ភ្នំពេញ៖ តារាចម្រៀងស្រីជ្រកទ្រនំថោន មានឈ្មោះពិត ផាន វីរ៉ាទី ហៅ កញ្ញា រ៉ាប៊ី បង្កើតភាពភ្ញាក់ផ្អើលសាជាថ្មី ជាមួយការបោះជំហានមួយផ្សេងទៀតក្រៅអាជីពសិល្បៈ ដោយល្បីថា កញ្ញា នឹងជះប្រាក់រាប់ម៉ឺនដុល្លារ បើកអាជីវកម្មលក់ផលិតផលរក្សាសម្រស់។
ម្ចាស់បទ «មាន់ស្រែ» កញ្ញា ផាន វីរ៉ាទី ហៅ រ៉ាប៊ី បានឲ្យដឹងថា នៅមុនដំណាច់ឆ្នាំ ២០២០ នេះ នាងត្រូវតែបង្កើតមុខរបរផ្ទាល់ខ្លួនថ្មីមួយ ក្រៅពីអាជីពសិល្បៈទាក់ទងការលក់គ្រឿងសម្អាង ដែលនាំចូលពីបរទេស ហើយក៏ត្រូវប្រើដើមទុនយ៉ាងហោចណាស់ក៏មានចំនួនខ្ទង់ ៤ ម៉ឺនដុល្លារឯណោះ។
ជាក់ស្តែងនាពេលនេះ សម្រាប់មុខរបរនេះ សង្កេតឃើញថា មានក្រុមតារាៗដើរ ១ ជំហានមុននាងទៅហើយក្ដី ប៉ុន្ដែនាងនឹងមិនបោះបង់ទេ ព្រោះថា ឃើញមនុស្សជាច្រើននាក់ហើយដែលរកស៊ីផ្នែកនេះមានជោគជ័យ និងក្លាយទៅជាអ្នកមានអស់ទៅហើយដែរ។
កញ្ញា រ៉ាប៊ី តារាចម្រៀងស្រីមានហុងស៊ុយឡើងក្រឺតៗ ក្រោយពីបានវិលត្រឡប់មកពីការកើបប្រាក់ដុំនៅសហរដ្ឋអាមេរិកក៏បង្ហាញពីសុទិដ្ឋិនិយមនឹងបទថ្មីទើបចេញនៅក្នុងផលិតកម្មថោនគឺបទ «លុយ!លុយ!» ផងដែរ សម្រាប់សម្ទុះស្រូបភាពល្បីពីមហាជន បង្ហើបឲ្យដឹងតាមរយៈការ Live ហ្វេសប៊ុកពីរបរក្រៅសិល្បៈ នឹងបើកនៅទីតាំងនៅម្ដុំពោធិ៍ចិនតុង នោះថា៖ «ផលិតផលដែលនាងខ្ញុំគ្រោងយកមកលក់នោះ គឺមកពីថៃ ហើយត្រូវការរៀបចំឯកសារត្រឹមត្រូវ មានការទទួលស្គាល់ពីក្រសួងសុខាភិបាល និងក្រសួងពាណិជ្ជកម្មកម្ពុជា ដើម្បីកុំឲ្យថ្ងៃក្រោយមានបញ្ហាកើតឡើង។ មូលហេតុដែលនាងខ្ញុំមិនទាន់ធ្វើមុខរបរមួយនេះ ជាយូរមកហើយ ដោយសារតែកាលពីមុននាងខ្ញុំចូលថោន មិនទាន់ត្រូវបានគេទទួលស្គាល់ អត់ទាន់ល្បីឈ្មោះ ប៉ុន្តែពេលនេះ មហាជនបានស្គាល់ហើយ អ៊ីចឹងក៏ចង់រកស៊ីលើផ្នែកនេះ បន្ថែមពីលើអាជីពសិល្បៈ ដែលខ្ញុំស្រឡាញ់បំផុតនោះ។ ចំពោះមុខរបរថ្មី នឹងដំណើរការខ្ទង់នៅអំឡុងខែកញ្ញា ឆ្នាំ ២០២០ ខាងមុខនេះ»។
ទាក់ទងមុខជំនួញថ្មីនេះ កញ្ញា រ៉ាប៊ី ក៏បញ្ជាក់ដែរថា នាងមិនមានអ្នកណាជួយឧបត្ថម្ភឡើយ ហើយការប្រើដើមទុនត្រឹមប៉ុណ្ណេះ សម្រាប់រូបនាង គឺអាចទៅរួចគ្មានឧបសគ្គទេ ព្រោះថា ទោះជាពេលនេះកូវីដ ១៩ នៅមិនទាន់ស្ងប់មែនក្តី ប៉ុន្ដែនាងនៅតែមានប្រាក់ចំណូលបានតក់ៗពីអាជីពសិល្បៈ មិនដាច់នោះឡើយ»។
គួររំឭកដែរ កាលពីចេញបទ «មាន់ស្រែ» មួយប្រាវនោះ ក៏លេចព័ត៌មានថា បទនេះជួយលើករាសីឲ្យតារាចម្រៀងស្រីរលកក្រោយនៅផលិតកម្មថោនមានឈ្មោះពិត ផាន វីរ៉ាទី ហៅ កញ្ញា រ៉ាប៊ី អាចកើបប្រាក់បានដល់ទៅ ១០ ម៉ឺនដុល្លារ ក្នុងរយៈពេលមិនបាន ១ ឆ្នាំផង និងត្រូវមហាជនលាន់មាត់ថា៖ «តើជាការពិត ឬមួយយ៉ាងណា?»។
កញ្ញា រ៉ាប៊ី ធ្លាប់បកស្រាយថា៖ «តាមពិតទៅ! រឿងដែលថាបទ «មាន់ស្រែ» អាចរកប្រាក់ចំណូលបានចំនួន ១០ ម៉ឺនដុល្លារ នោះ គឺនាងខ្ញុំមិនបាននិយាយថាមានចំនួនបែបនោះឡើយ គឺវាគ្រាន់តែក្បែរៗនឹងចំនួននោះប៉ុណ្ណោះ។ បងគ្រាន់សាកគិតលេងជាមួយនឹងនាងខ្ញុំតាមរយៈប្រាក់ចំណូលប្រចាំខែទៅអាចយល់ពីរបៀបរកប្រាក់ចំណូលពីបទចម្រៀងនេះមិនខាន»៕