ភ្នំពេញ៖ ដោយសារព្រួយបារម្ភខ្លាចបាត់បង់ ព្រោះគ្មានធនធានជំនាន់ក្រោយ និងចង់ឲ្យកូនខ្មែរ ជួយថែរក្សា ឬអភិរក្សនូវទម្រង់សិល្បៈចម្រៀងពីបរមបុរាណមក គឺចម្រៀងប្រពៃណីអាយ៉ៃនោះ ទើបជម្រុញឲ្យវីរសិល្បករផ្នែកចម្រៀងអាយ៉ៃលោក ព្រហ្ម ម៉ាញ បើកបង្រៀនឥតគិតថ្លៃដល់កូនខ្មែរ ជំនាញចម្រៀងអាយ៉ៃ ដែលបើកបានប្រមាណ ២ សប្តាហ៍មកហើយនៅផ្ទះរបស់លោកផ្ទាល់។
តារាចម្រៀងប្រពៃណីក្នុងមង្គលការ និងអាយ៉ៃ មានវ័យជិត ៧០ ឆ្នាំ លោក ព្រហ្ម ម៉ាញ បានឲ្យដឹងពីសម្ទុះនៃការចាប់អារម្មណ៍ចង់រៀនជំនាញអាយ៉ៃ ចាប់តាំងពីបានបើកកាលថ្ងៃទី ១ ខែ វិច្ឆិកា ឆ្នាំ ២០១៩ មកនោះថា៖ «បើគិតមកដល់ត្រឹមថ្ងៃនេះ [ថ្ងៃទី ១៤ ខែ វិច្ឆិកា ឆ្នាំ២០១៩] ខ្ញុំទទួលបានសិស្សចំនួន ១២ នាក់ហើយ ដោយមានទាំងចំនួនសិស្សប្រុស និងសិស្សស្រី គឺប្រហាក់ប្រហែលគ្នា។ ឯការទទួលសិស្សចូលរៀនមិនកំណត់ចំនួនឡើយ ឲ្យតែចាប់អារម្មណ៍ចង់រៀន។ ការទទួលចាប់ពីវ័យ ១០ ឆ្នាំ ឡើងទៅ ឬមានវ័យ ៦០ ឆ្នាំ ក៏អាចរៀនបានផងដែរឲ្យតែចិត្តចង់រៀន ហើយការបង្រៀននេះ មិនយកប្រាក់កម្រៃនោះឡើយ គឺថែមទាំងអាចឲ្យសិស្ស ដែលជួបផលលំបាក អាចមកស្នាក់នៅផ្ទះជាសាលារៀនអាយ៉ៃ មានទីតាំងនៅក្នុងបុរី KC ជិតវត្តតាំងកសាង ផ្ទះលេខ L14 នៃសង្កាត់កាកាប ២ ក្នុងខណ្ឌពោធិ៍សែនជ័យ រាជធានីភ្នំពេញ»។
លោកបានបន្តថា៖ «តាមពិតទៅ គម្រោងបើកបង្រៀននេះ ខ្ញុំមានតាំងពី ៣ ឆ្នាំមុនមកម្ល៉េះ ខណៈខ្ញុំខំរកប្រាក់ និងរក្សាទុក ដើម្បីទប់ទល់ការចំណាយមុននៃការបើកបង្រៀននេះ តែជាអកុសល ត្រូវចោរគាស់ផ្ទះលួចយកប្រាក់អស់ ហើយការសម្រេចបើកបង្រៀនសិស្ស នាពេលនេះ ក៏ដោយសារមានការជំរុញខ្លាំងពីថ្នាក់ដឹកនាំកំពូលផងដែរ គឺសម្តេចក្រឡាហោម ដែលលោកធ្លាប់ប្រាប់ឲ្យខ្ញុំជួយបង្កើតសាលាបង្រៀន ឬមណ្ឌលបណ្តុះបណ្តាលជំនាញអាយ៉ៃនេះ»។
យ៉ាងណាការរៀនជំនាញសិល្បៈចម្រៀងប្រពៃណីអាយ៉ៃនេះ ក៏ទាមទារឲ្យមានលក្ខណៈត្រៀមខ្លួនមួយចំនួនដែរ ដើម្បីរៀន និងអាចចាប់យកទៅប្រកបរបរចិញ្ចឹមជីវិតបាន ដូចជាត្រូវតែអ្នកនិយមចូលចិត្តអានអត្ថបទកំណាព្យច្រើន ឬចេះតែងកំណាព្យបទពាក្យ ៧ និងពាក្យ ៨ ដោយខ្លួនឯង ដែលនេះគឺជាមូលដ្ឋានមួយដ៏សំខាន់មួយសម្រាប់ចម្រៀងប្រពៃណីអាយ៉ៃ ព្រោះថារាល់ពាក្យពេចន៍ ក្នុងអត្ថបទកំណាព្យ ជាពិសេស បទពាក្យ ៧ និងពាក្យ ៨ គឺអ្នកច្រៀងអាយ៉ៃ អាចយកទៅច្រៀងបាន។ នេះបើយោងតាមការអះអាងបញ្ជាក់ពី លោក ព្រហ្ម ម៉ាញ។
