.jpg)
តារាចម្រៀងស្រីផលិតកម្ម WeProduction កញ្ញា បាន មុន្នីល័ក្ខ។ ភ្នំពេញ ប៉ុសិ៍្ត
ភ្នំពេញៈ ទើបផុតល្បីរឿងសម្បូរទីផ្សារថតកុនល្អប្រសើរជាងចម្រៀងនៅលើទ្រនំហង្សមាសមុននេះសោះ ថ្មីៗនេះក៏ស្រាប់តែលេចឮនូវដំណឹងរហិចរហៀងថា តារាចម្រៀងស្រីស្រស់កញ្ញា បាន មុន្នីល័ក្ខ កំពុងដើរចេញពីទ្រនំចាស់ផលិតកម្ម We Production ទៅទ្រនំថ្មីគឺផលិតកម្មសាន់ដេ។
បើតាមប្រភពមហាជនបានខ្សឹបខ្សៀវតៗគ្នាដោយសំអាងថា បានឃើញកញ្ញា បាន មុន្នីល័ក្ខ ថតរូបជុំគ្នាជាមួយនឹងតារាចម្រៀងប្រុសទ្រនំសាន់ដេគឺលោក ខាន់ ចេមស៍ នាពេលថ្មីៗ។
ផ្ទុយទៅវិញអតីតបេក្ខនារីធ្លាប់ឆ្លងកាត់ត្រឹមវគ្គពាក់កណ្តាលផ្តាច់ព្រ័ត្រ The Voice Cambodia រដូវកាលទី ១ នាឆ្នាំ ២០១៤ ដែលមានសំនៀងផ្អែមពីរោះ និងសម្រស់ស្រស់ស្អាតកញ្ញា បាន មុន្នីល័ក្ខ បានបដិសេធចំពោះដំណឹងលេចឮខាងលើនេះភ្លាមៗដែរ។
កញ្ញា បាន មុន្នីល័ក្ខ តារាចម្រៀងស្រី និងជាតារាសម្តែងស្រីផលិតកម្មហង្សមាស ទោះបីជាមិនសូវមានបទថ្មី តែក៏ឧស្សាហ៍ឡើងឆាកតន្ត្រីជាញឹកញាប់ព្រមទាំងធ្លាប់ថតកុនរឿង «បិសាចគួរឲ្យស្រឡាញ់» ជាតួកាចឆ្នាស ច្រណែនឈ្នានីសគេនោះបានឆ្លើយបញ្ជាក់យ៉ាងខ្លីថា៖ «នាងខ្ញុំមិនបានចេញពីកន្លែងចាស់ ហើយក៏អត់បានទៅរកកន្លែងថ្មីអ្វីនោះដែរទេ»។
មុននេះបន្តិចកញ្ញា បាន មុន្នីល័ក្ខ តារាចម្រៀងស្រីបច្ចុប្បន្នជ្រកនៅផលិតកម្ម We Production ដែលជាបុត្រសម្ព័ន្ធផលិតកម្មហង្សមាសមហាជនដូចមិនសូវឃើញនាងចេញបទថ្មីៗដូចជាតារាផ្សេងៗ តែបែរជានាងមានឱកាសទៅឆក់បានទីផ្សារកុនជាហូរហែគួរឲ្យកត់សម្គាល់ទៅវិញ។
ចាប់តាំងពីបានប្រឡូកនៅក្នុងវិថីសិល្បៈជ្រកនៅទ្រនំ We Production មក គេមិនសូវជាឃើញនាងបានចេញបទចម្រៀងរបស់ខ្លួនឯងប៉ុន្មានទេគឺឃើញតែច្រៀងបទមរតកដើម បង្ហោះនៅក្នុងយូធូបជាច្រើនបទរួមទាំងមានទឹកដមសំនៀងពីរោះគួរជាទីសណ្តាប់មានដូចជាបទ «ផ្គរលាន់ប៉ៃលិន» និងបទ «ក្លិនជាប់នាសា» ជាដើមដែលកញ្ញា បាន មុន្នីល័ក្ខ ធ្លាប់យកទៅប្រកួតក្នុងកម្មវិធីផងដែរនោះ។
ខណៈតារាចម្រៀងរួមទ្រនំដែលជាអតីតបេក្ខភាពក្នុងការប្រឡងកម្មវិធី The Voice Cambodia ទាំងរួមជំនាន់នៃរដូវកាលទី ១ និងទី ២ ឬកម្មវិធី Cambodia Idol ហាក់មានភាពមមាញឹកខ្លាំងឡើងឆាកនៃការប្រគំតន្ត្រីតាមខេត្តនានាយ៉ាងសស្រោកសស្រាំ និងចេញបទចម្រៀងថ្មីៗជាហូរហែ តែតារាស្រីស្រស់ បាន មុន្នីល័ក្ខ បែរជាគេស្គាល់តាមរយៈការបកស្រាយបទចម្រៀងជំនាន់ដើមទៅវិញ។ នេះបើតាមការបង្ហោះបទចម្រៀងរបស់នាងនៅក្នុងបណ្តាញយូធូប និងផុសផុលនៅក្នុងការសម្តែងកុនជាតួឆ្នាសឆ្នើមទៅវិញ។
តាមសម្តីតារាស្រីសម្តីផ្អែមកញ្ញា បាន មុន្នីល័ក្ខ ធ្លាប់ប្រាប់ភ្នំពេញប៉ុស្តិ៍ផ្ទាល់កាលពីថ្ងៃសម្ពោធរឿង «កូនក្រក» របស់តារាជើងចាស់អ្នកនាង ចន ច័ន្ទលក្ខិណា កន្លងមកបានឲ្យដឹងថា៖ «តាមពិតទៅនាងខ្ញុំមិនចូលចិត្តដើរតួឆ្នាសឆ្នើមអីទេគឺខ្ញុំចូលចិត្តតួស្លូតបូត សម្រក់ទឹកភ្នែកវិញ»៕
