The Phnom Penh Post Search

Search form




Logo of Phnom Penh Post newspaper Phnom Penh Post - វិចិត្រករ​ខ្មែរ​ឆ្នើម​បី​រូប​ទទួល​ពាន​ពី​​កម្ម​វិធី CMLTV ឆ្នាំ ២០១៦ នៅថៃ




វិចិត្រករ​ខ្មែរ​ឆ្នើម​បី​រូប​ទទួល​ពាន​ពី​​កម្ម​វិធី CMLTV ឆ្នាំ ២០១៦ នៅថៃ

Content image - Phnom Penh Post
លោក សួស្តិ៍ សុដាវី កញ្ញា ឆន ឌីណា និង​លោក ឈឹម សុធី ជា​វិចិត្រករ​ខ្មែរ​ឆ្នើម​ទាំងបី​តំណាង​ឲ្យ​កម្ពុជា​។ ហុង មិនា

វិចិត្រករ​ខ្មែរ​ឆ្នើម​បី​រូប​ទទួល​ពាន​ពី​​កម្ម​វិធី CMLTV ឆ្នាំ ២០១៦ នៅថៃ

ភ្នំពេញៈ វិចិត្រករ​ឆ្នើម តំណាង​ឲ្យ​កម្ពុជា​បី​រូប​ទទួល​បាន​ពាន​រង្វាន់​ពី​កម្មវិធី​ The CMLTV Contemporary Art Awards 2016 ដែល​រៀបចំ​លើក​ដំបូង​ នៅ ឯ​ប្រទេស​ថៃ​ ដោយ​មានសមាជិក​នៃ​ប្រទេស​អាស៊ាន​ប្រាំ​ចូលរួម​គឺ​ ​កម្ពុជា មីយ៉ាន់ម៉ា ឡាវ ថៃ និង​វៀតណាម និង​វិចិត្រករជា​តំណាង​ឲ្យ​ប្រទេស​ចំនួន ១៥ រូប។

លោក សួស្តិ៍ សុដាវី បាន​ពានរង្វាន់​ Venerable Artist Award ចំណែក​លោក ឈឺម សុធី បាន​ពាន​រង្វាន់​ Honored Artist Award ខណៈ​កញ្ញា ឆន ឌីណា ទទួល​បាន​ពានរង្វាន់​ Young Artist Award កាលពី​ថ្ងៃទី ១៥-១៦​ ខែ​កុម្ភៈ​ ឆ្នាំ ២០១៦​កន្លងមក។នេះជា​កម្មវិធីលើក​ដំបូង​ ​រៀបចំ​ដោយសាកល​វិទ្យា​ល័យ​មហោសារា​ខាំ ខេត្តមហាសាខាំ​ ក្នុង​គោល​បំណង​ សិក្សា​ស្វែង​យល់ពី​អំពី​សិល្បៈ​សហសម័យ​របស់​ប្រទេស​ជា​សមាជិក​អាស៊ាន​ទាំងប្រាំ។

ថ្លែង​ដោយ​ក្តីរំភើប​ឥតឧបមា និង​ស្មាន​មិន​ដល់​បន្ទាប់ពី​ទទួល​ពាន​រង្វាន់ ខណៈ​វិចិត្រករ​វ័យ ៦០ ឆ្នាំ​ លោក​ សុដាវី ប្រាប់​ភ្នំពេញ​ប៉ុស្តិ៍ថា៖ «​ឮ​ដំណឹង​ដំបូង​នោះ ដូចជា​មិនសូវ​មាន​អារម្មណ៍​ប្លែក​អ្វីឡើយ​ព្រោះថា​ខ្លួន​ធ្លាប់ទទួល​ច្រើន​ហើយដែរ​។ តែ​កម្មវិធី​នេះ ខ្ញុំ​យល់ថា​ខ្លួន​ហាក់​ដូចជាបាន​ទទួល​ការ​យក​ចិត្តទុក​ខ្លាំង​ជាង​ពេល​ណាៗ​ទាំងអស់​ ដោយសារ​ការ​ទទួល​រាក់ទាក់​ និង​ឲ្យ​តម្លៃ​លើ​អាជីព​វិចិត្រករ​នេះ​ខ្លាំងណាស់​ ហើយ​ខ្ញុំក៏​រំភើប​ចិត្ត​ដែរ​ពេលនេះ»។

