាមួយ​ចុងភៅ​ល្បីៗ​ដទៃ​ទៀត​ដូចជា លោក ហ្គ័រដុន រ៉ាមស៊ី និង​លោក អេនតូនី ប័រឌែន ជាដើម។

ទោះយ៉ាង​ណា​ជោគជ័យ​ពាំនាំ​ពី​ទឹកដី​ម៉ាឡេស៊ី​លើក​នេះ​ត្រូវ​បាន​លោក លូ ម៉េង ចាត់​ទុក​ថា មិន​ស្មើ​នឹង​កិត្តិយស​ដែល​អង្ករ​ខ្មែរ​ក្លាយ​ជា​អង្ករ​ល្អ​បំផុត​ក្នុង​លោក​នោះ​ឡើយ។

នា​កម្មវិធី​បុណ្យ​អង្ករ​លើក​ទី​៦​កន្លង​ទៅ​ថ្មីៗ​នេះ​សារព័ត៌មាន​អាមេរិក The Rice Trader បាន​ចុះផ្សាយ​ថា កម្ពុជា​បាន​នាំ​មុខ​ប្រទេស​ផលិត​អង្ករ​សំខាន់ៗ​រួមទាំង​សហរដ្ឋអាមេរិក និង​ប្រទេស​ជប៉ុន​ទៀត​ផង។

លោក លូ ម៉េង បន្ថែម​ថា៖ «ខ្ញុំ​គិតថា​ជ័យជម្នះ​ទាំងនេះ​ជា​ជំហាន​ចាប់ផ្ដើម​ប៉ុណ្ណោះ ព្រោះ​យើង​នៅ​មាន​កិច្ចការ​ជាច្រើន​ទៀត​ត្រូវ​ធ្វើ»៕

អត្ថបទគួរចាប់អារម្មណ៍