.jpg)
ឈុត MV បទចម្រៀងដឹកនាំដោយលោក សុខ ជំនោរ។ រូប សហការី
ភ្នំពេញ៖ ខណៈពេលថ្មីៗនេះ ក៏ស្រាប់លេចវត្តមានផលិតករ និងអតីតអ្នកនិពន្ធបទចម្រៀងល្បីនៅហង្សមាសលោក សុខ ជំនោរ កំពុងតែសម្រុកផលិតថត MV បទចម្រៀងជាច្រើន សម្រាប់ចេញផ្សាយបន្តបន្ទាប់ និងត្រៀមនៅឆ្នាំ ២០២១ នៅផលិតកម្មថ្មីសន្លាង ដែលមានឈ្មោះថា ផលិតកម្ម ដាវីត្រា មេឌៀរ (Davitra Media)។
ចំពោះការលេចចេញវត្តមានលោក កវីនិពន្ធ និងជាអ្នកដឹកនាំរឿងក៏ដូចជាផលិតករមានបទពិសោធចាស់វស្សាដ៏ល្បី ក្នុងពិភពសិល្បៈប្រមាណជាង ២០ ឆ្នាំ លោក សុខ ជំនោរ ក្នុងផលិតកម្មថ្មីភ្លាមៗនេះ លោកក៏បានបង្ហើបប្រាប់ ភ្នំពេញ ប៉ុស្តិ៍ ថា៖ «ដោយសារតែបានមើលឃើញនូវលក្ខខណ្ឌសមស្រប និងមានគម្រោងការជាគោលដៅឆ្ពោះទៅមុខវែងឆ្ងាយ ដែលមានសារប្រយោជន៍ទាំងអស់គ្នា គឺសម្រាប់ទាំងផលិតកម្ម ផលិតករ និងសិល្បករ នោះហើយ ទើបខ្ញុំបានសម្រេចចិត្តចូលរួមចាប់ដៃគូធ្វើការងារជាមួយនឹងផលិតកម្មដាវីត្រា មេឌៀរ ប្រមាណជាង ២ ខែមកហើយ ក្រោយពីមានទំនាក់ទំនង និងបានជជែកកិច្ចការងារជាមួយគ្នាអស់ពេលច្រើនឆ្នាំមកនោះ»។
លោក សុខ ជំនោរ បានបន្តថា៖ «សម្រាប់ខ្ញុំ ពេលមកកាន់ការងារនៅផលិតកម្ម ដាវីត្រា មេឌៀរ នេះក៏ព្រោះតែមានចំណុចពិសេសជាច្រើន ដែលខាងផលិតកម្មមានការបើកទូលាយ និងបានទទួលយកគម្រោងការរបស់ក្រុមការងារខ្ញុំ ដែលក្នុងនាមជាក្រុមសេវាកម្មផ្នែកផលិតបទចម្រៀង និងភាពយន្ត។ យើងមានគម្រោងជាគោលការណ៍ល្អសម្រាប់ទាំងអស់គ្នា ជាពិសេសនោះ សិល្បករ-សិល្បការិនី ដោយយើងបានចែកប្រភេទនៃផលិតកម្មផ្នែកតារាចម្រៀងរបស់ផលិតកម្ម ដាវីត្រា មេឌៀរ។
នៅទីនេះ យើងនឹងផ្តល់ឱកាសសម្រាប់ក្រុមសិល្បករ-សិល្បការិនី ទៅតាមប្រភេទ ៣ យ៉ាង គឺទី១ សម្រាប់ក្រុមតារាចម្រៀងជារលកក្រោយ ដែលពួកគាត់មានទេពកោសល្យ ខណៈទី២ សម្រាប់ក្រុមតារាចម្រៀងដែលមានកេរ្តិ៍ឈ្មោះល្បីមធ្យម តែពួកគាត់នៅខ្វះឱកាសផ្សព្វផ្សាយ ដោយយើងនឹងផ្តល់ឱកាសនេះឱ្យពួកគាត់បានបញ្ចេញទេពកោសល្យដែលមានស្រាប់នោះ។
លោក សុខ ជំនោរ នាពេលដឹកនាំក្រុមការងារថត MV បទចម្រៀងឱ្យ Davitra Media។ រូបថត សហការី
ចំណែកឯប្រភេទទី៣ វិញ គឺយើងនឹងបើកឱកាសសម្រាប់ក្រុមតារាចម្រៀងដែលមានវ័យកណ្តាល ឬចាស់បន្តិចតែនៅមានសក្តានុពលសិល្បៈ អាចមកបង្ហាញសមត្ថភាពខ្លួនឡើងវិញ ជាពិសេសយើងក៏នឹងមានបទថ្មីសម្រាប់ពួកគាត់ផងដែរ តួយ៉ាងតារាចម្រៀងមួយចំនួនដូចជា អ្នកនាង ខាត់ សុឃីម អ្នកស្រី ហ៊ឹម ស៊ីវន លោក ណូយ វ៉ាន់ណេត លោក ឈឿន ឧត្តម និងអ្នកនាង ម៉េង កែវពេជ្ជតា ជាដើម គឺខាងផលិតកម្ម នឹងអញ្ជើញពួកគាត់មកពិភាក្សាគ្នា ដើម្បីធ្វើការងារសិល្បៈនេះជាមួយគ្នា។
សម្រាប់ការរៀបចំគម្រោងជាយុទ្ធសាស្រ្តនៅក្នុងផលិតកម្ម ដាវីត្រា មេឌៀរ ដែលជាផលិតកម្មថ្មីមែន តែមានក្រុមការងារប្រកបទៅដោយវិជ្ជាជីវៈ មានទេពកោសល្យខ្ពស់មានក្រុមបច្ចេកទេសល្អ មានបទពិសោធ និងជំនាញយ៉ាងពិតប្រាកដនៅក្នុងវិស័យសិល្បៈចម្រៀង និងភាពយន្តនេះ លោក សុខ ជំនោរ ក៏បានបង្ហើបឲ្យដឹងបន្ថែមទៀតដែរថា៖ «នៅពេលនេះ យើងកំពុងតែសម្រុកថត MV បណ្តើរផ្សាយបណ្តើរ និងថតទុកឱ្យបានច្រើនទៀត ដើម្បីត្រៀមទុកសម្រាប់បញ្ចេញផ្សព្វផ្សាយនៅដើមឆ្នាំ ២០២១ ខាងមុខនេះតែម្តង»៕
