ភ្នំពេញ៖ បាំងពេលមិនដល់ ១ ខែទៀតទេ ពិធីមង្គលការតារាសម្តែងស្រីស្អាតមានបបូរមាត់សិចស៊ី ម៉ាក់ សែនសូនីតា ហៅកញ្ញា តូតា និងលោក ប៉ុល វិបូ អតីតអគ្គនាយករងទូរទស្សន៍ CTN និងថៅកែផលិតកម្មអង្គរភីចឈ័រ នឹងដល់ថ្ងៃកំណត់តាមវេលានៃគន្លងប្រពៃណីខ្មែរហើយ ខណៈល្បីថា អ្នកទាំង ២ ត្រៀមប្រាក់ ១០ ម៉ឺនដុល្លារ សម្រាប់រៀបចំពិធីអាពាហ៍ពិពាហ៍នៅឯសណ្ឋាគារលំដាប់ផ្កាយ ៥។
ចំណងស្នេហារៀបការរបស់ស្រីស្អាត ម៉ាក់ សែនសូនីតា ហៅ តូតា និងលោក ប៉ុល វិបូ ហៅលោក នីត ដល់ថ្ងៃកំណត់ជាក់លាក់ជាផ្លូវការក្រាបសំពះផ្ទឹមតាមប្រពៃណីខ្មែរនៅថ្ងៃទី ១៦ ខែ មីនា ឆ្នាំ ២០២០ នេះហើយ ធ្វើនៅសណ្ឋាគារផ្កាយ ៥ សុខាភ្នំពេញ ដែលនឹងអញ្ជើញភ្ញៀវជាតារាល្បីៗរាប់រយនាក់ចូលរួម ខណៈការចំណាយវិញ ត្រូវបានគេប្រមាណថាមិនក្រោម ១០ ម៉ឺនដុល្លារឡើយ។
យ៉ាងណាកញ្ញា ម៉ាក់ សែនសូនីតា មិនលើកទូរស័ព្ទឡើយទើបមិនអាចសុំការបំភ្លឺបន្ថែមពីលើរឿងគម្រោងហៅភ្ញៀវ និងការចំណាយប្រាក់សម្រាប់មង្គលការនោះ ប៉ុន្តែមុនធ្លាយរឿង រៀបការនេះកញ្ញា តូតា ក៏បានព្រលយប្រាប់អ្នកសារព័ត៌មានដែរថា មង្គលការរបស់នាងនឹងគ្រោងយកហាងសម្អាងការចំនួន ៣ ហាងផ្សេងៗគ្នា ហើយរាល់កម្មវិធីផ្សេងប្រើសម្អាងការដាច់ដោយឡែកពីគ្នាតែម្តង ហើយក៏ស្វាគមន៍អ្នកសារព័ត៌មាន ដែលចង់ទៅថត ឬ Live បានតាមចិត្តចង់ទៀតផង។
ដោយឡែកក្នុងជំនួបតាមទូរស័ព្ទកាលពីពេលថ្មីៗនេះលោក ប៉ុល វិបូ ហៅ នីត ឲ្យដឹងថា៖ «ខ្ញុំ និងគាត់រៀបការថ្ងៃទី ១៦ ខែ មីនា ឆ្នាំ ២០២០ ហ្នឹងមែន! កម្មវិធីរបស់ពួកយើងធ្វើនៅសណ្ឋាគារសុខាភ្នំពេញ លក្ខណៈកណ្តាលមិនធំដុំណាស់ណាទេ ប៉ុន្តែយើងត្រៀមទទួលភ្ញៀវជាង ១០០ តុ ទេ ក្នុងនោះមានទាំងអ្នកសិល្បៈ និងពីខាងក្រៅសិល្បៈ។
លោក នីត បន្ថែមថា៖ «ការចំណាយ យើងមិនទាន់អាចប្រមាណបានថា នឹងអស់លុយប៉ុន្មានទេ គឺចាំមើលតាមភាពជាក់ស្តែងសិន។ មង្គលការរបស់ពួកយើង គឺស្វាគមន៍ដល់អ្នកកាសែតគ្រប់ស្ថាប័នទាំងអស់តែម្តង យើងមិនមានរឿងអីត្រូវបិទបាំងទេ!»។ ចំណែកចំណងស្នេហ៍រវាង ម៉ាក់ សែនសូនីតា និងលោក ប៉ុល វិបូ បានភ្ជាប់ស្នេហ៍ជាមួយគ្នាជាង ៥ ឆ្នាំមកហើយ ដែលថ្មីៗនេះ តូតា បានងាកទៅធ្វើជំនួញជាមួយ គូស្នេហ៍ច្រើនជាងការងារសិល្បៈ ដូចជាបើកភោជនីយដ្ឋាន និងហាងលក់សម្លៀកបំពាក់ ដែលចំណាយទុនអស់រាប់សែនដុល្លារទៀតផង៕