.jpg)
សោភា ទេពី កំពុងតែជិះ Lexus NX 200t មិនទាន់បានប៉ុន្មានផង ក៏រអ៊ូចង់ជិះRang Rover។ រូបថត ហ្វេសប៊ុក
ភ្នំពេញ៖ ខណៈតារាប្រុសស្រីស្ទើរគ្រប់រូបបានរអ៊ូរទាំនឹងភាពធ្លាក់ចុះនូវជីវភាពសេដ្ឋកិច្ចប្រចាំថ្ងៃ ដោយសារតែវិបត្តិកូវីដ ១៩ នោះ ស្រាប់តែតារាចម្រៀងស្រី ដែលចូលចិត្តច្រៀងឡើងវិញ (Cover) បទជាមរតកដើម និងអតីតបេក្ខនារីប្រឡងកម្មវិធី Cambodia Idol រដូវកាលទី ៣ ចូលបានត្រឹមវគ្គ Live Show សប្តាហ៍ទី ៥ កញ្ញា សោភា ទេពី លេចឮល្ហៀងៗថា ចង់ដូររថយន្តថ្មីម៉ាក Rang Rover ខណៈដែលខ្លួនកំពុងតែជិះរថយន្តទំនើបម៉ាក Lexus NX 200t តម្លៃជាង ៦ ម៉ឺនដុល្លារហើយនោះ។
នាពេលកន្លងមកគេធ្លាប់ឃើញតារាចម្រៀងស្រីស្រស់កញ្ញា សោភា ទេពី បានប្ដូររថយន្តពីម៉ាក Highlander មកជិះរថយន្តទំនើបម៉ាក Lexus NX 200t ដែលមានតម្លៃជាង ៦ ម៉ឺនដុល្លារ ជិះមិនទាន់បាន ១ ឆ្នាំផងនោះ ក៏ស្រាប់តែស្រីស្រស់រូបនេះ មកចេញវាចាថា ចង់ជិះម៉ាក Range Rover វិញម្ដងយ៉ាងងាយ។
តែកញ្ញា សោភា ទេពី អតីតជាបេក្ខភាពប្រឡងកម្មវិធី Cambodian Idol រដូវកាលទី ៣ និងបច្ចុប្បន្នគឺជាតារាចម្រៀង របស់ផលិតកម្ម Zone កំពុងតែស្រូបភាពល្បីឈ្មោះបោះសំឡេងជាមួយនឹងបទ «អ្នកណាកែចិត្តបង?» ដោយមានអ្នកចូលទស្សនាចំនួន 45 M នោះបង្ហើបថា៖ «មិនទាន់អាចដឹងបានទេថា ត្រូវការប្រើពេលប៉ុន្មានឆ្នាំទៀតនោះ ទើបអាចសម្រេចបំណងនេះព្រោះថា នាងខ្ញំគ្មានអ្នកណាគេជួយឧបត្ថម្ភឡើយ គឺពឹងតែកម្លាំងខ្លួនឯងប៉ុណ្ណោះ។ ប៉ុន្ដែនាងខ្ញុំគិតថា មានបំណងព្រមទាំងមានការតាំងចិត្ត នឹងធ្វើឲ្យសម្រេចបំណងនេះ នៅថ្ងៃណាមួយជាមិនខាននោះឡើយ ព្រោះថាចិត្តចង់ជិះឡាននេះ [ Range Rover] នៅក្នុងក្ដីស្រមៃឲ្យបានគ្រាន់តែត្រូវការប្រើពេលវេលា ដើម្បីបានវាយូរប៉ុណ្ណោះ»។
ដោយឡែកតារាចម្រៀងស្រី ទឹកដមសំឡេងផ្អែមកំពុងតែស្រូបប្រជាប្រិយភាពខ្លាំងពីមហាជន ដោយការបង្ហើរសំនៀងដ៏ពីរោះនូវបទមរតកដើមជារឿយៗ ហើយក៏ទើបតែផ្ទុះការរិះគន់ថ្មីៗដោយយកបទចម្រៀងរបស់អធិរាជសំឡេងមាសលោកតា ស៊ីន ស៊ីសាមុត បទ «ព្រោះតែអូន» ដោយសារបានកែទំនុកចម្រៀងពីប្រុសមកស្រី ធ្វើឲ្យគ្រួសាររបស់អ្នកនិពន្ធដ៏ល្បីលោក គង្គ ប៊ុនឈឿន សម្តែងការមិនពេញចិត្តទៀតផង។
មិនតែប៉ុណ្ណោះកញ្ញា សោភា ទេពី ក៏ធ្លាប់បង្ហើបរឿងច្រៀង Cover បទចាស់ជាមរតកដែរថា៖ «កាលដែលខ្ញុំខូវើបទនេះ ដោយសារតែបទនេះ មិនមានបទស្រីទេ ហើយខ្ញុំចង់ខូវើឲ្យមានបទសម្រាប់មនុស្សស្រីទាំងអស់អាចច្រៀងតាមបាន ណាមួយបទនេះវាពីរោះ ហើយកំពុងល្បីខ្លាំងសព្វថ្ងៃ។ អ្នកខូវើសុទ្ធតែប្រុសៗ ខ្ញុំក៏សម្រេចចិត្តខូវើតែម្តងទៅ។ មួយវិញទៀត ខ្ញុំក៏ស្រឡញ់ និងចូលចិត្តប្រភេទបទដែលជាមរតកដើមដែរ»៕
