ភ្នំពេញ៖ កម្មវិធីរថយន្តតន្រ្តីទិព្វខ្មែរនៃអង្គការសិល្បៈខ្មែរអមតៈ ដែលសហការជាមួយមជ្ឈមណ្ឌលបុប្ផាណា រៀបចំកម្មវិធីពិព័រណ៍អនឡាញស្តីអំពីសំឡេងឧបករណ៍ភ្លេងភ្លយនៅតំបន់អារ៉ែង ខេត្តកោះកុង នាល្ងាចថ្ងៃទី ២៣ ខែ កញ្ញា ឆ្នាំ ២០២០ នេះ ដើម្បីចែកជូនដល់សាធារណជនអាចទស្សនា និងបានស្គាល់ពីឧបករណ៍ភ្លេងដ៏កម្រនេះ។
តាមលោក ឥន្ទ សម៉ាណាក់ ដែលជាអ្នកសម្របសម្រួលកម្មវិធីអភិវឌ្ឍន៍សិល្បៈនៃអង្គការសិល្បៈខ្មែរអមតៈ ប្រាប់ឲ្យភ្នំពេញ ប៉ុស្តិ៍ ដឹងថា៖ «នឹងមានការផ្សាយផ្ទាល់ពីកម្មវិធីតាមគេហទំព័រហ្វេសប៊ុករថយន្តតន្រ្តីទិព្វខ្មែរ នាថ្ងៃពុធ ទី ២៣ ខែ កញ្ញា ឆ្នាំ ២០២០ វេលាម៉ោង ៦ ដល់ ៧ និង ៣០ នាទីល្ងាច។ សូមបងប្អូនរង់ចាំតាមដានទស្សនា! ទាំងនោះគឺមានកម្រងរូបភាពខ្លះៗ ដែលក្រុមការងារចុះស្វែងរកលោកតា ដួង ញឹក ជាជនជាតិជង និងជាម្ចាស់ដើមនៃឧបករណ៍ភ្លេង រួមទាំងមានសកម្មភាពលោកបង្ហាត់បង្រៀនសិស្ស។ ភ្លយ គឺជាឧបករណ៍ភ្លេងកម្រមានអ្នកស្គាល់ និងឮពីសំឡេងវាណាស់ ហើយភាគច្រើនគេបានស្គាល់ឧបករណ៍នេះក្នុងរបាំមួយដែលមានឈ្មោះថា «របាំភ្លយសួយ» មានប្រភពមកពីខេត្តកំពង់ស្ពឺ។ ដោយឡែកពិព័រណ៍ «សំឡេងភ្លយ» អនឡាញ និងអចិន្រៃ្តយ៍នេះ យើងខ្ញុំនឹងនាំលោកអ្នកទៅឃើញទិដ្ឋភាពរុករកដ៏សែនលំបាកនៃឧបករណ៍ភ្លេងមួយនេះនៅអារ៉ែង ខេត្តកោះកុង ជាមួយសំឡេងដ៏ពីរោះ ស្ទើរតែបាត់បង់ទៅហើយ»។
លោក ឥន្ទ សម៉ាណាក់ បន្តថា៖ «នេះជាពិធីសម្ពោធផ្លូវការ និងជាលក្ខណៈអនឡាញ អមដោយកម្មវិធីចំនួន ៣ សំខាន់ៗរួមមានទី ១ ជាបទបង្ហាញស្ដីពីដំណើរនៃថ្នាក់រៀនឧបករណ៍ភ្លេងភ្លយ ទី២ ជាកិច្ចសន្ទនាស្ដីពីសារៈសំខាន់នៃបណ្ណសារ និងទី៣ ជាកិច្ចពិភាក្សាស្ដីពីការចូលរួមអភិរក្ស និងផ្សព្វផ្សាយតន្ត្រីកម្រ។ សម្រាប់ «ពិព័រណ៍សំឡេងភ្លយ» រៀបចំដោយកម្មវិធីរថយន្តតន្ត្រីទិព្វខ្មែរនៃអង្គការសិល្បៈខ្មែរអមតៈ សហការជាមួយមជ្ឈមណ្ឌលធនធានសោតទស្សន៍បុប្ផាណា និងសហគមន៍អេកូទេសចរណ៍តំបន់ស្ទឹងអារ៉ែង ដែលទទួលបានមូលនិធិពីស្ថានទូតអាមេរិកប្រចាំនៅកម្ពុជាមានឈ្មោះថា U.S. Ambassadors Fund for Cultural Preservation»។
លោកអ្នកអាចចូលរួមកម្មវិធីនេះ តាមទំព័រហ្វេសប៊ុកមជ្ឈមណ្ឌលបុប្ផាណា https://www.facebook.com/bophanacenter.cambodia និងរថយន្តតន្ត្រីទិព្វខ្មែរ https://www.facebook.com/KMMBOrganization៕