លោក ព្រហ្ម ម៉ាញ បានបន្ថែមថា៖ «ចម្រៀងអាយ៉ៃនេះ ប្រសិនបើជាអ្នកនោះគឺជាអតីតធ្លាប់បានបួសរៀនជ្រៅជ្រះពីធម៌អាថ៌នោះ គឺរឹតតែប្រសើរព្រោះថា សម្រាប់អាយ៉ៃ ភាគច្រើនត្រូវការយករឿងរ៉ាវនៅក្នុងព្រះធម៌នៃពុទ្ធឱវាទនានា មកតំណាលជារឿង ចែកជូនអ្នកស្តាប់ដែរ ក្រៅពីមានទេពកោសល្យចេះតាក់តែងកំណាព្យកាព្យឃ្លោងនោះ។
ខណៈផ្នត់គំនិតរបស់កូនខ្មែរជំនាន់ក្រោយ ដែលនិយមចាប់យកអាជីពជាអ្នកសិល្បៈ នាសម័យកាលបច្ចុប្បន្ននេះ រមែងគិតរិះរកជំនាញណា ដែលរៀនហើយអាចយកទៅប្រកបឆាប់បានផលតបស្នងវិញជាតម្លៃទឹកប្រាក់បានច្រើន និងអាចជួយឲ្យពួកគេមានជីវភាពធូរធារលឿន។ ដូច្នេះប្រសិនបើជំនាញសិល្បៈណាមិនអាចជួយសម្រួលដល់ជីវភាពឲ្យរស់បានស្រួលនោះទេ គឺពួកគេមិនបានចាប់អារម្មណ៍ឡើយ ហើយតាមសង្កេតសិល្បៈបែបប្រពៃណីបុរាណ មិនសូវមានក្មេងៗជំនាន់ក្រោយចាប់អារម្មណ៍ទេ។
ខុសពីការស្មាន លោក ព្រហ្ម ម៉ាញ វីរសិល្បករអាយ៉ៃ ដែលទទួលបានងារតាំងពីឆ្នាំ ២០០៨ នោះ បង្ហើបឲ្យដឹងពីជីវភាពធូរធារដោយសារតែអាជីពនេះដែរថា៖ «ចំពោះរូបខ្ញុំផ្ទាល់ ប្រសិនបើនិយាយពីអាជីពអាយ៉ៃ និងចម្រៀងប្រពៃណីនេះបានជួយចម្រុងចម្រើនដល់ខ្ញុំច្រើនណាស់គឺជួយឲ្យខ្ញុំមានកេរ្តិ៍ឈ្មោះល្បី មានមហាជនស្រឡាញ់គាំទ្រច្រើន ហើយខ្ញុំក៏អាចទទួលបានប្រាក់ចំណូលតាមនេះក៏ច្រើន ដែលអាចទ្រទ្រង់ជីវភាពបានល្អ។ ប្រការសំខាន់នោះ សិល្បៈអ្វីក៏ដោយឲ្យតែយើងរៀនចេះប្រាកដ គឺទទួលបានជោគជ័យមិនខានទេ»។
យ៉ាងណាវីរសិល្បករចម្រៀងអាយ៉ៃ ដែលមហាជនខ្មែរតែងបង្ហាញពីការកោតសរសើរពីទេពកោសល្យនៃសិល្បៈចម្រៀងអាយ៉ៃឆ្លើយឆ្លង និងជាដៃគូដ៏ស័ក្តិសមនឹងយាយ យ៉យ នោះ ក៏បង្ហាញពីក្តីបារម្ភផងចំពោះសិល្បៈប្រពៃណីអាយ៉ៃនេះ ដោយរំលេចពាក្យប្រៀបប្រដូចដូច្នេះថា៖ «ទារកកើតពីផ្ទៃម្តាយ នៅសម័យនេះ គេអាចកំណត់ និងមើលដឹងយ៉ាងច្បាស់ពីវេលាកើតបាន តែសម្រាប់ការស្លាប់វិញពិតជាមិនអាចមើលឃើញបានឡើយ។ យ៉ាងណាមិញ ខ្ញុំជាមនុស្សជំនាន់មុន ដែលចាប់អាជីពចម្រៀងប្រពៃណី និងអាយ៉ៃ ហើយមានវ័យជិត ៧០ ឆ្នាំទៅហើយដែរ ដូច្នេះគិតថា ចង់ទុកមេរៀននៃជំនាញនេះខ្លះចែកជូនដល់ក្មេងៗជំនាន់ក្រោយ ដើម្បីឲ្យពួកគេជួយថែរក្សា និងអភិរក្សបន្តទៅជំនាន់ក្រោយៗទៀត»៕