.jpg)
រូបគំនូរប្រាង្គប្រាសាទអង្គរដ៏ស្រស់ស្អាត ដែលវិចិត្រករខ្មែរលោក មែ កក្កដា រំលេចនៅលើកែវ។ រូប សហការី
ក្រុងសៀមរាបៈ ទោះបីជាគ្មានសញ្ញាបត្រជំនាញវិចិត្រកម្មមែនក្តី តែថ្វីដៃគំនូរគូរលើវត្ថុប្រើប្រាស់តូចតាចនានារបស់លោក មែ កក្កដា កំពុងតែទាក់ទាញចំណាប់អារម្មណ៍ភ្ញៀវទេសចរបរទេសខ្លាំងនៅក្រុងសៀមរាបរហូតដល់មានអ្នកសុំរៀនគូរជាមួយនឹងលោកទៀតផង។
លោក មែ កក្កដា វិចិត្រករខ្មែរវ័យ ៣៤ ឆ្នាំដែលមានស្រុកកំណើតនៅឯស្រុកព្រៃឈរ ខេត្តកំពង់ចាមបានទៅរស់នៅក្រុងសៀមរាបនៅឆ្នាំ ២០០៧ ហើយធ្លាប់បានរៀននូវជំនាញសិល្បៈគំនូរតិចតួចនៅអង្គការឈ្មោះ Color of Cambodia នៅក្រុងសៀមរាបនៅក្នុងឆ្នាំ ២០១៤ ដោយបានចូលរៀនត្រឹមតែ ១ ខែប៉ុណ្ណោះ ក្រៅពីនេះឆ្លៀតរៀនពីគ្រូសិល្បៈនេះបន្តិចនោះបន្តិច ដោយសារតែគ្មានពេលទៅរៀនព្រោះជាប់រវល់ប្រកបរបរគូរគំនូរដើម្បីរកប្រាក់ចិញ្ចឹមជីវិត។
វិចិត្រករ មែ កក្កដា ប្រាប់ពីការផ្តើមមានគំនិតច្នៃគំនូរប្រេងលើវត្ថុប្រើប្រាស់នេះថា៖ «ទើបតែត្រឹម ២ ឆ្នាំចុងក្រោយនេះខ្ញុំបានបែកគំនិតច្នៃគំនូរលើវត្ថុផ្សេងៗមាន កែវ ចាន ពែង ត្រឡោក មួកការពារ អាវយឺត កែវកាហ្វេ កែវស្រាបៀរ ហ្គីតារ និងសម្បកទូរស័ព្ទដែរ។ ស្នាដៃគំនូរនេះធ្វើឲ្យមានការចាប់អារម្មណ៍ និងកោតសរសើរពីបងប្អូនខ្មែរនៅសៀមរាបខ្លាំង ជាពិសេសគឺក្រុមទេសចរជាបរទេសតែម្តង»។
ក្រុមទេសចរបរទេសចាប់អារម្មណ៍ខ្លាំងនឹងគំនូរប្រេងលើកែវរបស់វិចិត្រករ មែ កក្កដា នៅផ្សាររាត្រីក្រុងសៀមរាប។ រូប សហការី
ក្រៅពីគូរលើវត្ថុប្រើប្រាស់ខាងលើនោះហើយ វិចិត្រករគ្មានសញ្ញាបត្រតែមានទេពកោសល្យ និងដុងពីកំណើតក៏អាចគូររូបផ្សេងៗតាមតម្រូវការភ្ញៀវបានដែរ មានរូបទង់ជាតិតំណាងប្រទេស រូបទេសភាពប្រាង្គប្រាសាទបុរាណអង្គរវត្ត ឬបាយ័នជាដើម រំលេចដោយសោភណភាពស្រស់ស្អាត។ ស្នាដៃគំនូរប្រើថ្នាំប្រេងទាំងនេះតម្លៃទាបបំផុតត្រឹម ២ ដុល្លារ ខណៈថ្លៃបំផុត ១៥ ដុល្លារ ឬ ១៨ ដុល្លារ។ លោកបង្ហើបថា៖ «គូរលើវត្ថុតូចៗ ១ តម្លៃ ២ ដុល្លារ ខណៈកែវកាហ្វេ ឬកែវស្រាបៀរធំ ១ តម្លៃអាច ១៥ ដុល្លារ ឬ ១៨ ដុល្លារ ។ ហើយគូររូបនៅលើសម្បកទូរស័ព្ទវិញ ១ តម្លៃ ៨ ដុល្លារសម្រាប់ខ្មែរ និងតម្លៃ ១២ ដុល្លារ សម្រាប់បរទេស»។
