ភ្នំពេញៈ ថ្មីៗនេះបង្កើតភាពភ្ញាក់ផ្អើលខ្លាំងពីមជ្ឈដ្ឋានមហាជនទៅនឹងដំណឹងលេចឮថា តារាសម្តែងស្រីស្រស់ និងអតីតជាម្ចាស់ពានស្រីស្អាតលេខ ១ ប្រចាំឆ្នាំ ២០១៣ កញ្ញា ស៊ិនយូប៊ីន កំពុងតែត្រូវកូនប្រុសមហាសេដ្ឋីលំដាប់ឧកញ៉ាតាមចែចូវសុំធ្វើជាម្ចាស់បេះដូង ដោយមិនខ្វល់ពីសម្ព័ន្ធភាពនាង និងលោក វ៉ៃហាំង នៅកៀកកើយនោះឡើយ។
បើតាមប្រភពអ្នកស្និទ្ធនឹងតារាស្រី ស៊ិន យូប៊ីន បង្ហើបឲ្យដឹងថា បុរសជាកូនមហាសេដ្ឋី ដែលមានរបររកស៊ីវិនិយោគផ្នែកសណ្ឋាគារ និងរត់ពន្ធប្រេងសាំងវ័យ ៥០ ប្លាយនោះ មិនត្រឹមតែមានចិត្តស្រឡាញ់ទេ ថែមទាំងចង់ចូលចែចូវកញ្ញា ស៊ិន យូប៊ីន ដើម្បីរៀបចំអាពាហ៍ពិពាហ៍ បែបបើកចំហទៀតផងប្រសិនបើស្រីស្អាត អាចកាត់ផ្តាច់ទំនាក់ទំនងស្នេហាជាមួយនឹងប្រុសរូបសង្ហាលោក វ៉ៃហាំង។
រំពេចនោះក៏មានការលាន់មាត់ពីមហាជនថា៖ «អ៊ីយ៉ា!តែប៉ុណ្ណេះ តារាស្រី ស៊ិន យូប៊ីន ជាតារាសម្តែង និងពិធីការិនី ដែលតែងតែចុះកុងត្រានឹងស្ថានីយទូរទស្សន៍ PNN ស្ទើរតែគ្រប់រឿងភាគ ច្បាស់ជារស់នៅដោយសុខសាន្ត ហើយដេកចាយលុយមិនចេះអស់នោះឡើយ ប្រសិនបើនាង យល់ព្រមទទួលតាមសំណើសុំស្នេហ៍កូនប្រុសរបស់មហាសេដ្ឋីម្នាក់»។
សម្រាប់បុរសដែលមានវ័យប្រមាណ ៥០ ប្លាយ នោះ ក៏លេចឮដែរថា ត្រូវបានតារាស្រីៗមួយចំនួនទៀត បានព្យាយាមតាមស្នេហាលោកច្រើនណាស់ ដោយគេនាំគ្នាហៅលោកថា «ឃ្លាំងលុយ» ទៀតផង ប៉ុន្តែបុរសដែលចូលចិត្តជះលុយលើក្តីស្នេហ៍ជាមួយស្រីស្អាតនោះ ពេញចិត្តតែកញ្ញា យូប៊ីន ជាងគេ។
ក្នុងជំនួបអ្នកសារព័ត៌មានកន្លងមក ស្រីស្រស់ យូប៊ីន ដែលមានត្រេមុខស្រដៀងនឹងតារាកូនកាត់ថៃរូបនេះបែរជាត្អូញថា នាងនៅមិនទាន់រកគូគាប់ចិន្តាឃើញដូចគេនោះឡើយ។ ស្រីស្អាតរូបនេះ ថែមទាំងថ្ងូរថា៖ «មិនទាន់មានគូសង្សារនោះទេ អ៊ីចឹងមិនដឹងថារៀបការនៅថ្ងៃណា ខែណា ឆ្នាំណាបានឡើយ ព្រោះថា នៅពេលនេះ គូព្រេងមិនទាន់ដល់»។
ទោះបីជាកញ្ញា ស៊ីន យូប៊ីន វាចាហាក់ដូចជាកម្សត់ណាស់រឿងគ្មានគូគ្រងមែនក្តី ប៉ុន្តែ ស្រីស្អាតបង្ហាញភាពហ៊ឺហាដល់កំពូលដូចនាងជិះរថយន្តទំនើប Porsche តម្លៃមិនតិចជាង ២០ ម៉ឺន ដុល្លារ យ៉ាងកាលីប ហើយទៅផ្គួបនឹងសម្រស់ឆើតឆាយ កាន់តែមានភាពទាក់ទាញទៀត។
បើតាមអ្នកសិល្បៈដែលស្និទ្ធ យូប៊ីន បានបង្ហើបថា គ្រាន់តែរថយន្តទំនើប ១ គ្រឿង គ្មានអ្វីអស្ចារ្យទេ សម្រាប់ស្រីស្អាតរូបនេះ ព្រោះបើនាងចង់បានផ្ទះវីឡាធំ និងរថយន្តទំនើបៗប៉ុន្មានគ្រឿងក៏បានដែរឲ្យតែព្រមបោះបង់ស្នេហ៍ វ៉ៃហាំង ព្រមធ្វើជាគូគ្រងលោក ឬចង់លេងខ្លួនជាសេដ្ឋិនី ក៏មិនពិបាកឡើយ។
យ៉ាងណាភ្នំពេញ ប៉ុស្តិ៍ក៏មិនអាចទទួលបានការបកស្រាយបន្ថែមពីស្រីស្រស់ យូប៊ីន ជុំវិញរលកព័ត៌មានត្រូវកូនប្រុសសេដ្ឋីតាមស្នេហ៍ឡើយ៕