.jpg)
លោកសាស្ត្រាចារ្យ យ៉ាន់ បូរិន្ទ និងសិស្សានុសិស្សដែលបានមករៀនវគ្គខ្លីស្មូត្រកំណាព្យ។ រូបថត ហ្វេសប៊ុក
ភ្នំពេញៈ ដោយសារក្តីបារម្ភ និងខ្លាចបាត់បង់នូវកេរមរតកដូនតាផ្នែកស្មូត្រកំណាព្យ និងចម្រៀងបុរាណយីកេ និងមហោរីនោះ ទើបជំរុញឲ្យសិល្បករជើងចាស់លោក យ៉ាន់ បូរិន្ទ និងក្លិបអភិរក្សមរតកកំណាព្យខ្មែរ និងសាលាអភិរក្សមរតកសិល្បៈបុរាណខ្មែរនៅតែខិតខំបន្តបើកវគ្គខ្លីចំនួន ៣ ខែ ដើម្បីទទួលបង្រៀនសិស្សានុសិស្សផ្នែកកំណា្យ និងចម្រៀងបុរាណនេះទាំងត្រដាបត្រដួសរហូតមក។
លោក សីហា ឧត្តម ជាប្រធានក្លិបអភិរក្សមរតកកំណាព្យខ្មែរ និងសាលាអភិរក្សមរតកសិល្បៈបុរាណខ្មែរបានរៀបរាប់ឲ្យដឹងពីការបង្កើតក្លិប និងសាលាបង្រៀនវគ្គខ្លីនៃជំនាញសិល្បៈខាងលើនេះថា៖ «តាមពិតទៅការបណ្តុះបណ្តាលវគ្គខ្លីដែលមានចំនួន ៣ ខែលើការបង្រៀនពីរបៀបតាក់តែងកំណាព្យ និងស្មូត្រកំណាព្យនេះគឺថាបានដំណើរការយូរមកហើយ តែគ្រាន់តែមានទីតាំងច្បាស់លាស់ជ្រកក្រោមដំបូលសាលារចនា (សាកលវិទ្យាល័យភូមិន្ទវិចិត្រសិល្បៈ) ត្រឹមឆ្នាំ ២០១៥ ខណៈបើកដំបូងឧស្សាហ៍ដូរទីតាំងចាប់ពីឆ្នាំ ២០០៩ មក។ ការស្មូត្រកំណាព្យដែលមានរបៀបសូត្រដល់ទៅ ៦០ របៀបនោះគឺបង្រៀនដោយលោកសាស្ត្រាចារ្យ យ៉ាន់ បូរិន្ទ ហើយយើងក៏មានបែងចែកជា ៥ កម្រិតផងដែរ។ ការខំបើកបណ្តុះបណ្តាលវគ្គខ្លីនេះ ក៏ដោយសារយល់ថា សិល្បៈប្រភេទទាំងនេះហាក់អាចនឹងប្រឈមនូវការបាត់បង់អ្នកស្នងនៅថ្ងៃក្រោយ»។
លោក យ៉ាន់ បូរិន្ទ គ្រូបង្រៀនស្មូត្រកំណាព្យ ។ រូបថត ហ្វេសប៊ុក
បើតាមការបង្ហើបឲ្យដឹងពីប្រធានក្លិបលោក សីហា ឧត្តម ចំនួនសិស្សទាំងរៀនផ្នែកស្មូត្រកំណាព្យ និងចម្រៀងបុរាណយីកេ និងមហោរីគឺសុទ្ធតែថយចំនួនសិស្សចូលរៀន។ ដូច្នេះហើយនៅសល់ពេលចុងសប្តាហ៍លោក យ៉ាន់ បូរិន្ទ ជាសាស្ត្រាចារ្យជំនាញស្មូត្រកំណាព្យនៅសាកលវិទ្យាល័យភូមិន្ទវិចិត្រសិល្បៈនោះក៏បានឆ្លៀតមកបង្រៀនមួយថ្ងៃក្នុងមួយសប្តាហ៍ ដែលមានរយៈពេល ២ ម៉ោងនៅតែថ្ងៃសៅរ៍ប៉ុណ្ណោះ។
លោក សីហា ឧត្តម វ័យ ២៦ ឆ្នាំបានបន្តថា៖ «ចំនួនសិស្សានុសិស្សមករៀនវគ្គខ្លីចន្លោះត្រឹមតែពី ១៥ នាក់ទៅ ៣៥ នាក់ក្នុងមួយវគ្គ។ ខណៈភាគច្រើនសិស្សមកពីបណ្តាខេត្តមួយចំនួនដូចជាខេត្តសៀមរាប កំពង់ចាម កំពត និងតាកែវ។ សិស្សភាគច្រើនជាព្រះសង្ឃ ហើយសម្បូរមកពីខេត្តកំពង់ចាម។ រៀនមួយវគ្គចំនួន ៣ ខែដែលមួយសប្តាហ៍រៀនតែ ១ ថ្ងៃប៉ុណ្ណោះនៅថ្ងៃសៅរ៍មានចំនួន ២ ម៉ោងគឺចាប់ពី ៨ ព្រឹក ដល់ម៉ោង ១០ ព្រឹក និងមួយវគ្គត្រូវបង់ថ្លៃ ៤០ ដុល្លារ និងមានចេញវិញ្ញាបនបត្រ ១ សន្លឹកក្រោយពីរៀនចប់វគ្គ។ ចំណែកថ្នាក់ចម្រៀងមហោរី និងយីកេ វិញក៏មានបង្រៀននៅថ្ងៃសៅរ៍ផងដែរពីម៉ោង ១០ ដល់ម៉ោង ១១ ព្រឹក»។
ប្រសិនបើមានចំណាប់អារម្មណ៍រៀនវគ្គខ្លីបណ្តុះបណ្តាលពីរបៀបស្មូត្រកំណាព្យជាមួយលោកគ្រូ យ៉ាន់ បូរិន្ទ នោះអាចទាក់ទងតាមទូរស័ព្ទ 017 390 308 ឬតាមហ្វេសប៊ុក Seiha Oudom៕