តាមធម្មតាសម្រាប់ជីវភាពវិចិត្រករដែលពឹងលើការប្រើគំនិតច្នៃប្រឌិត និងជក់គូរគំនូរជាមធ្យោបាយចិញ្ចឹមជីវិតនោះហាក់មានអ្នកលើកឡើងថា មិនកប ឬពុំអាចពឹងបាន។ តែលោក មែ កក្កដា វិញបង្ហើបឲ្យដឹងថា៖ «កាលពីនៅគូររូបលើផ្ទាំងក្រដាស ឬក្រណាត់នោះដូចជាពិបាកចិញ្ចឹមគ្រួសារណាស់ តែចាប់តាំងពីខ្ញុំច្នៃរូបនៅលើវត្ថុប្រើប្រាស់ផ្សេងៗទាំងនេះ ប្រាក់ចំណូលប្រចាំថ្ងៃ ឬខែ អាចជួយសម្រួលជីវភាពគ្រួសារខ្ញុំស្រួលជាងមុន»។
សម្បកទូរស័ព្ទរបស់វិចិត្រករ មែ កក្កដា នៅផ្សាររាត្រីក្រុងសៀមរាប។ រូប សហការី
ក្រោយពីប្រកបអស់រយៈពេលជាង ២ ឆ្នាំមកក៏មានការកុម្ម៉ង់គូរលើរូបលើវត្ថុផ្សេងៗច្រើន ហើយប្រសិនបើលោកម្នាក់ឯងមិនអាចធ្វើទាន់ទេ។ លោក មែ កក្កដា បានឲ្យដឹងទៀតថា៖ «ដូច្នេះហើយខ្ញុំបណ្តុះប្អូនប្រុស ២ នាក់ទៀត ដែលចូលចិត្តជំនាញនេះឲ្យគេចេះ និងអាចជួយសម្រួលខ្ញុំបាន ហើយក៏មានគម្រោងលក់បោះដុំនៅទីផ្សារក្រៅពីក្រុងសៀមរាបដែរ។ គោលដៅនាំយកផលិតផលគំនូរច្នៃលើវត្ថុប្រើប្រាស់រួមមាន ចាន កែវកាហ្វេ កែវស្រាបៀរ ឬសម្បកទូរស័ព្ទនោះ ទៅបោះដុំលក់នៅផ្សារចំនួន ២ ក្នុងរាជធានីភ្នំពេញគឺផ្សារទួលទំពូង និងផ្សារធំថ្មី»។
ក្រៅពីមមាញឹកនឹងការងារគូរគំនូរនោះលោក មែ កក្កដា ក៏ឆ្លៀតបង្រៀនក្រៅម៉ោងទៅដល់សិស្សជាបរទេសដែលចង់ចេះគូរផងដែរ។ លោក មែ កក្កដា មានបងប្អូន ៥ នាក់បន្ថែមថា៖ «ខ្ញុំក៏បានឆ្លៀតបង្រៀនជនបរទេស ក្រៅម៉ោងដែរនាពេលពួកគាត់ស្នើឲ្យបង្រៀនពីរបៀបគូរលើវត្ថុប្រើប្រាស់ដូចជាកែវ ចាន ត្រឡោក កែវកាហ្វេ ឬកែវស្រាបៀរ ជាដើមនោះ។ ការបង្រៀននេះខ្ញុំតម្រូវឲ្យពួកគាត់គិតជាម៉ោងគឺ ១ ម៉ោងតម្លៃ ១០ ដុល្លារតែប៉ុណ្ណោះ»៕
