.jpg)
តារាសម្តែង និងពិធីការិនីឈ្មោះពិតកញ្ញា អន រ៉ាស៊ីសុមេត្តា ហៅណូម័រ និង វីជេ សុភា ដែលគេល្បីថានាំគ្នាទៅចុះអេតាស៊ីវិលមុនពេលរៀបអាពាហ៍ពិពាហ៍។ រូបថត ហ្វេសប៊ុក
ភ្នំពេញៈ ទើបតែស្ងប់រឿងថា លោកគ្រូពេទ្យម្នាក់តាមសុំស្នេហ៍យ៉ាងស្អិតហាក់ដូចជាសត្វតុកកែតោងនោះសោះ ក៏ស្រាប់តែថ្មីៗនេះល្បីថា តារាសម្តែង និងពិធីការិនីរូបស្រស់កញ្ញា អន រ៉ាស៊ីសុមេត្តា ហៅណូម័រ បានទម្លាយមុខមាត់ពិតម្ចាស់ស្នេហ៍ខ្លួនគឺជា វីជេ សុភា ថែមទាំងបាននាំគ្នាទៅចុះអេតាស៊ីវិលនៅមុនថ្ងៃរៀបចំអាពាហ៍ពិពាហ៍ទៀតផង។
ជាមួយនឹងបណ្តុំរូបថតដើរកម្សាន្តលក្ខណៈជុំគ្រួសារទាំងសងខាង និងមានរូបផ្អែមល្ហែមជាគូស្នេហ៍ផងដែរជាមួយនឹងវីជេ សុភា នៅឯតំបន់ភូមិភាគឦសានខេត្តមណ្ឌលគិរីនោះចេញពីគណនីហ្វេសបុកកញ្ញា ណូម័រ បង្ហើរសារថា៖ «ស្នេហ៍គ្រាដំបូងដែលអូនយល់។ អរគុណដែលជូនអូនទៅទីកន្លែងដែលអូនប្រាថ្នា។ តែមិនមែនទៅដើរលេងទេណាគឺទៅធ្វើការទេណា!»។
តែអ្វីដែលគួរឲ្យងឿងឆ្ងល់នោះគឺដំណឹងលេចឮថា ពិធីការិនីកញ្ញា ណូម័រ បានសម្រេចចិត្តចុះ អេតាស៊ីវិល ឬចុះសំបុត្រអាពាហ៍ពិពាហ៍ជាមួយនឹងលោក វីជេ សុភា មុនថ្ងៃរៀបការគឺដើម្បីបានឈ្មោះភាគីទាំងសងខាងយកទៅធ្វើប្លង់រឹងនៃផ្ទះវីឡាកូនកាត់មួយដែលនាង និងលោក សុភា បានទិញរួមគ្នាសម្រាប់ក្រោយពីថ្ងៃរៀបមង្គលការរបស់អ្នកទាំង ២។
តារាសម្តែង និងពិធីការិនីឈ្មោះពិតកញ្ញា អន រ៉ាស៊ីសុមេត្តា ហៅណូម័រ។ រូបថត ភ្នំពេញប៉ុស្តិ៍
ការពិតឬយ៉ាងណា កញ្ញា ណូម័រ ក៏ពុំអាចសុំការបកស្រាយបានដែរ ខណៈភ្នំពេញប៉ុស្តិ៍បានទំនាក់ទំនងច្រើនលើក ខណៈទូរស័ព្ទតេចូលតែគ្មានអ្នកលើកទទួល។
តែបើតាមការអះអាងក្នុងវីដេអូឃ្លីបនៃកម្មវិធីទូរទស្សន៍អនឡាញមួយដែលមានការចោទសួរពាក់ព័ន្ធនឹងរឿងនេះដែរនោះ កញ្ញា ណូម័រ បានបកស្រាយយ៉ាងដូច្នេះថា សម្រាប់មនុស្សទូទៅតែងតែគិតថា មនុស្សដែលខ្លួនស្រឡាញ់នោះរហូតបានរៀបមង្គលការជាមួយគ្នានោះ គឺជាគូព្រេងពីអតីតជាតិ ទើបបានជួបគ្នាជាគូគាប់ ឬយកគ្នាជាប្ដីប្រពន្ធទៅថ្ងៃអនាគតបាន។
ចំណែកឯរឿងនាំគ្នាទៅចុះអេតាស៊ីវិលមុន កញ្ញា ណូម័រ ក៏បានបន្តថា៖ «ទោះបីជាមានការនិន្ទាបែបជាការពេបជ្រាយខ្លះៗពីខាងអ្នកមាត់ចាបមាត់ព្រាបចំពោះរឿងទង្វើចុះអេតាស៊ីវិលមុនថ្ងៃរៀបការខាងលើនេះក្ដី ប៉ុន្តែនាងខ្ញុំគិតថា គឺជាសិទ្ធិសេរីភាពរបស់ពួកយើងប៉ុណ្ណោះ អ្វីដែលសំខាន់ គឺទង្វើ និងការអនុវត្តជាក់ស្ដែងរបស់ភាគីទាំងសងខាងដែលអាចព្រមទទួលយកបាន ហើយក៏ពេញចិត្តនឹងធ្វើវា»។
ស្រីស្រស់ឡើងកូដក្នុងអាជីពពិធីការិនីរូបនេះបានបន្ថែមថា៖ «ចំណែកប្រពៃណីខ្មែរនោះក៏នាងខ្ញុំមិនភ្លេចផងដែរ ពោលគឺនាងខ្ញុំក៏បានទៅមើលពេលវេលាសម្រាប់រៀបចំថ្ងៃមង្គលការរួចរាល់រួចមកហើយដែរ ខណៈពេលវេលានោះក៏អាចនឹងកើតឡើងនៅក្នុងពេលឆាប់ៗខាងមុខនេះទៀតផង»៕