Content image - Phnom Penh Post
ពានរង្វាន់​នៃ​កម្មវិធី CMLTV Contemporary Art Awards 2016។ ហុង មិនា

កញ្ញា ឆន ឌីណា ក៏ប្រាប់​ពីអារម្មណ៍​ និង​ផ្ញើសារ​ជាកម្លាំងចិត្ត​ដល់វិចិត្រ​ករ​ជំនាន់​ក្រោយៗ​ដែរថា​៖ «នាងខ្ញុំ​សប្បាយ​ចិត្តណាស់​ចំពោះ​ការ​ខិតខំ​ប្រឹង​របស់​ខ្លួនរហូត​ដល់​បាន​សម្រេច​ដូចជា​ទទួលបាន​នូវ​សមិទ្ធផល​នាពេល​នេះអ៊ីចឹង ព្រោះ​នាងខ្ញុំ​ស្រឡាញ់​អាជីពនេះ»។​

ក៏ប៉ុន្តែ​នៅ​ក្នុងសង្គម​ខ្មែរ ការ​លើកទឹក​ចិត្ដដល់​វិចិត្រករ ដូចជា​ពុំមាន​ការ​យកចិត្ត​ទុកដាក់​ឡើយ​ពីសំណាក់​​ថ្នាក់លើ​ ឬក៏​ក្រសួង​ពាក់ព័ន្ធ​នានា​ បន្ទាប់​ពួកគេ​បាន​រៀបចំជំនាញ​ចប់​ហើយ ​បើមិន​ចេះរស់​ដោយ​ខ្លួនឯង​នោះទេ​គឺពិត​ជាពិបាក​រំពឹង​ណាស់ ព្រោះ​បើមាន​ស្នាដៃច្រើន​ បែរជា​គ្មាន​កន្លែង​ដាក់តាំង​ពិព័រណ៍​ ហើយបើ​មានវិញ​ គ្រាន់តែ​ជាកន្លែង​តូច​ចង្អៀត ឬ​ក៏ផ្ញើ​ខ្លួននៅ​តាម​បន្ទប់​សណ្ឋាគា​រ ឬអាហារដ្ឋាន​ណាមួយ​តែ​ប៉ុណ្ណោះ។

ជាក់​ស្តែង បើ​ទោះ​បីជា​ខ្លួនទទួល​បាន​ពាន​រង្វាន់​ជា​កិត្តិយសតំណាង​ខ្មែរ​ក្តី​ ក៏លោក​ ឈឹម សុធី វិចិត្រករ​វ័យ ៤៩ ឆ្នាំ​ ហាក់ដូច​មិនសូវ​សប្បាយចិត្ត​ខ្លាំង​ឡើយ ​ដោយលោក​មាន​សំណូមពរថា៖ «ពេល​បាន​ឃើញ​វិចិត្រសាល​នៅឯ​សាកល​វិទ្យាល័យមហា​សារា​ខាំពេល​ទទួល​ពាននោះ​ ខ្ញុំ​យល់​ថាទី​នេះ អាចក្លាយ​ជា​សាលា​ផ្នែក​សិល្បៈ​វិចិត្រកម្ម​បាន​ព្រោះ​មាន​កន្លែង​ដ៏ធំសម្រាប់​ដាក់​បង្ហាញ​តែ​ផ្នែកស្នាដៃ​របស់​វិចិត្រ​ករ​ប៉ុណ្ណោះ​។ ប្រសិនបើអាច​ ខ្ញុំសូម​ឲ្យ​ខាង​ខ្មែរយើង​មានកន្លែង​បែបនេះ​ដែរ​នាពេល​ខាង​មុខ»៕​

អត្ថបទគួរចាប់អារម្មណ៍